गन सुगतरत्न, गन भ्रष्टाचार

सुरेश मानन्धर

नेपाः वास्तवय् दयेके हे मफयाः स्यनाच्वंगु देश मखु। देश दयेके धकाः वइपिं सुयातं दयेके हे मबियाच्वंगु कारणं जक थ्व देश स्यनाच्वंगु खः धइगु खँ हानं छक्वः पुष्टि जुल। सुगतरत्न कंसाकारयात भ्रष्टाचारया द्वपं बियाः याःगु कारवाही थुकिया दकलय् लिपांगु दसु खः। कंसाकारयात याःगु थ्व कारवाहीया सम्मानपूर्ण निकास मलुइकल धाःसा नेपाःमि जनतां थःपिनि डायरीइ थुलि खँ स्पष्ट हे च्वःसां जिल कि आः थ्व देशया कल्याण स्वयम् पशुपतिनाथ हे वयाः याः वंसां नं सम्भव मदु ।

देशया राष्ट्रिय ध्वजावाहक संस्थाया लागिं जहाज न्यायेगु धकाः न्ह्याकूगु प्रक्रियायात हे भ्रष्टाचार धइगु द्वपं बियाः याःगु थ्व प्रकरणं छता मखु तःता हे न्ह्यसः थना बिउगु दु। दकलय् न्हापां ला थ्व भ्रष्टाचार धाःगु छु, उकिया व्याख्याय् हे प्रश्न दंगु दु। थः च्वनाच्वंगु ओहोदाया दुरुपयोग यानाः सुनां नं व्यक्तिगत लाभ जुइ कथं ज्या यात धाःसा उकियात हे भ्रष्टाचार धाइगु खः। नेवानिपाखें जहाज न्यायेगु धकाः याःगु थ्व प्रक्रियाय् सुगतरत्न कंसाकारं गनथाय् व्यक्तिगत लाभ प्राप्त यात? गुलि व्यक्तिगत लाभ यात? थुकिं वय्कलं कमिशन नःगु प्रमाण लुल लाकि? घुस काःगु दसि पत्ता लगे जुल लाकि? यदि मजूगु खःसा थ्व गय् यानाः भ्रष्टाचार जुल?

सर्वोच्च अदालतं नकतिनि छगू सकसियां ध्यान वनीगु निर्णय याःगु दु - संविधान दयेके सिमधःतले संविधानसभा भंग जुइ मखु। संविधानसभा ला निदँ लिपा हे भंग जुइमाःगु खः। तर सर्वोच्चं जुइ मखु धाल। उकिया कारणय् सर्वोच्चया तर्क दु, थ्व देशया आवश्यकता खः ।

आः झीसं वहे न्यायाधीशतय्के न्ह्यसः न्यने, सुगतरत्नं न्यायेत्यंगु जहाज चाहिं देशया आवश्यकता खः लाकि मखु? यदि आवश्यकता मखु धइगु खःसा नेवानि धाःगु संस्था बन्द यानाः उकियात जहाज मखु ट्याम्पु चले याइगु निकाय दयेका छ्वःसां जिल। यदि आवश्यकता खः धइगु जूसा थ्व मामिलाय् जक संविधानसभाया थेंज्याःगु फैसला छाय् मजुल? थथे छगू हे प्रक्रियाया निगू मामिलाय् निता हे फैसला न्यंकीपिं न्यायाधीशतय्त भ्रष्टाचारी धायेगु लाकि मधायेगु?

आर्थिक रुपं थौं नेपाः थुलि ध्वस्त जुइधुंकल कि आः थन सम्भावना दनिगु क्षेत्र धइगु पर्यटन छगू हे जक खः। उकियात हे तिबः बी कथं राज्यं पर्यटन वर्ष हनाच्वंगु दु। थ्व पर्यटन वर्षयात सफल यायेगु खःसा नेपाःया थःगु हे विमान दयेमाःगु खँय् व्यवसायीतय्सं बः बियाच्वंगु दु। थज्याःगु अवस्थाय् नं नेपाःयात थःगु हे विमान आवश्यकता मदु धकाः सुनां नं धाइसा व ति राष्ट्रघाती मेम्ह सु दइ?

मनूतय्सं धायेगु याः, सुगतरत्नयात याःगु थ्व कारवाही तसकं सुनियोजित खनेदु। खये नं फु। छाय्धाःसां उकियात पुष्टि याइगु आपालं दसित झीगु न्ह्यःने दु। सुगतरत्नया मुद्दा अदालतय् वंगु ला लांलां हे दयेधुंकल। तर उकिया फैसला थौं थज्याःगु इलय् वयाः याना बिल गुगु इलय् देशय् सरकार दुसां मन्त्रालय स्वइपिं मन्त्रीत मदु। नागरिक उड्डयन लगायत गुगुं हे मन्त्रालयय् मन्त्रीत मदुगु इलय् आकाझाकां वय्कःयात जेल चलान यायेगु फैसला जुल।थ्व सुनियोजित मखुसा मेगु छु खः?

