न्हू बजे

नर्मदेश्वर प्रधान

खँयाखँय्

न्हू बजे। बाज्याया साहिंली मां। अबुया साहिंली बजे। जिमि घाँय्घाँय् साहिंली बजे। न्हू बजे। जिं बांलाक म्हसिउ। ह्वने नं। खँल्हाये नं। पुलांपुलांगु खँ न्यने नं। छिकपिं अजू चाइ। घाँय्घाँय् बजे। जि। दथुइ। ईया तःधंगु दुरी दइ। प्रत्यक्ष स्वापू गय् जुइफइ? छिकपिनि शंका पाय्छि जू। तर खँ मेगु हे दु ।

न्हू बजे। जिमि घाँय्घाँय् बाज्याया तिरिमय्जु। घाँय्घाँय् बाज्या उमेर वनेधुंकी। कलाः सी। काय। म्ह्याय्। छय्पिं। ग्वाःग्वाः। अय्नं मिसा म्हइ। ब्याहा याइ। ल्यासेम्ह। गाक्कं उमेर क्वंम्ह। काय-म्ह्याय्पिं स्वयां क्वकालिम्ह। छय्पिं ज्वःम्ह। छय् धाये ल्वःम्ह। घाँय्घाँय् बाज्याया न्हूम्ह कलाः जुइ। बाज्याया कलाः। सकसियां बजे जुइ। बाज्याया न्हूम्ह कलाः न्हू बजे जुइ। जन्मं यक्व स्वयां क्वं। कर्मं व थँ जुइ। जिं सिउबलय् न्हूबजे उमेर वनेधुकी। बुरि खनेधुंकी। तर न्हूबजे गबलें पुलां मजू। व सदां सकसियां न्हूबजे जुइ ।

न्हूबजेया काय मदु। म्ह्याय् छम्ह दइ। मचा छम्ह दयेकाः म्ह्याय् सी। मत्यवं थःगु हे न्ह्यःने। न्हू बजेया न्ह्यसुकाय दु। न्ह्यसुम्ह्याय्पिं दु। ब्याहा यानां छुं दँ लिपा बुरा सी। न्हूबजे विधवा जुइ। ल्यासे हे तिनि। बुराया कलाः जुयाः दुहां वइ। याकनं बैधब्य फइ। छखेर बुरा सी, मेखेर वया जीवनय् संघर्ष न्ह्याइ। अंश थयेगु खँ वइ। न्ह्यसुकाय् दु। खँ मिले जुइ मखु। ल्वापु पिहां वइ। अड्डां�अड्डां जुइ। अड्डां हे छिनफान याइ। न्ह्यसुकाय्लिसे स्वापू चबुइ। न्हूबजे याकःचा जुइ। याकःचा लाइ। मसीतले याकःचा जीवन हनी ।

न्हू बजे। जिमिथाय् वयाच्वनी। बहनीपाखेर तुकि छप्वाः ज्वना वइ। वनेत च्याकी। न्हू बजेया छेँय् बिजुली मदु। तुकिं हे मतया ज्या काइ। न्हू बजे वइ। जिपिं मस्त। प्यखेरं च्वने। पुलांपुलांगु खँ न्यने। न्ह्याइपुसे च्वनी। थःम्हं दुःखः सियागु खँ कनी। मिसा जात याकःचा। अड्डां�अड्डां वनागु। पुलांगु खँ प्वली। खँ ल्हाल्हां उत्तेजित जुइ। ....जितः दुःखः बिउगु ला इमिसं....लुम-लुमं जिगिजिगि खाइ। म्हुतु ल्हाइ ....

बुराचिया ब्याहा यानाः पार। याउँक त्वःता वन। दुःख जिं सिल.....। जिं फयागु दुःख ला....। पुतुपुतु हाली। हालागु चाइ मखु। जिपिं मस्त। न्हूबजेया खँ न्यने। फुक्क बाखं थें ताइ ।

न्हू बजे। ताःकाल म्वाइ। ताःआयु। स्वकः जंक्व याइ। न्हू बजेया छेँ दु। क्वथा बालं बी। आयस्ता वहे जुइ। खर्च-बर्च तरे याइ। जिमि कःसि न्ह्यःने। न्हू बजेया भुतू। जा थुयाच्वनी। थलबल चिचीग्वः। जा नइ। झ्यालय् च्वनी। वा कुली। न्हू बजेया दिनचर्या। स्वावलम्ब। वया बाध्यता जुइ। न्हूबजे मग्याः। याकःचा द्यनी। इलय्-ब्यलय् म्हं मफइ। तःल्वचं ग्वःमतू। मन बल्लाः। मन त्याकी। जिपिं मस्त खिउँथाय् वने ग्याः। हय्हय् काः वः थें जुइ। न्हू बजे जीवनभर याकःचा च्वनी। नइ। द्यनी। तुकि मतया भरय्। उबलय्। न्हूबजेया जीवन शैली खनाः जिपिं आश्चर्यचकित जुइ ।

