नीन्यादँ क्यन अन्तर्राष्ट्रिय बौद्ध भावना केन्द्र

अमिता धाख्वा (अध्यक्ष अ.बौ.भा.के.)

भगवान बुद्धं जनमानसय् सुख शान्ति प्रदान यानाः सांसारिक दुःखं मुक्त जुइया लागिं निर्देशन यानाबिज्याःगु सतिपट्ठान विपस्सना भावना अभ्यास यायेगु/याकेगु ताः तयाः पलिस्था जूगु अन्तर्राष्ट्रिय बौद्ध भावना केन्द्र नीन्यादँय् क्यंगु लसताय् थौं रजत जयन्ती न्यायेकाच्वंगु दु ।

सतिपट्ठान विपस्सना धइगु मनयात शुद्ध स्वच्छ यायेगु प्रमुख भावना विधि खः। मनयात बुलुका बीगु राग द्वेष, मोह, अभिमान, ईर्ष्या आदि क्लेशयात गबलय् तक चीके फइ मखु उबलय् तक वास्तविक सुख शान्ति दइ मखु। थुज्वःगु मभिंगु स्वभाव क्लेश चीकेत सतिपट्ठान विपस्सना भावना अभ्यास मयासें मगाः। उकिं बुद्ध जन्मभूमि नेपाः देशय् ध्यान अभ्यास यायेत ध्यान केन्द्रया आवश्यकतायात महसुस यानाः २०४१ चैत्र २९ गते भिक्षु बुद्धघोष महास्थविरया अध्यक्षताय् बुद्ध विहार, भृकुटीमण्डपय् च्वंगु बैठकं ध्यान केन्द्र दयेकेगु निर्णय याःगु खः। नापं उगु बखतय् अन्तर्राष्ट्रिय बौद्ध भावना केन्द्रया कार्यसमिति नं गठन जूगु खः ।

बर्माया महोपकारक महासी सयादोया प्रमुख शिष्य ओवादाचरिय भद्दन्त उ पण्डिताभिवंस सयादोपाखें २०४२ जेठ २३ गते केन्द्रया शिलान्यास जुयाःलि पलिस्था जूगु थुगु ध्यान केन्द्र दयेकेत शंखमूलय् करिब ८ रोपनी जग्गा यलया मय्जु चैत्यमाया शाक्यं (वर्तमान अनागारिका चन्दञाणी गुरुमां) प्रदान यानाबिज्याःगु खः। थुगु भावना केन्द्र दयेकेगु झ्वलय् श्रद्धेय सुमंगल महास्थविरया नेतृत्वय् पश्चिमपाखे धम्महलसहित नितँ दुगु भवन व श्रद्धेय धम्मवती गुरुमांया कुतलं पूर्व उत्तरपाखे भवन निर्माण जूगु खः ।

थुगु ध्यान केन्द्र दयेकाच्वंगु इलय् २०४३ सालं लिक्कसं बागमती खुसिइ फि काःबलय् वरद मुद्राया दनाच्वंम्ह बुद्धमूर्ति लुया वःगु खः। न्हय्गूगु शताब्दीया लिच्छवीकालीन उगु मूर्ति केन्द्रय् प्रतिस्थापन याये दुगु नं गौरवया खँ खः। थुगु बुद्धमूर्ति लुया वःगु जुयाः हे थुगु क्षेत्रया नां बुद्धनगर जूवंगु खः ।

ध्यान केन्द्र भवन निर्माण जुसेंलि न्हापांगु ध्यान शिविर २०४४ असारं भद्दन्त पण्डिताभिवंसया निर्देशनय् लछि तक जूगु खः। अनंलि २०४४ सालं वसपोल सयादोजीया शिष्य ऊ धम्मपिय सयादोया निर्देशनय् शिविर जुल। अनंलि २०४५ सालंनिसें ओवादाचरिय सायादोजीं म्यानमारया पण्डिताराम स्वेतागौं सासन यइतापाखें कम्मठ्ठानाचरिय सयादोपिं थातं दइगु कथं पालंपाः यानाः छ्वया हयाबिज्यात ।

केन्द्रया गतिविधि तथा योगीपिनिगु ल्याः नं अप्वया वःगुलिं आवास भवन बढे यायेत उत्तरपाखे ताःहाकःगु स्वतँ जाःगु भवन निर्माण जुल। अथे हे अनागारिकापिनि अध्ययन यायेत व च्वनेत धम्महलया लिउने अनागारिका भवन निर्माण जुल। भिक्षुपिनि विनयकथंया ज्याखँ सम्पादन यायेत माःगु सीमागृह नं थुगु केन्द्रय् दु ।