वय्कःयात भ्रष्टाचारया द्वपं बियाः कारवाही यायेमाः धकाः सिफारिस याःम्ह अख्तियारया कर्मचारी भगवति काफ्ले सु खः? काफ्लें छुं ई न्ह्यवंनिसें पर्यटन मन्त्रालयया सचिव जुइत स्वयाच्वंगु खः। तर पूर्व प्रधानमन्त्री माधव नेपालं वयात सचिव मदयेकू। उकिया हे तमं काफ्लें निगमयात असफल यायेत जहाज न्याके मबीगु लागिं भ्रष्टाचारया मुद्दा चले याःगु खः। सीदु कथं काफ्लेया लिउने मुख्य सचिव माधव घिमिरया नं ल्हाः दु। घिमिरे नं न्हापा पर्यटन सचिव जुइधुंकूम्ह खः। वयागु पालय् नं जहाज न्यायेत स्वःगु खः। तर हये मफुत। थम्हं हये मफुगु जहाज मेपिंत नं हयेके मबीगु लागिं घिमिरें पालिंनिसेंया बः पिकयाः अख्तियारयात छ्यःगु खः। अख्तियारयात वैधानिक रुपं बः बीगु ज्या संसदया सार्वजनिक लेखा समिति धाःगु ब्रोकर टाइपया निकायं याःगु खः। उकी नं समितिया दुजः ह्दयेष त्रिपाठी दकलय् सक्रिय जूगु जुयाच्वन। त्रिपाठी मर्स्यातय् पार्टी तमलोपाया दुजः जुल। उखे पर्यटन मन्त्री जुयाच्वंम्ह शरतसिंह भण्डारी मर्स्यातय्गु हे मेगु पार्टी फोरम (लोकतान्त्रिक) या दुजः जुल। निगू मर्स्या पार्टीतय् ल्वापुं नं नेवाः सुगतरत्नयात बलि दयेकूगु खनेदु ।

थुखे नेपाल वायुसेवा निगमय् सुगतरत्नया प्रतिद्वन्द्वी जुयाः पिलू वःम्ह केबी लिम्बु वास्तवय् जहाज न्यानाः कमिशन नये दइ धकाः हे लखौं तलब वइगु पाइलट जागिर त्वःताः ३०-४० द्वःया प्रवन्धक जागिर नःवःम्ह खः। तर सुगतं वयात पना बीवं वं सुगत विरुद्ध जेहाड हे छिडे याना बिल। वयागु लिउने एमालेया पुलांम्ह मन्त्री पृथ्वी सुब्बा गुरुङ्ग व सभामुख सुभाष नेम्बाङ समेत लगे जूबलय् राजनीतिक रुपं निरपेक्ष सुगतरत्नं छुं हे याये मफुगु अवस्था वल ।

निःसन्देह थ्व कारवाहीया लिउने देशय् भिंगु ज्या याये धाइपिं मनूतय्त न्ह्याथे यानाः नं पनीपिं राष्ट्रघाती तत्वत लगे जूगु दु। सुगतरत्न उकिया हे शिकार जूगु खः। सुगतरत्न छुं याये फुम्ह मनू खः धइगु खँ वय्कलं नेपाल टेलिकमय् च्वंबलय् क्यने धुंकल। उकिं वय्कःयात चुइँक्क तक हे हालेगु अवसर मबिसे 'स्याबोटेज' यायेत जेल चलान व ६ करोड धरौटी थ्यंकया कडा सजाँय न्यंकूगु खः ।

सुगतरत्नजुं छक्वः नेवाःतय्गु छगू ज्याझ्वलय् न्ववायेगु झ्वलय् धयादीगु खः, नेवाःत धइपिं मुक्कं देशयात नेतृत्व बीफुपिं जाति खः, उकिं उमिसं नेवाः प्रदेश जक धायेबलय् नेवाःतय् क्षमता संकुचित जुइगु खः ला? थ्व वय्कलं नेवाःतय् विराट क्षमतायात आंकलन यानाः ब्वयादीगु राष्ट्रवादी बिचाः खः। तर नेवाःतय् उगु क्षमतायात नष्ट याइपिं गैर नेवाःत थन गुलि शक्तिशाली धइगु खँ धाःसा शायद वय्कलं उबलय् आंकलन यानामदीगु जुइफु ।

More Stories Like this