'कंसाकार प्रकरण इमान्दार नागरिकत प्रति जूगु षड्यन्त्र'
नेपाल वायु सेवा निगमया निलम्बित कार्यकारी अध्यक्ष सुगतरत्न कंसकार विरुद्ध जूगु कावरवाही देय्या दक्वं इमान्दार मनूत प्रतिया षड्यन्त्र जूगु खँ थीथी ख्यःया मनूतय्सं धाःगु दु ।
न्यायका लागि नागरिक संघर्ष समिति थौं येँया रिपोटर्स क्लबय् ग्वसाःग्वःगु पत्रकार सम्मेलनय् सभासद् तिर्थराम डंगोलं पृथ्वीनारायण शाहया पालं निसें देशय् इमान्दार मनूतय्त षड्यन्त्र जुयाच्वंगु धासें थुकिया निरन्तरता कथं थौं कंसकारयात कारवही जूगु धयादिल । वय्कलं वर्तमान सरकारया न्हापांगु मुँज्या कंसाकार विरुद्धया मुद्दा लितकायेत नं माग यानादिल ।
नेकपा (एमाले)या केन्द्रीय दुजः कृष्णगोपाल श्रेष्ठं नं न्हूगु सरकारया न्हापांगु मुँज्यां कंसाकार विरुद्धया मुद्दा लितकायेमाःगु धयादिसें कंसाकारयात जूगु कारवाही थन बांलागु ज्या याये चाहे जूपिं सकसियां निंतिं हाथ्या जूगु धयादिल । 'देशय् बांलागु ज्या याये चाहे जूपिं मनूतय्त यदि छिमसं बांलागु ज्या यानाच्वंसाः छिमिगु हालतं नं कंसाकारया थें जुइ धकाः क्यनेत स्वःगु खः', वय्कलं धयादिल ।
अथेहे मानव अधिकारकर्मी मल्ल के. सुन्दरं कंसाकारं भ्रष्टाचार याःगु मखु धकाः स्वंगू आयमं पुष्टि यायेगु आधार दुगु धयादिल । तत्कालीन प्रधानमन्त्री माधवकुमार नेपालं 'यु ग्वो अहेड' धकाः निर्देशन बीधुंकाः जक कंसाकारं थुगु पलाः ल्ह्वंगु, एयरबसं बैन लितबी धायेधुंकूसां विशेष अदालतं 'बैना लितवइगु आधार मखंगुलिं' धकाः जेल चालन याःगु व वायु सेवा निगम दुनेया हवाफ माफिया कमिशनया खेल थज्याःगु स्वंगू खँ कंसाकार भ्रष्टाचारी मखुगु धकाः पुष्टि यायेगु आधार दुगु धयादिल ।
पत्रकार सम्मेलनय् संघर्ष समितिया कजि सुजीव बज्राचार्यं सुनियोजित षड्यन्त्र मार्फत कंसकारयात फसे यानाः नेपाल वायु सेवा निगमयात हे डुबे यायेत तत्पर भ्रष्टतत्व विरुद्ध अबिलम्ब कानुनी करवाही यायेत माग यानादिल ।
ज्याझ्वलय् सभासद्त दिलिप महर्जन, बुद्ध साय्मि, वायु सेवा निगमया कर्मचारी संगठनया नायः टारनिनाथ दाहालं कंसाकारयात वाइज्जत रिहा याये माःगु माग यानादिल ।
Related Stories
कंसाकार विरुद्धया मुद्दा षड्यन्त्रमूलक : जागरण मञ्च कंसाकार जेल चलान कंसाकारयात कारवाही विरुद्ध नेवाःत सतकय् सुगतरत्नया समर्थनय् जुलुस कंसाकार विरुद्धया कारवाही खारेज यायेत नेवाःतय् माग कंसाकारया पक्षय् संघर्ष यायेत समिति गठन फ्रान्सया एयरवस कम्पनीं बैना लितबिल नागरिक संघर्ष समितिपाखें सुगतरत्न कंसाकारयात हनMore Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