थुगु केन्द्रय् जुयाच्वंगु धार्मिक ज्याखँ थथ दु -
१. २०४५ निसें दँय्दसं वर्षावास (असार पुन्हिनिसें आश्विन पुन्हितक) या स्वलायंकं ताःहाकःगु शिविर संचालन जुइ।
२. ओवादाचरिय सयादोया निर्देशनय् २०४४ सालंनिसें दँय् छकः माघ/फागुन महिनाय् विशेष शिविर संचालन जुयाच्वंगु दु ।

३. यलया थीथी विहार, संघ संस्था त्वालं पालंपाः थीथी ज्याझ्वः यानाः हना वयाच्वंगु बुद्ध जयन्ती ज्याझ्वः मध्ये थुगु ध्यान केन्द्रनाप जानाः कुलपुत्र कुलपुत्रीपिंत प्रब्रजित यानाः झिन्हुया ध्यान तयेगु ज्याझ्वः न्ह्यानाच्वंगु दु।
४. मचांनिसें बुद्ध शिक्षा अभ्यास याकाः नैतिकवान चरित्रवान यायेगु ताः तयाः २०४७ सालंनिसें पुस माघया चिकुलाया विदाय् गुदँनिसें झिंखुदँ तकया मस्तय्त न्हय्न्हु न्हय्न्हुया प्यंगू शिविर दँय्दसं संचालन जुयाच्वंगु दु।
५. लय्लय् पतिकं झिन्हुया शिविर संचालन नापं योगीपिनि अनुकूलकथं मेमेगु दिनय् नं ध्यान च्वने दइगु कथं व्यवस्था यानातःगु दु।
६. लय्लय्पतिकं अन्तिम शनिवाः न्हिछिया ध्यान शिविर नियमित रुपं जुयाच्वंगु दु।
७. शनिवारपतिकं सुथय् ध्यान व धर्मदेशना ज्याझ्वः जुयाच्वंगु दु।
८. मस्त व ल्याय्म्हय्त शनिवाः सुथय् ७ बजेनिसें ९ बजेतक ध्यान भावना व परियत्ति शिक्षाया कक्षा संचालन जुयाच्वंगु दु।
९. सक्षमपिं अनागारिका तयार यायेगु ताः तयाः अनागारिका व ऋषिनीपिंत तालिम बीगु ज्या जुयाच्वंगु दु।
१०. लाकुरे भञ्ज्याङ्गया पहाडी लागाय् ३६ रोपनी जग्गा कयाः न्हूगु ध्यान केन्द्र निर्माणया पहल यायेधुंकूगु दु।
११. दँय्दसं कथिन चीवर दान उत्सव व केन्द्रया वार्षिक उत्सव न्यायेका वयाच्वंगु दु।
१२.दँय्दसं बुद्ध जयन्ती कुन्हु बुद्ध पुजा व छन्हुया ध्यान शिविर नापं बुद्धनगरया बुद्ध जयन्ती समारोह समितिनाप जानाः बुद्धमूर्ति सहित बुद्धनगरय् शान्ति पद यात्रा न्ह्याका वयाच्वंगु दु।
१३. सतिपठ्ठान ध्यान व परियत्ति सम्बन्धी सफूत पिकया वयाच्वंगु दु। आः तक १४ गू सफू पिथनेधुंकूगु दु।
१४. प्यंगू संवेजनीय थाय् व मेमेगु लागाय् तीर्थयात्रा यंकेगु ज्या नं न्ह्याकाच्वंगु जुल ।

थुगु केन्द्रया प्रमुख ओवादाचरिय सयादो, धम्मानुसासक भन्तेपिं, कम्मठ्ठानाचरिय सयादोपिं, निर्देशकजुपिं, श्रद्धेय भन्तेपिं, श्रद्धेय गुरुमांपिं, कार्यसमिति व थीथी उपसमितिया दुजःपिं लगायत समस्त श्रद्धालु दातापिनि कुतलं थुगु केन्द्रया नीन्यादँया रजत महोत्सव हने खनाच्वन। आपालं मनूत ध्यान च्वनेधुंकूगु थुगु ध्यान केन्द्र छगू उत्तम पुण्य स्थल खः। रजत महोत्सवया ज्याझ्वलय् रजत महोत्सव स्मारिका नापं सतिपठ्ठान उपदेश, पपतित सूत्र, ध्यान जाँच निर्देशन, परिहानीबाट हासिल हुने लाभ धइगु सफू नं विमोचन जुइ। थुगु लसताय् ध्यान केन्द्रया उत्तरोत्तर प्रगति नापं सतिपठ्ठान विपस्सना भावनाया निरन्तर अभ्यास यानाः सुख शान्ति प्राप्त यायेगु ज्याय् झी सकले न्ह्यज्याः वने फयेमा धकाः भिंतुना देछायाच्वना ।

More Stories Like this