कंसाकारयात कारवाही विरुद्ध नेवाःत सतकय्
येँ (सन्ध्या टाइम्स)/नेपाल वायुसेवा निगमया निलम्बित कार्यकारी अध्यक्ष सुगतरत्न कंसाकारयात जेल चलान याःगु विरुद्ध आन्दोलन यायेत स्वनिगःया नेवाःत सतकय् कुहां वइगु जूगु दु। थ्व झ्वलय् थौं सुथय् जूगु सहलह मुँज्यां 'सुगतरत्न कंसाकार बचाउ समिति' गठन याइगु जूगु दु। लिसें आइतवाः वय्कःया मुद्दाय् सुनुवाई जुइ कुन्हु स्वनिगःया नेवाःतय्सं थःपिनि पसः बन्द यानाः ऐक्यवद्धता प्वंकीगु जूगु दु। लिसें नेवाः सभासद्तय्सं फैसला विरुद्ध रिट नं तइगु खँ दु। थौंया मुँज्याय् सभासद्पिं हिसिला यमि, बुद्ध साय्मि, तीर्थराम डंगोल लिसें पद्मरत्न तुलाधर, मल्ल के. सुन्दर, कृष्णगोपाल श्रेष्ठ, अनाररत्न वज्राचार्य आदिपिंसं न्ववानादीगु खः ।
थ्वहे झ्वलय् थौं हे सुथय् नेपाल वायुसेवा निगमया कर्मचारीतय्सं नं निगमया ज्याकुथिं छगू जुलुस पिकयाः येँदेय्या दुनेया लागा चाःहिल। निगमया ज्याकुथिं क्षेत्रपाटी तक वयाः अनं हानं निगमय् तुं थ्यंकाः जुलुस क्वचायेकूगु खः। स्वतस्फूर्त रुपं पिहां वःगु उगु जुलुसय् निगमया कर्मचारी युनियन व कर्मचारी संघया पदाधिकारीतय्सं ब्वति मकाःसां निगमया अधिकांश नेवाः कर्मचारीतय्सं ब्वति काःगु खः। थ्व कर्मचारीतय्सं थौं निगमय् पेन डाउन यानाः ज्या ठप्प याइगु खँ नं सीदुगु दु। थ्व कर्मचारीतय्सं थौं हे न्हिनय् छगू जुलुस पिकयाः कंसाकारयात कुनातःगु डिल्लीबजारया सदरखोरय् प्रदर्शन यायेगु ज्याझ्वः नं दयेकूगु दु ।
सदनय् नं सः थ्वल
भाजु कंसाकारयात जेल चलान याःगु विरोधय् नेपाः राष्ट्रिय पार्टीया सभासद् बुद्ध साय्मिं म्हिगः सदनय् नं सः तयादिल। थ्व प्रकरण नेवाः समुदाय दुने चर्चाया विषय जुयाच्वंगु दु धासें वय्कलं पर्यटन दँ माने यायेत हे जहाज मदुगु निगमं जहाज न्यायेगु ज्या यातं छु स्यन धकाः न्ह्यसः नं तयादिल। कंसाकारं न्यागू करोड बैना बिउगु चर्चा यानाच्वन तर नकतिनि हे ग्राउण्ड जुयाच्वंगु जहाजं करोडौं तकाया सामान गायब जुल धकाः समाचार वल, थ्व दां सुयात पुइकेगु धकाः नं सभासद् साय्मिं न्ह्यसः तयादिल। वय्कलं थौ नेपाल वायुसेवा निगम व बोइङ्ग व एअरबसया ल्वापुं प्रभावित जू वंगु आशंका नं प्वंकादिल ।
Related Stories
कंसाकार विरुद्धया मुद्दा षड्यन्त्रमूलक : जागरण मञ्च कंसाकार जेल चलान सुगतरत्नया समर्थनय् जुलुस कंसाकार विरुद्धया कारवाही खारेज यायेत नेवाःतय् माग कंसाकारया पक्षय् संघर्ष यायेत समिति गठन 'कंसाकार प्रकरण इमान्दार नागरिकत प्रति जूगु षड्यन्त्र' फ्रान्सया एयरवस कम्पनीं बैना लितबिल
