शिवरात्रि व सेनाया सैनिक दिवस

थौं सिलाचःर्‍हे। थुकियात हिन्दू धर्मावलम्बीतय्सं शिवरात्रि धकाः विशेष महत्व बियाः माने याइ। नेपाः दशकौं तक वैधानिक रुपं हे हिन्दू राष्ट्र जुयाच्वंगु कारणं शिवरात्रिं नं राष्ट्रिय नखःया हे रुप कायेधुंकूगु खनेदु। शिवरात्रिया लागिं राज्यस्तरपाखें हे याइगु तयारीं नं उकि यात पुष्टि याः। तर थन चर्चा यायेत्यनागु विषय शिवरात्रिया मखु, बरु शिवरात्रि कुन्हु हे नेपाली सेनां न्यायेकीगु 'सैनिक दिवस'या खः। शिवरात्रि कुन्हु सेनां तिंख्यलय् वयाः विशेष ज्याझ्वः याना वयाच्वंगु दुसां थ्व न्हियात सैनिक दिवस धकाः न्यायेका हःगु धाःसा तःदू मदुनि। सेनां थःगु नामय् छुं कथंया दिवस न्यायेकेगुयात बांमलाः धायेमाःगु आवश्यकता मदु, दिवस हंगु पाय्छि हे खः ।

तर नेपाःया राष्ट्रिय सेना धयातःगु नेपाली सेनां शिवरात्रि कुन्हु थःगु दिवस न्यायेकेगु गुलित पाय्छि जुइ, उकिया बारे धाःसा चर्चा याये हे माःगु जुइ। नेपाली सेना सकलें नेपाःमिया सेना खः, उकिं थुकियात गुगुं छगू धर्मलिसे आवद्ध याना तयेगु पाय्छि जुइ मखु। उकिसनं थौं नेपाः धर्म निरपेक्ष देय् जुइधुंकूगु अवस्थाय् देय्या गुगुं नं राष्ट्रिय निकाययात गुगुं छगू धर्म वा सम्प्रदायलिसे स्वाका तयेगु पाय्छि मखु। नेपाली सेना हिन्दू धर्म माने याइपिं जक दुगु थाय् मखु। अन मेमेगु धर्मया सैन्य जवान वा अधिकारीत नं दइ। मुक्कं निकाययात हिन्दू धर्मलिसे जक स्वाका तयेबलय् उकिं मेपिं गैरहिन्दूतय् आस्थाय् घाः लाकीगु खूयात नं वाःचायेकेमाः। नेपाः छगू बहुभाषी, बहुजातीय, बहुधार्मिक देय् जूगु कारणं राज्यया सम्पूर्ण निकाय हे सम्पूर्ण जनताया जाति, भाषा, धर्मलिसे आवद्ध जूगु जुइमाः नकि गुगुं छगू धर्म, जाति वा भाषालिसे जक। थ्वहे सिद्धान्त नेपाली सेनाय् नं लागू जुइमाः। नेपाःयात हिन्दू राष्ट्र धकाः गनं नं च्वया मतःगु थौंया परिवेशय् सेनां थःत हिन्दू धर्म दुने जक लिकुंका तयेगु पाय्छि मखु। ईया नापनापं थुकी नं हिउपाः हयेमाः ।

More Stories Like this