स्थानीय जनताया विरुद्ध माओवादी पुचः

माओवादीया भ्रातृ संगठनतय्सं हानं छक्वः स्वनिगःया स्थानीय जनता विरुद्ध ज्या यायेगु शुरु याना हःगु दु। आः नकतिनि हे वःगु समाचार कथं येँया १३ वडाय् लाःगु छगू गल्लिइ जबर्जस्ती बिजुलीया हाइटेन्सन तार तयेगु ज्याय् माओवादी समर्थित वाईसीएलया छुं कार्यकर्ता व उगु लागाया स्थानीय नेवाः जनताया दथुइ कचवं जूगु दु। बिजुलीया तार भूमि क्वं यंकेगु बांमलाःगु खँ ला मखु, वास्तवय् जुइ माःगु नं अथे हे खः। तर उगु लागाय् गुगु नियतं तार तयेगु ज्या जूगु खः, व धाःसा अवश्य नं बांलाःगु खँ मखु। छगू खालीगु जग्गाया च्वं वनाच्वंगु तारयात गल्लिया क्वं तयेगु उगु ज्या वास्तवय् तारया क्वय् लानाच्वंगु जग्गाया भाः थकायेत जक याःगु जुयाच्वन। थुकी उगु जग्गा दंक न्यानाः उकियात थिकयेक मीगु कुतः यानाच्वंपिं भूमाफियातय्गु नं ल्हाः दु धइगु खँ वःगु दु। वाईसीएलं भूमिया क्वं बिजुलीया तार यंकेगु थज्याःगु ज्या मेमेथाय् नं याना तयेधुंकूगु खःसा आः नं उकियात लसकुस याये फइगु खः। तर आः स्थानीय जनतां हे उकिया विरोध यानाच्वंगु कारणं वाईसीएलं उगु ज्या तत्काल हे दिकेमाःगु खः। थ्व स्वयां न्ह्यः गबलें माओवादी समर्थित मजदूर संगठन, गबलें विद्यार्थी संगठनतय्सं स्वनिगःया स्थानीय जनतालिसे अभद्र व्यवहार याःगु कारणं मुक्कं माओवादीयात हे मछिनीगु अवस्था सिर्जना जूगु खः। छुं ई दीधुंकूगु अज्याःगु हे व्यवहार आः हानं शुरु जुया वःगुलिं स्थानीय जनता आतंकित व आक्रोशित जुया वःगु दु। यदि उमिगु व्यवहार थथे हे जुयाच्वनीगु खःसा अज्याःपिं गृहमन्त्री मदयेकूगु ठीक हे जुल धाइपिं नं पिहां वःगु दु।थज्याःगु ज्यायात नियन्त्रण याये हे माः ।

More Stories Like this