देशभक्तत छप्पँ मजूसा देश बेहाल जुइ

डी.आर. खड.गी

झीगु जःलाखःला देय् भारत व चीनया स्वतन्त्रताया लागिं जनताया बलं क्रान्ति सफल यानाः क्यन। भारत सन् १९४७ सालय् ब्रिटिस उपनिवेशं मुक्त जुलसा चीन १९४८ य् जापान व अमेरिकाया अर्ध उपनिवेशं मुक्त जुल। झीगु देशय् नं भारत व चीनया स्वतन्त्रता लिपा निरंकुश राणा शासन विरुद्ध तच्वयेक जनआन्दोलन यानाः राणा शासन पतन यायेत सफल जुल। देशय् स्वतन्त्रता ला वल तर हाकनं देश भारतया उपनिवेशय् लात। नेपाः व भारतया नेतातय् दथुइ सन् १९५० सालय् शान्ति सम्झौता यानाः नेतात भारतया त्वं शरणय् वन। १९५० सालं
भारतलिसे शान्ति सम्झौता जुइधुंकाः उगु हे इलंनिसें न्हापा नेपालं कमे याना तःगु राष्ट्रिय छबि बुलुहुँ म्हो जुजुं वन। सन् ५० या सन्धियात आधार दयेकाः भारतं नेपाःया उत्तरी नाकाय् जिमिसं रक्षा याये धकाः भारतया फौज तये हल। उगु इलय् भारतया सेनां हिमाल व पहाडया जनतायात अतिकं दुःख बियाच्वंगु खः। उत्तरी सीमाया सुरक्षाया नामय् स्वनिगलय् हेड अफिस स्थापना यानाच्वंगु खः। दँदँ तक नेपालय् भारतया सेनां परेड म्हितेगु ज्या यात। नेपाली जनतां धाःसा स्व जक स्वयाच्वने माल। आखिरय् २०२७ सालपाखे प्रधानमन्त्री कीर्तिनिधि बिष्ट भारतीय सेनायात नेपालं लित छ्वयेत सफल जुल ।

शाहदेव जुजु खलःपाखें तानाशाही शासन चले यानाच्वंगु कारणं देश विकास मजुल, जनताया मौलिक अधिकार हनन् जुल धकाः २०४६ सालय् हाकनं काँग्रेस व कम्युनिष्ट मिले जुयाः तच्वयेक संघर्ष यानाः जुजुया बच्छि अधिकार कायेत सफल जुल। २०४६ सालया जनआन्दोलनं वःम्ह सरकारं नं देश विकास मयायेगु जक मखु देशया उद्योग व्यवसाय फुक्क धइथें ध्वस्त याना बिल। २०४६ साल न्ह्यः हे भारतयात कोशी व गण्डकीया लःया अधिकार बियातये धुंकूगु खः। कोशी, गण्डकी व कर्णालीया लः उपयोग याना: बिहार, यू.पी., उत्तराञ्चल व पश्चिम बंगालया भूमि हराभरा जुयाच्वंगु दु तर नेपाःया भूमि धाःसा मरुभूमि जुजुं वनाच्वंगु दु। २०४६ सालया जनआन्दोलनं भारतयात नेपाःया जलश्रोत जक बियां मगानाः हाकनं भारतया नागरिकयात नेपाःया नागरिकता बीगु कुतः तकं खसब्रम्हू नेतातय्सं यानाच्वंगु खः। खसब्रम्हू नेतात भारतपरस्त जुयाः हे नेपाःया अस्तित्व खतम यायेत लगे जूगुलिं हाकनं जुजु ज्ञानेन्द्रं शक्ति थःगु ल्हातय् कायेगु ज्या यात। जब जुजु ज्ञानेन्द्रं शक्ति थःगु ल्हातय् लाकल हाकनं खसब्रम्हू नेतात दिल्ली वनाः १२ बुँदे सम्झौता धकाः जुजुया शक्ति क्वपालेत जनआन्दोलन शुरु याः वल। २०६३ सालया जनआन्दोलन सफल यायेगुली भारतया तःधंगु ल्हाः दुगुलिं याउँक हे जुजुया शक्ति क्वपाले फुगु खः। जब जुजु शक्तियात माइनस यायेत सफल जुल उगु इलय् भारतपरस्त नेतात भारतयात लय्तायेकेत अत्यधिक बिहारीतय्त नेपाःया नागरिकता बीगु विधेयक पास यात। अथे हे मधेसीतय्त फुक्क हे पार्टीं देय्या उच्चपदय् विराजमान याकेमाःगु शर्त नं पूरा यात। थ्व संविधानसभाय् मधेसीत यक्व दुगु नं थुकिं यानाः हे खः। मधेसीतय्सं नेपाःया फुक्क ज्याकू नियन्त्रणय् तयेगु लागि धमाधम मधेसीतय्त रोजगारी बिया यंकाच्वंगु दु। मधेसीतय्सं तराईया सम्पूर्ण भू-भाग कब्जा यायां वनाच्वंगु दु। आः बुलुहुँ स्वनिगः कब्जा यायेत स्वयाच्वंगु खनेदु ।

