आः पार्टी कब्जा ओलीया दाउ
विधानं यानाः कार्यवाहक अध्यक्ष जुइ मखनीगु जुल
येँ (सन्ध्या टाइम्स)/पार्टी अध्यक्ष झलनाथ खनालं माओवादीलिसे जानाः सरकार गठन यायेवं आः पार्टीयात हे थःगु कब्जाय् कायेगु कुतः एमालेया माधव नेपाल-खड्ग ओली पुचलं शुरु याना हःगु खँ सीदुगु दु ।
अध्यक्ष खनाल प्रधानमन्त्री जूगुलिं आः वय्कलं सरकार व पार्टी निगुलिं थासय् स्वये मफइगु जूगुलिं पार्टीया कार्यवाहक अध्यक्षया जिम्मा खड्ग ओलीयात बीमाःगु माग पार्टी दुने थ्वया वःगु दु ।
तर पार्टीया विधान कथं धाःसा ओलीयात कार्यवाहक अध्यक्ष बी मछिंगु कारणं थ्व अभियानयात न्ह्यःने यंकेत नं मछिनाच्वंगु खँ सूत्रं धाःगु दु। पार्टीया विधान कथं यदि अध्यक्षया अधिकार बियाः कार्यवाहक अध्यक्ष तोके यायेमाल धाःसा उगु पद उपाध्यक्षतय्त वनी। एमालेय् थौंकन्हय् प्रथम उपाध्यक्ष वामदेव गौतम, द्वितिय उपाध्यक्ष अशोक राई व तृतिय उपाध्यक्ष विद्या भण्डारी जुयाच्वंगु दु। अध्यक्ष खनालं अधिकार हस्तान्तरण हे यात धाःसां उगु अधिकार फया काइम्ह ला वामदेव गौतम जुइ। यदि गौतमं मकाःसा अशोक राईं काइ। गौतम व राई निम्हं खनाल पक्षयापिं खः ।
नेपाल व ओली निम्हं पार्टीया वरिष्ठ नेता जूगु कारणं वय्कःपिंत गुगुं नं कथं कार्यवाहक अध्यक्ष दयेके मछिंगुलिं आः विधान कथं सिबें नं राजनीतिक सहमति कथं कावा अध्यक्ष दयेकेत माग जुयाच्वंगु खँ सीदुगु दु ।
एमाले मन्त्रीतय्त मन्त्रालय
स्थायी समितिया दकलय् महत्वपूर्ण नेतात माधव नेपाल, खड्ग ओली व विद्या भण्डारी मदुगु पालय् लाक्क म्हिगः स्थायी समितिया बैठक सःताः प्रधानमन्त्री झलनाथ खनालं बिना विभागीय मन्त्रीत बिष्णु पौडेलयात रक्षा व गंगालाल तुलाधरयात शिक्षा मन्त्रालय बीगु धकाः निर्णय याःगु दु। थ्व स्वयां न्ह्यः पार्टीं पौडेलयात गृह मन्त्रालय बीगु निर्णय यानातःगु खः। थःपिं मदुगु इलय् याःगु थ्व निर्णययात थःपिंसं स्वीकार याये मफइगु खँ स्थायी समितिया दुजः विद्या भण्डारीं धयादीगु दु। पौडेलयात रक्षा बिउगुलिं गृह माओवादीयात वनीगु निश्चित जुल ।
