जनता स्वय्म न्यायाधीश खः

नरेशवीर शाक्य

छगू इलय् नेपाःयात सतीं सराः बियाथकूगु देय् धकाः चर्चा जुइगु याः। सुयातं भिं याइपिं मनूत थन न्ह्याबलें दण्डित जुइगु याः धयागु खँ नेपाःया इतिहासयात अध्ययन यायेबलय् नं खंके फइ। सती प्रथा छगू इलय् हिन्दू धर्मया अभिन्न ब्व थें जुयाच्वंगु खः। हिन्दू धर्मया अनुयायीतय्सं थःपिनि धर्मया बः कयाः जूसां थःपिनिगु उत्पीडनयात थाय् बिया हे तःगु दनि। थम्हं स्वयां भिंगु व बांलाःगु ज्या मेपिंसं यात धाःसा उकियात सह मयायेगु व अज्याःगु ज्या याइपिनिगु हौसला हे क्वथुनेगु निंतिं न्ह्याथेंजाःगु षडयन्त्र नं यायेगु चलन आः जक मखु न्हापांनिसें हे न्ह्याना वयाच्वंगु दु। चाहे व कालिन्चोकया मूर्ति दयेकूम्ह मनूया ल्हाः त्वाथलेगु ज्या थजुइमा वा देय्या आर्थिक स्थिति सवल यायेगु निंतिं न्ह्यावःम्ह नेपाल वायुसेवा निगमया कार्यकारी अध्यक्ष सुगतरत्न कंसाकार हे थजुइमा।
नेपाल वायुसेवा निगम (नेवानि) या निलम्बित कार्यकारी अध्यक्ष सुगतरत्न कंसाकारयात आः हवाईजहाज न्यायेत छ्वःगु लकअप मनी भ्रष्टाचार जुल धयागु अख्तियार दुरुपयोग अनुसन्धान आयोगं (अदुवा) विशेष अदालतय् तःगु भ्रष्टाचार सम्बन्धी मुद्दाय् माग याःकथं जमानी तये मफुगु कारणं हिरासतय् तयातःगु दु। अदुवाया धापूकथं कार्यकारी अध्यक्ष तुलाधरं फ्रान्सया एअरबस कम्पनीयात निगः जहाज न्यायेगु निंतिं बिना पूर्व तयारी मदयेक ५ करोड ५० हजार दां लकअप मनीकथं छ्वल धयागु दु। एअरबस कम्पनीयात प्रारम्भिक सम्झौताकथं इलय् दां पुलेत माःकथं ब्यवस्था मजूगु व आः इलय् दां पुले मफुत धाःसा थ्व सरकारया लकअप मनी डुबे जुइ फइगु कारणं थुकिया क्षतिपूर्ति जुइकथं ६ करोड तका धरौटी सुगतरत्न कंसाकारं ब्यक्तिगत रुपं पुलेमाःगु निर्णय विशेष अदालतं याःगु खनेदत ।

विशेष अदालतया थ्व फैसला बदनीयतपूर्वक जूगु खँ आपालं मनूतय्गु बिचाः दु। नेवानिया कार्यकारी अध्यक्ष भाजु तुलाधरया बिचाः कथं थ्व फुक्कं ज्या निगमयात जीवन्त यायेगु निंतिं हे जूगु खः। नेपाः सरकारं हवाइजहाज न्यायेगु निर्णय यायेवं अन्तर्राष्ट्रिय बजारय् हवाईजहाज न्यायेगु प्रक्रिया न्ह्याकूगु इलय् एअरबस कम्पनीया वाइड बडी व न्यारो बडीया निगः जहाज २ अरब तका दंक लाःगु कारणं थुगु कम्पनीलिसे जहाज न्यायेगु सहमति जूगु खः। लिसें थ्व जहाज आः न्ह्यानाच्वंगु पर्यटन वर्ष शुरु जुइ न्ह्यः हे नेपालय् थ्यनीगु कारणं थुकिं नेपाःया अर्थतन्त्रयात नं तःधंगु तिबः जुइगु कारणं थ्व प्रक्रिया न्ह्याःगु खः।थुकिं राष्ट्रयात फाइदा जुइगु कारणं छम्ह कर्मचारी थःगु निगमयात यायेमाःगु हितयात ध्यानय् तयाः ज्या जूगु दावी यानादीगु दु। तर थ्व सम्पूर्ण ज्यां कर्मचारीतन्त्र दुने भुखाय् ब्वयेका बिल। नेवानिं हवाईजहाज न्यायेगु वा बालं कायेगु धकाः निगू दशक न्ह्यवंनिसें कुतः जुयाच्वंगु खःसां सुनां नं सफलता ल्हातय् लाके मफयाच्वंगु इलय् छम्ह नेवाः कर्मचारीं थज्याःगु साहसिक ज्या यानाः सफल जुइन धयागु खँयात कयाः थनया अर्थ मन्त्रालय हे विपक्षय् वंगु धइगु खँ सम्बन्धित मनूतय्गु दु। नेवानिया कार्यकारी अध्यक्ष कंसाकार न्हापा नेपाल दूरसंचार संस्थानया नेतृत्व कयाः नेपाःया संचार सेवायात विश्वस्तरय् थ्यंकाः अझ व्यवसायिक रुपं ताःलाकेत सफल जूम्ह कुशल प्रशासक खः। वय्कःया कुशल नेतृत्वयात देय्या मेपिं प्रशासनिक कर्मचारीतय्सं सह मयानाच्वंगु खँ नं आः चर्चाया विषय जुयाच्वंगु दु ।

