गृह त्वःताः अर्थ कायेत तयार?
येँ (सन्ध्या टाइम्स)/गृह व रक्षा मन्त्रालयया पलेसा अर्थ मन्त्रालय बी धकाः एमालेया ओली-नेपाल गुटं छ्वया हःगु प्रस्तावयात माओवादीं स्वीकार याइगु सम्भावना ब्वलंगु दु। सरकारय् वनेगु वा मवनेगु धकाः सहलह यायेत थौ च्वंगु माओवादीया शीर्ष नेतातय् सहलहय् अर्थ बीगु खःसा गृह त्वःतूसां जिउ धइगु बिचाः पिहां वःगु खँ धाःगु दु ।
माओवादीं थौं थुकिया बारे अन्तिम लिच्वः बी धाःगु दु।
उखे एमालें यदि माओवादी मवल धाःसा यकःति जूसां सरकार विस्तार याना वनेगु धकाः रणनीति दयेकूगु खँ नं सीदुगु दु ।
माओवादीं खनालयात विश्वास यायेगु त्वःता हल
सरकार टिके यायेगु लागिं प्रधानमन्त्री झलनाथ खनाललिसे हानं छुं नं कथंया सम्झौता यायेत माओवादीं अस्वीकार याःगु दु। आः नकतिनि हे नं विवादय् लानाच्वंगु गृह मन्त्रालय आःयात प्रधानमन्त्रीं हे कयाः लिपा विस्तारं माओवादीयात हस्तान्तरण यायेगु कथं सम्झौता याये वा धकाः प्रधानमन्त्री खनालं तयादीगु छगू प्रस्तावयात माओवादीं तप्यंक हे अस्वीकार याना छ्वःगु खँ सीदुगु दु। आः यानागु सम्झौता हे लागू याये मफुम्ह खनालं भविष्यय् हानं मेगु सम्झौता पालना याना नइ धइगु विश्वास मदु धासें माओवादीं उकियात अस्वीकार याःगु खः। प्रम खनालया कारणं प्रचण्डयात दवाव लानाच्वंगु खँ दु ।
थ्वहे झ्वलय् एमाले व माओवादी निगुलिं पार्टी दुने थ्व सरकार गठन जूगु स्वये मयःपिं वरिष्ठ नेतातय्सं गृह मन्त्रालययात हे मुद्दा दयेकाः कचवं पिकयाच्वंगु खनाः नं मनूत अजूचाःगु दु। छखे एमाले दुनेया वरिष्ठ नेता केपी ओलीं गृह मन्त्रालय जक माओवादीयात बीमाःसा थ्व सरकार भंग याःसां जिउ धकाः दवाव बियाच्वंगु दुसा मेखे माओवादी दुने नं वरिष्ठ नेता डा. बाबुराम भट्टराई नं गृह मन्त्रालय जक मबीगु खःसा थ्व सरकारय् मवंसां जिउ धइगु अभिव्यक्ति बिया हःगु दु। लुमंकेबहः जू, वय्कःपिं निम्हं हे वर्तमान गठबन्धन सरकार गठनया विरोधी खःसा हानं वय्कःपिं निम्हेसितं हे थःथःगु पार्टी दुने 'भारतपरस्त' धइगु द्वपं बियातःगु दु। गृहमन्त्री काये हे माः धइगु भट्टराईया अडान व गृहमन्त्री बी हे मजिउ धइगु ओलीया अडानं यानाः सरकार गठनय् मू भूमिका म्हितूपिं एमाले अध्यक्ष झलथना खनाल व माओवादी नेता पुष्पकमल दाहाल 'प्रचण्ड' निम्हं मछिंगु अवस्थाय् लानाच्वंगु दु ।
