नेपालय् पवित्र अस्थि धातु

कोण्डन्य

सर्वज्ञ बुद्धया पवित्र अस्थिधातुया आगमन :

Buddhist Goodwill Mission या प्रमुख नारद स्थविरं नेपालय् च्वंपिं बौद्धतय्गु निंतिं पूजा सत्कार यायेत सर्वज्ञ बुद्धया पवित्र अस्थिधातु देछा कथं हयाबिज्याःगु खः । उगु पवित्र अस्थिधातु नेपाःया बौद्धतय्गु निंतिं श्री ३ महाराज पद्मशमशेरया ल्हातय् लःल्हायेगु शुभेच्छा ब्वयाः छगू सन्देश छ्वयाहःबलय् सकल बुद्धया अनुयायीतय्त 'दर्शनया निंतिं स्वयम्भू क्वय् च्वंगु आनन्दकुटी विहारय् हे चीभाः दयेकाः अस्थिधातु प्रतिस्थापित या' धयागु श्री ३ महाराजया हुकुम जुल । थ्व हे खँयात ज्यां याना क्यनेत बु.सं. २४९० (वि.सं. २००३) बैसाख पुन्हि कुन्हु धर्मदूत मण्डलया दुजःतय्गु न्ह्यःने न्हय्म्ह श्रद्धालु दातात जानाः चीभाःया शिलान्यास जुल ।

नेपालय् न्हापांखुसी बुद्धया पवित्र अस्थिधातु ब्वज्या :

वि.सं. २००५ (मे ५ १९४८) य् भिक्षु नारद स्थविर निक्वःखुसी नेपाः चाःहिलेत संघनायक भिक्षु अनिरुद्ध महास्थविरलिसे बिज्यात । बु.सं. २४९२ या बैसाख पुन्हि कुन्हु सुथय् आनन्दकुटी विहारय् शील प्रार्थना व धर्मदेशना लिपा श्रद्धेय् भिक्षु नारदं आनन्दकुटीइ न्हू दयेकूगु चीभाः उदघाटन यानाबिज्यात । उगु चीभाः- यात श्रीलंका राम चैत्य धकाः नां छुत । उकुन्हु हे न्हिनय् १-३ बजे तक लंकाद्वीपय् च्वंगु अनुराधापुरं हःगु सर्वज्ञ बुद्धया पवित्र अस्थिधातुया दर्शन यायेत भक्तजनत म्वःम्वः जुइक वःगु खः । नेपालय् शाक्यमुनि सर्वज्ञ बुद्धया नवजागरण लिपा पवित्र अस्थिधातुया ब्वज्या हाकनं याःगु थ्व हे इतिहासय् न्हापांगु घटना खः ।

पवित्र अस्थिधातु ब्वज्या लिपा सुरङया लँपुं जुनाः श्रीलंका चैत्यया गर्भय् निधान यात । श्रीलंकाय् क्यान्डीइ च्वंगु बुद्धया पवित्र दन्त धातु वा सुरक्षा यायेत गथे स्वपु ताःचा दयेकाः देगःया प्रमुख भिक्षु निर्देशक पुजारी डियवडन निलिमे व सरकारी मनूनापं यानाः स्वंगू पक्षयात ताःचा लःल्हाइगु खः अथे हे नेपालय् नं स्वपु ताःचा दयेकाः निम्ह प्रमुख भिक्ष्ा व छम्ह दातायात लःल्हात । उबलय् राणाकालीन अवस्थां यानाः सरकारयात बीमाःगु ताःचा नं प्रमुख तुलाधरत करुणारत्न सप्त-वीरिसं हेराभाइ व केशरत्नयात ल्यःगु खः । वय्कःपिं थःपिंसं हे दँय्दँय् पाः पाः यानाः ताःचात लःल्हायेगु नियम नं दयेकादीगु खः । थुकथं दँय्दसं स्वपु ताःचां चायेकाः सुरुङया लुखां दुहां वनाः चैत्यगर्भया सेफ यायेकाः बैसाखपुन्हि कुन्हु सर्वसाधारणयात पवित्र अस्थिधातु दर्शन याकेगु चलन जुयावल ।

पवित्र अस्थिधातुया ऐतिहासिक पृष्ठभूमि :