नेपाः सरकारया असहयोगया कारणं थ्व जहाज न्यायेगु ज्या आः असफल हे जुइथें च्वनेवं फ्रान्सया एअरबस कम्पनीं नेवानिया लकअप मनी लित बीगु धकाः बचं बीधुंकूगु दु। थुकिं यानः नेपाः सरकारयात अनेक कथं घाटा जुइगु निश्चित जुयाच्वंगु दु। हवाइजहाज मदयेकं नेवानि संचालन जुइ फइगु आः सम्भव मदयेधुंकूगु दुसा आः अज्याःगु हे जहाज न्यायेत नेपाः सरकारं २ अर्ब स्वयां अप्वः दां द्यापं च्वने मालीगु निश्चित दु। हवाईजहाज निर्माता कम्पनीं थ्व ईया दुने निकः जहाजया भाः थकायेधुंकूगु दु। न्हूगु भावं जहाज न्यायेगु हे खँ वःसां हवाई जहाज डेलिभरी कायेत न्हापा स्वयां अप्वः ई पियाच्वने मालीगु अवस्था दु। अझं आःया थ्व विवादं सु नं कर्मचारीं हवाइजहाज न्यायेगु प्रक्रिया न्ह्याकेगु आँट हे नं याये फइ मखु। यात हे धाःसां नेपाःया प्रशासनय् दयाच्वंगु कचवंया कारणं सुं नं हवाई कम्पनीं आः नेपालं हवाई जहाज न्याइ धकाः पत्याः तकं याये थाकुइ ।

छखे नेवानिया कार्यकारी अध्यक्षयात नियोजितरुपं षडयन्त्रय् लाकाः जेलय् कुनेगु ज्या जुयाच्वंगु दुसा अनावश्यक प्रशासनिक ज्याया कारणं मुलुकयात धन जक मखु विश्वासया संकटय् तकं हयाः देय्या बेइज्जत यायेगु ज्या आःया वर्तमान प्रशासनिक हाकिम व सत्ताय् च्वनाच्वंपिं मनूतय्सं यानाच्वंगु दु। थ्व राष्ट्रयात बदनाम यानाच्वंपिंत सुनां कारवाही यायेगु व गज्याःगु कारवाही यायेगु खः, आः थुकिया बारे नं छलफल जुइमाःगु दु। थःगु जिम्माय् दुगु निगमया भिं यायेत न्ह्यचिउम्ह छम्ह कर्मचारीयात सम्पूर्ण प्रशासन हे लगे जुयाः कारवाही यायेगु ज्या जुल, आः मुलुकयात अर्बौं तकाया नोक्सानी याःपिंत नं बिगो कथं धरौटी कायेगु ज्याया पहल जनतां न्ह्याकेमाः। राष्ट्रयात नोक्सान याके बीपिं मनूत नं अपराधी हे खः, चाहे व प्रशासनया लिधंसाय् जूगु जुइमा वा नियतवश जूगु जुइमाः। थुकी जनतां सः तयेमाः। छाय्धाःसां जनता स्वय्म नं न्यायाधीश खः ।

nshakya@gmail.com

More Stories Like this