माओवादीयात अर्थ नं मबीगु
'समर्थन लित काःसा २४ घौया दुने मेगु सरकार'
येँ (सन्ध्या टाइम्स)/सरकार गठनय् जुयाच्वंगु अलमल चीकेत माओवादीं गृहया पलेसा अर्थ मन्त्रालय जूसां कायेत थःपिं तयार दु धकाः संकेत बिउगु दुसा एमालेया ओली पुचलं यदि माओवादी व एमालेया जक सरकार गठन जुइगु खःसा अर्थ नं बी फइ मखु धकाः धयाहःगु खँ सीदुगु दु ।
गृह मन्त्रालय बारे म्हीग माओवादीया वार्ता पुचः व एमालेया नेपाल-ओली पुचः दथुइ वार्ता जूबलय् माधव नेपालं माओवादी नेतातय्त स्पष्ट रुपं हे गृह जक मखु अर्थ नं दइ मखु धकाः धयाहःगु खँ सूत्रं कंगु दु। छुं जुयाः सरकारय् कांग्रेस सामेल जुल धाःसा जक माओवादीयात अर्थ बी धयागु खः, कांग्रेस मवल धाःसा अर्थ एमालें हे काइ धकाः धयाहःगु खँ सूत्रं कंगु दु ।
उगु इलय् माधव नेपालं स्पष्ट रुपं हे 'यदि छिकपिंसं धाःगु मन्त्रालय मबिल धाःसा छिकपिंसं दकलय् अप्वः याये फइगु धइगु सरकायात बियातःगु समर्थन लित काइगु तक जक खः। छुं जुयाः छिकपिंसं समर्थन लित काल धाःसा वयां २४ घण्टा दुने हे जिमिसं न्हूगु सरकार गठन यानाः क्यना बी' धकाः ख्याच्वः बीगु भाषां धयाहःगु खँ सूत्रं धाःगु दु ।
एमालेपाखें अज्याःगु ख्याच्वः वःगु कारणं आः माओवादीं गृह त्वःते फइ धकाः बियाच्वंगु संकेतय् हिउपाः हइगु खँ धाःगु दु। आः वयाः माओवादीं हानं गृह त्वःते फइ मखु धयाहःगु दावी सूत्रया दु ।
माओवादीया प्रचण्ड पुचः गृह मवइगु जूसां त्वःताः सरकार गठनयात पूर्णता बी माली धइगु पक्षय् दुसां माओवादीया ल्याय्म्ह पुस्ता धाःसा आः गृह प्रतिष्ठाया विषय जुइधुकूगु कारणं थुकियात त्वःताः सरकारय् वने फइ मखु धयाहःगु दु। थुकिं यानाः अध्यक्ष प्रचण्डयात समस्या जुयाच्वंगु खँ धाःगु दु ।
उखे प्रधानमन्त्री झलनाथ खनालयात ओली पुचलं छुं जुयाः माओवादी सरकारय् मवइगु जुल धाःसा वयात पियाच्वनेम्वाः, मन्त्रिमण्डल विस्तार याना छ्व, मालं माःथे जुइ धकाः लिउने च्वनाः घ्वानाच्वंगु खँ धाःगु दु ।
