माओवादीया दस्ता निर्माण शुरु

गृह मन्त्रालय दावी यानाच्वंगु नं दस्ताया लागिं

येँ (सन्ध्या टाइम्स)/छुं जुयाः जेठ १४गते कुन्हु इलय् हे संविधान मवल धाःसा उगु इलय् जनविद्रोह याये मालेफु धइगु खँयात ध्यानय् तयाः उकिया तयारी यायेत माओवादीं हानं मेगु छगू लडाकु दस्ता तयार यायेगु अभियान शुरु याःगु दु। माओवादीपाखें आः नकतिनि हे उकिया बारे पिने जानकारी बिउगु खःसा आः अज्याःगु संगठन दयेकेगु ज्या नं न्ह्याके हे धुंकूगु दु
।
माओवादीं दयेकातःगु वाईसीएलया सैन्य संरचना भंग यायेमाः धकाः माग जुयाच्वंगु इलय् माओवादी उकियात हे हाथ्या बी कथं वाईसीएल स्वयां तःधंगु प्रकारया थ्व दस्ता दयेकेगु ज्या न्ह्याकूगु खः। थ्व दस्ताय् न्यागू लाख ल्याय्म्ह कार्यकर्तात दुथ्याकेगु खँ धाःगु दु ।

थ्व वाईसीएल थें अलग्ग निकाय धाःसा मजुइगु खँ धाःगु दु। थुकी विद्यार्थी, मजदूर व स्वयम् वाईसीएलपाखें नं ल्याय्म्हपिं कार्यकर्ता व नेतात काःगु दु। पार्टीया फुक्कं फाँटया मनूत तयाः दस्ता दयेकूगु कारणं थ्व जिम्मेवार जुइगु दावी माओवादीं याःगु दु। थ्व दस्ताया संयोजन यायेगु जिम्मा धाःसा माओवादीया ल्याय्म्ह पोलिट ब्युरो दुजः नेत्र विक्रम चन्द (विप्लव)यात बिउगु दु। विप्लव न्ह्याथे यानाः नं विद्रोह यानाः सत्ता कब्जा यायेमाः धइगु बिचाःयाम्ह नेता खः ।

माओवादीं थ्व दस्ताया नां आःया 'जन स्वय्म सेवक' धकाः नां बिउगु दुसा थ्व संगठनं आःया लागिं विकास निर्माणया ज्या तीव्र गतिं न्ह्याकी धाःगु दु। थ्व दस्तां आः तुरुन्त हे थीथी थासय् वनाः जनताया ज्या यानाः उमित सेवा बीगु, लँ, हिति आदि थेंज्याःगु विकास निर्माणया ज्या यायेगु, जनयुद्धया इलय् थःपिंसं हे ध्वस्त यानागु संरचना दयेकेगु व थीथी कथंया उत्पादनशील ज्याखँत याना वनेगु खँ धाःगु दु ।

थ्व दस्तायात नं क्लोज क्याम्पय् तयाः तालिम बीगु ज्या जुइ। तर उमित बीगु तालिम न्हापा थें शारीरिक कथंयागु जुइ मखु धाःगु दु। उमित खास यानाः जनताया दथुइ वनाः जनतायात यइगु ज्या गय् यानाः यायेगु व माल धाःसा जन विद्रोहलय् गय् यानाः कुहां वनेगु धइगु कथंया तालिम बीगु खँ धाःगु दु ।

भाजु विप्लवं थ्व संगठन निर्माणया खँ जुइसातकि हे मनूतय्सं उकिया विरोधय् टिप्पणी याना हःगु खँय् आपत्ति प्वंकुसें दकलय् न्हापां थ्व दस्तां याइगु ज्या स्वयेमाल, अले जक थुकिया आलोचन वा प्रशंसा याःसा जिउ धकाः धयादीगु दु ।

आःया लागिं थ्व संगठनं जनताया दथुइ च्वनाः ज्या याइ धाःसां थ्व वास्तवय् आन्दोलन जुल धाःसा जनतायात समेत क्वत हयाः उकियात तीव्रता बीगु रणनीति कथं थ्व दस्ता दयेकूगु खँ धाःगु दु। माओवादीं वर्तमान सरकारय् न्ह्याथे यानाः नं गृह मन्त्रालय माः धकाः जिद्दी यानाच्वंगु नं थ्वहे दस्तायात सशक्त यायेगु लागिं खः धकाः सूत्रं धाःगु दु ।