किसुनजीपाखें सयेकेमाःगु आदर्श

नेपाली राजनीतिया छगू कालखण्ड पूरा हे थःगु नेतृत्वय् न्ह्याकेत ताःलाःम्ह कृष्णप्रसाद भट्टराईया निधनं मुक्कं देय् शोकाकुल जूगु दु। खास यानाः २०६२-६३ या आन्दोलनय् राजतन्त्र चीके मजिउ धकाः न्ववाःगु कारणं भट्टराई तसकं आलोचित जुयादीगु खः। तर उगु इलय् राजतन्त्र चीके मजिउ धकाः वय्कलं गुगु तर्क तयादीगु खः उकियात धाःसा थौ नं सुनां नं काटे याये मफुगु मुलुकया विडम्बना जुयाच्वंगु दु। वय्कःया बिचाः खः, देशय् राजतन्त्र दत्तले मुलुक सुयां उपनिवेश जुइ मखु, जुजुं थःगु व्यक्तिगत स्वार्थया लागिं जकसां देय्या सार्वभौमसत्ता बचे याना तइ। वय्कःया अनुमान खः, मुलुकं राजतन्त्र चिला वनेसातकि थ्व देय्या स्वतन्त्र अस्तित्वय् संकट वइ। थौं देशय् राजतन्त्र मदयेधुंकाः वय्कलं अनुमान याः कथं हे मुलुकया स्वतन्त्र अस्तित्वय् हे संकट वयाच्वंगु दु ।

राजतन्त्र मदयेधुंकाः मुलुकया नेतृत्व काये माःपिं नेतात फुक्क हे भारतपरस्त जुया बिउगु कारणं थौं देश भारतया इशारा मदयेक छपलाः तक हे न्ह्यःने वने मफुगु अवस्थाय् थ्यंगु दु। थुकिं सी दु, किसुनजीया खास चिन्ता जुजुया अस्तित्व मखु, मुलुकया अस्तित्व खः। जुजु मदये सातकि थ्व देशय् भारतं गज्याःगु मिखा तइ धइगु खँ वय्कलं सखे बांलाक हे सिउ। उकिं हे वय्कःपाखें अज्याःगु अभिव्यक्ति वःगु जुइफु। उकिं आः धाथें हे किसुनजीया म्हगस पूवंकेगु खःसा मुलुकय् वयाच्वंगु थ्व संकटयात ज्यंकेगु कुतः जुइमाः। पदय् च्वनां नं तुयुगु वसः गथे यचुका तयेगु धइगु नैतिक आदर्श ला नेपाली राजनीतिज्ञतय्सं किसुनजीपाखें मसयेकुसें हे मगाः। मखुया वय्कःयात श्रद्धांजली प्वंकेगु नैतिकता नं वय्कःपिंके दइ मखु ।

More Stories Like this