माओवादी मजदूर संगठनया ल्वापु

माओवादी समर्थित मजदूर संगठनतय् ल्वापु अन्ततः थवंथवय् दायेगु व अपहरण यायेगु थेंज्याःगु स्तरय् तक कुहां वःगु दु। पार्टीया स्वंगू गुटय् विभाजन जुयाच्वंपिं स्वम्ह नेतातय्त समर्थन याइगु स्वंगू हे मजदूर संगठन अस्तित्वय् वयेवं उमि दथुइ थज्याःगु तकया अवस्था वःगु खः। तर थ्व समस्या धइगु मजदूर दुने जक वःगु मखु। पार्टीया स्वम्ह शीर्ष नेतात अध्यक्ष प्रचण्ड, उपाध्यक्षपिं मोहन वैद्य व डा. बाबुराम भट्टराईपिं स्वंगू हे गुट जुयाः गुलि बांमलाक विभाजित जुयाच्वने धुंकल धइगु खँ थ्व घटनां क्यनाच्वंगु दु। वय्कःपिनि गुटया लिच्वः थौं मजदूर फाँट क्यना बिल। कन्हय् थ्वहे ल्वय् विद्यार्थी, मिसा, शिक्षक, जातीय फाँटय् नं सरे जुया वन धाःसा वयां लिपा माओवादीयात सखाप यायेत सुशील कोइराला अथवा खड्ग ओलीपिंसं छुं हे मेहनत याये माली मखु। पार्टी दुने नेताय्सं ब्वलंगु कचवं क्वय् थ्यंक वंगुया हे लिच्वः खः थ्व। थुकियात सुधार यायेगु खःसा नेतातय्सं कार्यकर्तायात जक सम्झे यानां मगाः, थःपिं नं सुधरे जुइमाः। च्वय् नेतात ल्वानाच्वन धाःसा क्वय् उकिया लिच्वः गथे जू वनी धइगु खँया थ्व छगू बांलाःगु नमूना खः। थ्वपाखें माओवादी जक मखु मेमेगु पार्टीं नं सयेका कायेमाः। माओवादीं थः मजदूर नेता व कार्यकर्तातय्त छगू इलय् अतिकं स्वच्छन्द जुइक त्वःता तःगु व लाक्वपाक्व मनूतय्त संगठनय् दुकाःगुया लिच्वः नं थ्व खः। उकिं थ्व ल्वय् मेमेगु फाँटय् सरे जुया वने न्ह्यः हे पार्टीं थुकियात समाधान यायेगु पाय्छि उपाय लुइकाः विवाद ज्यंका छ्वयेमाः। थ्व प्रकरणयात कयाः नेता-नेतात मेगु विवादय् तक्यने मजिउ ।

More Stories Like this