देशभक्त बुद्धिजीवीतय्सं सन् ५० या देशघातक सन्धि स्वयां नं १२ बुँदे सम्झौता देशया लागि खतरनाक जुयाच्वंगु खँ धयाच्वंगु दु। १२ बुँदे सन्धिया कारणं देय् कि सिक्किम जुइफु कि फिजी जुया वनेफु धकाः अनुमान याना तःगु दु। मधेसी नेतात ला खुल्ला रुपं हे भारतया स्वार्थ पूरा यायेत जक राजनीति यानाच्वंपिं जुल। मधेसी नेतात स्वयां खसब्रम्हू नेतात नं कम मजू। इपिं नं भारतया स्वार्थ पूरा यानाः थःगु स्वार्थ ज्यंकेत जक राजनीति यानाच्वंपिं खः धइगु खँ प्रस्ट जुयाच्वंगु दु। छाय्धाःसा २०६३ या आन्दोलन सफल जुइ धुंकाः न्हापा थें भारतया सुरक्षा फौज एयरपोर्टय् तैनाथ याना तःगु दु। थुलि जक मखु गृह मन्त्रालय, परराष्ट्र मन्त्रालय व रक्षा मन्त्रालयय् नं भारतया एजेण्टतय्त निगरानी यायेगु स्वीकृति बियातःगु दु। भारतं नेपाःया नेतातय्त लोभ लालच बियाः थःगु ईशाराय् प्याखं हुइकाच्वंगु मुख्य कारण थ्वहे खः। भारतया ग्रायन्ड डिजाइन दुने लानाच्वंगु नेपाःयात सन् २०२० दुने सिक्किम अथवा फिजीया अवस्थाय् हयेगु भारतया ग्वसाः दु।
भारतया रणनीतियात अमेरिकां अप्रत्यक्ष रुपं ग्वाहालि यानाच्वंगु दु। भारतया स्वार्थ नेपाःया भूमि कब्जा यायेगु खःसा अमेरिकाया स्वार्थ 'फ्रि टिबेट' या लागि भारतयात प्रयोग यायेगु खः। विदेशी भक्त नेतातय्गु उद्देश्य धइगु देशया सम्पत्ति लुटे यानाः जक मगानाः देशभक्त जनतायात नं माइनस यायां वनेगु खः। २०५२ सालय् मदन भण्डारीयात नं देशभक्त अडान कयाच्वंगु कारणं हत्या तकं यानाः बिल। बामपन्थी नेतात पद्मरत्न व हिरण्यलाल श्रेष्ठयात नं अतिकं देशभक्त जुल धकाः बाम राजनीतिया किपां माइनस याना बिल। सीमा विज्ञ बुद्धि नारायण श्रेष्ठयात नं सीमा सम्बन्धी वैज्ञानिक नक्सा प्रस्तुत यात धकाः हाकिम पदं हट यानाबिल ।

थौंकन्हय्या ताजा घटना खः नेपाल वायुसेवा निगमया कार्यकारी अध्यक्ष सुगतरत्न कंसाकारयात याःगु कारवाही। दक्षिण एशियाया हे सक्षम व इमान्दार प्रशासक धकाः चर्चा जुयाच्वंम्ह कंसाकारं स्यना वनाच्वंगु दुरसंचारयात सुधार यानाः पाय्छि थासय् हया बिल। तसकं खराब हालतय् लानाच्वंगु एनएसीयात सुधार यायां यंकाच्वंगु इलय् निगः एयरबस न्यायेत बिउगु बैनायात भ्रष्टाचार यात धकाः द्वपं बियाः मुद्दाय् फँसे याना बिल। संसारं सिउगु खँ खः एयरबस न्यायेगु मखुसा बैना लित काः वाः धायेक-धायेक चांचां षड्यन्त्र यानाः खसब्रम्हू व मधेसी न्यायाधीसं फँसे यानाः जेलय् तक कुना बिल। यदि कंसाकारया थासय् खसब्रम्हू अथवा मधेसी जूगु खःसा वयात तारिफ यानाः राज्यं सिरपाः हे बी धुंकल जुइ तर कंसाकार नेवाः जूगुलिं वयात स्वदेशी व विदेशी माफिया शक्ति छप्पँ जुयाः षड्यन्त्रय् फँसे याना बिल ।

drkhagdi@gmail.com

More Stories Like this