न्हू बजे जक मखु। उबलय्या समाजय् न्हू बजे थेंज्याःपिं पात्रत मेमेपिं नं दु। खँ न्यने। ल्यासेबजे। कान्छीबजे। चि-बजे। न्हूबजे मार्काया बजेपिं। इमि बारे खँत पिहां वइ। न्यने। थुज्वःपिनि बुरातय् कलाः सी। हानं इहिपा याइ। ल्यासेपिं हइ। छय् धाये ल्वःपिं। दुत हइ। बुरा बाज्याया कलाः। बजे जुइ। ल्यासे जुइ। इमित ल्यासे बजे धाइ। कान्छीम्ह जुइ। कान्छीबजे धाइ। चीधिकःम्ह जुयाः वइ। चिबजे जुइ। मिजं-मिसा दथुइ यक्व बैंश पाइ। अनमेल विवाहया शिकार जुइ। गुलिसियां मचा दइ। गुलि मिसात निसन्तान जुइ। छम्ह पासां कंगु घटना लुमनी। बाज्याया ब्याहाया जन्त वनागु। भ्वय् नयागु। गफ थें च्वनी। तर व धात्थेंया खँ जुइ ।

बुरातय् मस्त दइ। "बुरापुसा"। मस्तय्त हायेकी। बुरापुसां खःपिं बजेपिनि मचा दइ। उलि दुःखः सी मखु। बुरापुसां मखःपिनि मस्त दइ मखु। थुज्वःपिनि जीवन स्वत्तु स्वइ। कठिन जुइ। समाजय् एकल जीवन हनेमाःपिनि दसुत अनेक दइ ।

ल्यासे बजे। साहुया कान्छी। उमेर वंकाः साहुं हःम्ह। ल्यासे हे तिति। भाःत सी। निसन्तान। व बछि थुवाः। तःभागया हकदार। मचाखाचा मदु। याकःचा लाइ। ल्यासे बजे। फुकीतसें मिखा तइ। तानातान याइ। ल्यासे बजे घडीया लंगुर थें गबलें उखे गबलें थुखे। अस्थीर। ल्यासे बजेयात लायेत स्वइ। चुलुम्ह न्या थें। वयात लाये फइ मखु। ....सम्पत्ति बछि थये हे माः। ल्यासे बजे अडिग जुइ। ...मचाखाचा मदु। छु यायेत? फुकीतय् तर्क जुइ। बाँडफाँडय् आलाताला जुइ। दँ दँ वनी। छेँ दुनी। स्यनी। सुनां दयेकेगु? फुकीत हीमी चाइ। ....ज्या मदुम्ह बुरां सीत्ययेका ब्याहा यात। याउँक सिनावन। ल्यासे बजे फुकीतय्त कं जुइ। कथुइ थाइ। न ल्ह्वये। न घुर्के। ...सी नं मफुम्ह बुरि। ...तंचाःपिं खने दइ ।

अनमेल ब्याहा। थौं उलि खने मदु। न्हून्हूपिं न्हूबजे। ल्यासे बजे। चिबजेत उलि सामान्य मजू। पुलांगु समाजय् अथे मखु। न्हूबजे। न्हूमां। चिबजे। ल्यासे बजे। दयाच्वनी। बुरापिनि कलाः जुइ। निदँ-प्यदँ ह्वनी। बिधवा जुइ। सम्पत्तिया खँ वइ। खिचिखिचि जुइ। ल्वापु जुइ। अड्डा अड्डां जुइ माली। एकल बजेपिनि जीवन बेठेगान जुइ। याकःचा लाइ। अय्नं म्वाइ। धर्मकर्म याइ। नखःचखः हनी। मन त्याकी। जंक्व याइ। मनोबल इमि लिधंसा जुइ।
थौं परिवारया संरचना हिली। अनमेल ब्याहाया खँ न्ह्यथनेम्वाः। नाकं बुरा जुइम्वाः। बुराया कलाः हे जुइम्वाः। निसन्तान जुइम्वाः। काय-म्ह्याय् दइ। छय्पिं दइ। फुक्क ठीक। ल्वापुख्यापु दइ मखु। तर प्रत्येक छेँ थौं न्हूबजेया थें शून्य खने दइ। झिझां दनी। फुक्क थःथःगु लँय्। बुराबुरि छेँय् निर्जन। जंगलय् थें एकान्तय् लाइ। म्हिगःया संरचना। थौं। दुनी। बिखण्डित जुइ। म्हिगःया न्हूबजेया सुनसान नियति। थौं। प्रत्येक छेँया नियति जुइ। न्हूबजेया झिझांदंगु जीवन शैलीया किचः। प्रत्येक छेँय् खने दइ।
बहनी जुइ। लोडसेडिङ ।

मत दइ मखु। प्यखेर खिउँसे अन्धकार। शून्य। मिखा तिसिइ। सघन अन्धकार। बिखण्डित जीवनया प्रतीक। बिम्ब। न्हूबजे। लुमनी। खुब लुमनी। तुकि जुयाः वया लुमंति अन्धकारय् पिलिपिलि च्यानाच्वनी ।

More Stories Like this