हाकनं वःगु मधेस विद्रोहया ख्याच्वः

देशय् वामपन्थीत जानाः सरकार गठन यायेसातकि उकियात वाम ध्रुवीकरण जुल धासें छगू पुचलं लोकतान्त्रिक गठबन्धन दयेकेगु कुतः याःगु खःसा मधेसवादीतय्सं सरकार गठनया नापनापं हानं मेगु मधेस विद्रोहया ख्याच्वः बिउगु दु। मधेसवादी पार्टीतय्सं मधेस मुक्तिया लागिं यानाच्वंगु आन्दोलन व तयाच्वंगु सः निश्चय नं जायज खः। तर मधेसवादी दलया नेतातय्के दुगु पदलोलुपता व लोभी चरित्रं यानाः मधेस आन्दोलन छगू कथं तहसनहस जुयाच्वंगु थौंया अवस्था दु। सदनय् थ्यनेवं अन सत्ताया लागिं जुइगु थीथी कथंया कासाय् ततक्यनाः मधेसी नेतात छगू कथं पथभ्रष्ट जुइधुंकूगु दु। उकिं उमिसं थौंकन्हय् थःपिं सरकारय् दुसा मधेस आन्दोलनयात वास्ता तक हे मयायेगु, सरकारय् मदुसा मधेस आन्दोलनयात सरकारय् वनेगु कार्ड कथं छ्यलेगु ज्या यानाच्वंगु दु। थ्वहे झ्वलय् वामपन्थी दलत जानाः दयेकूगु वर्तमान सरकारयात नं ख्याच्वः बी कथं उमिसं हानं छक्वः मधेस विद्रोह यायेगु खँ न्ह्यःने हःगु दु। उमिसं धयाच्वंगु थ्व मधेस विद्रोह मधेस व मधेसी जनताया लागिं स्वयां नं थःपिनि व्यक्तिगत स्वार्थया लागिं जक खः धइगु खँ प्रस्ट सीदु। उकिया नापनापं भारतयात नं मययाच्वंगु वर्तमान सरकार विरुद्ध विद्रोह यायेगु धकाः वःगु उगु ख्याच्वःयात गनं ग्वाहालि वयाच्वन धइगु खँ नं स्पष्ट दु। उकिं थज्याःपिं नेतात व उमिसं विद्रोहया नामय् याइगु साँठगाँठयात सम्बन्धित समुदायं बांलाक हे म्हसीकेमाः। अधिकारया लागिं मधेसी जनतां अझ नं विद्रोह याये मानि, थ्व यथार्थ खः। तर विद्रोहयात सत्ताय् वनेगु कार्ड दयेकीपिं नेतातपाखें मधेसी जनता धाःसा सतर्क जुइ हे माः ।

More Stories Like this