चिकित्सकतय् अन्तिम कुतः
बैठक स्थगित यानाः नेकां नेतात अस्पतालय्
येँ (सन्ध्या टाइम्स)/पुलांम्ह प्रधानमन्त्री लिसें नेपाली कांग्रेसया पुलांम्ह सभापति कृष्णप्रसाद भट्टराईया अवस्था थौं अझ हे स्यना वंगु दुसा वय्कःया स्वास्थ्यय् छुं 'चमत्कारपूर्ण' सुधार जुइ ला धइगु आशां चिकित्सकतय्सं अन्तिम कुतः यानाच्वंगु दु ।
स्वास्थ्यस्थिति थथे हे धाये मफइगु अवस्था वःगुलिं वय्कः भर्ना यानातःगु थापाथलीया नर्भिक अस्पतालं वय्कःया स्वास्थ्यस्थिति बारे आः हरेक घण्टाय् जानकारी बीगु खँ धाःगु दु। अस्पतालं थौं हे छगू पत्रकार सम्मेलन नं सःतूगु दु। चिकित्सकतय्सं धाः कथं वय्कःया म्हया सम्पूर्ण हे महत्वपूर्ण अंगतय्सं ज्या यायेगु त्वःतेधुंकूगु दुसा चिकित्सकत थःपिनि धर्म त्वःते मजियाः अन्तिम ई तकं प्रयासरत जुयाच्वंगु दु। वय्कःया स्वास्थ्यस्थिति बारे सहलह यायेत थौं चिकित्सकतय् विशेष बैठक नं च्वंगु दु ।
उखे वय्कःया स्वास्थ्यस्थिति धमाधम स्यनावनाच्वंगु कारणं नेपाली कांग्रेसं थौं सःतातःगु थःपिनि केन्द्रीय कार्यसमितिया बैठक नं स्थगित याःगु दु। बैठक स्थगित यानाः सभापति सुशील कोइराला नापं सकलें केन्द्रीय दुजःत नर्भिक अस्पतालय् वनाः वय्कःया स्वास्थ्य सुधारया लागिं अस्पताल कम्पाउण्डय् च्वंगु देगलय् मंकाः प्रार्थना याःगु दु। कांग्रेस नेतातय्त अस्पतालया चिकित्सकतय्सं भट्टराईया लिपांगु स्वास्थ्यस्थिति बारे जानकारी बिया हःगुलिं बैठक स्थगित यानाः वय्कःपिं अस्पताल थ्यंगु खः ।
नर्भिक अस्पतालय् छुं नं इलय् दुःखया समाचार वयेफु धकाः आपालं नेता कार्यकर्ता व सर्वसाधारण मनूत मुनेधुंकूगु दु ।
