सरकारय् मवँसें मगाःगु माओवादीया बाध्यता

अन्ततः माओवादीं झलनाथ खनालया सरकारय् वनेगु धकाः निर्णय याःगु दु। सरकारय् च्वंगु वनेगु माओवादीया थ्व निर्णय वास्तवय् 'नखाउँ भने दिनभरिको शिकार...' धाधां ल्हातय् वःम्ह शिकारया भोजन यायेगु बराबर खः। झलनाथ खनालयात प्रधानमन्त्री दयेकेगु तक ला माओवादीया विजय जुयाच्वंगु खः, तर थःपिंसं दयेका बियागु सरकारय् थथे थः हे लाचार जुयाः समावेश जुइमाःगुली धाःसा सरकार विरोधी नेपाल-ओली गुट विजय जूवंगु दु। माओवादीं ७ बुँदे सहमतियात कयाः एमालें याःगु व्याख्या स्वीकार मदु व गृह मन्त्रालय थःपिंत हे माः धइगु शर्त तःगु खः। एमालें थ्व निगुलिं शर्त स्वीकार मयाः। तर थःपिनि शर्त स्वीकार मयाःसां अन्ततः शर्त नं त्याग यानाः माओवादी सरकारय् समावेश जू जुल। थ्व सरकारय् समावेश जुइगु माओवादीया रहर मखु बाध्यता खः। यदि थुकी थःपिं सहभागी मजुल धाःसा थ्व सरकार कमजोर जुइ। सरकार कमजोर जुइसातकि प्रधानमन्त्रीं मचायेक हे नेपाल-ओलीया बः काः वने माःगु अवस्था वइ गुगु माओवादीया लागिं हितकर जुइ मखु। उकिं प्रधानमन्त्रीयात अज्याःगु अवस्थापाखें पनेत जक जूसां माओवादी सरकारय् वनेमाःगु बाध्यता दु। गन तक गृह मन्त्रालयया सवाल दु, थ्व मन्त्रालय मेपिं सुयातं मबिसे प्रधानमन्त्रीं हे तयेगु धाःगु नं माओवादीया लागिं बांलाःगु मखुसा बांमलाःगु नं मखु। प्रम खनाल माओवादीया पक्षय् दत्तले गृह मन्त्रालय नं परोक्ष रुपं माओवादीया हे ल्हातय् दु धाःसां जिउ। अथे खःसां सरकारयात ज्या याये अःपुगु अवस्था ला पक्का नं मदु। निगू दलया 'टिम वर्क' हे आःया मू आवश्यकता खः ।

More Stories Like this