कुशिनगरय् भगवान बुद्धया महापरिनिर्वाण जुसेंलि मल्लतय्गु पवित्रस्थल मुकुटबन्धनय् यंकाः अन्तिम दाहसंस्कार याःबलय् चिताया मि सीधुंकाः खरानीइ बुद्धया पवित्र अस्थिधातु ल्यनाच्वन । आचार्य भिक्षु अमृतानन्दं च्वया- बिज्याःगु 'बुद्धकालीन ब्राह्मण भाग -१' कथं बुद्धया अस्थिधातु दक्वं यानाः १६५ नाली अर्थात ३२ माना दुगु खः । व अस्थि दक्वं चिचिगुलिगु गुलिचा गुलिचा थें च्वंगु स्वता रंगयागु खः । अस्थिधातु मुं तु व च्वकि थें च्वं । उबलय् बुद्धया अस्थिधातु कायेत तःधंगु विवाद ब्वलंगु खः । बुद्धया महा- परिनिर्वाण लिपायाम्ह दकलय् थकालिम्ह भिक्षु महाकाश्यप महास्थविरया सल्हा कथं द्रोणं अस्थिधातुयात च्याब्वथलाः थीथी देश प्रदेश व नगरयात इनाबिल । सकसिनं चीभाः दयेकाः अस्थिधातु निधान यानाः पुजा यानातल । यक्व लिपा मगधया जुजु अजातशत्रुं अस्थि-धातु निधान यानातःगु थासय् सम्राट अशोकं उत्खनन् याकाः ८४००० चीभाः दयेकेबियाः व दक्वं अस्थिधातु निधान याःगु खँ बौद्ध साहित्यय् दु ।

सम्राट अशोकं श्रीलंकाय् धर्म प्रचार यायेत थः काय भिक्षु महेन्द्र महास्थविरयात छ्वःबलय् जुजु देवानपिय तिस्सयात देछा कथं यक्व हे अस्थिधातु बियाछ्वःगु खः । अनुटा धष्ारया वाद्वँ थें च्वंक स्तूप दयेके बियाः थीथी स्तूपय् अस्थिधातु निधान यात । लिपा नीगूगु शताब्दीया प्रारम्भय् श्रीलंकाया थीथी थासय् पुरातात्विक उत्खनन् व अनुसन्धानया झ्वलय् अनुराधपुरय् लंकाय् च्वंम्ह हरमानिस नांयाम्ह मनुखं लुइकूगु अस्थिधातु मध्ये छुं भचा अस्थिधातु थःके तुं तल । व सीधुंकाः वया कलातं छुं अंश थःत श्रद्धा दुगु कोलोम्बोय् च्वंगु बजिराराम विहारयात देछात व उकिया हे अंश लिपा नारद महास्थविरं नेपालय् हयाबिज्यात ।

कान्तिपुरी नगरीइ न्हापांखुसी पवित्र अस्थिधातुया नगर परिव्रुमा :

बु.सं. २४९३ (वि.सं. २००६) या बैसाख पुन्हि कुन्हु आनन्दकुटी विहारय् बुद्धपूजा शीलप्रार्थना धर्मदेशना याये धुनेवं सुथसिया १२ बजे तक श्रद्धालुपिनि निंतिं पवित्र अस्थिधातु ब्वयेगु ज्या जुल । न्हिनसिया ३ बजे पवित्र अस्थिधातु आनन्दकुटी विहारं निसें स्वांया स्वानं जक दयेकातःगु खतय् तयाः थीथी सांस्कृतिक बाजं ज्ञानमाला भजन व त्रिरत्न गुणस्मरणया लिसेलिसें यात्रा यानाः श्रीघः विहार नःघलय् सनिलया ६/२५ बजे थ्यंकः वल । लँ दुछिं छाय्पियातःगु छेँय् छेँय् मत च्याकातःगु लावालस्करं जाःगु उगु अस्थिधातुया कान्तिपुरी नगर चाःहिउगु थ्व न्हापांखुसी खः । गुलि मनूतय्सं ला स्वानं जक छाय्पियातःगु खतय् तयाः थ्व छु द्यःया जात्रा यानाहःगु थें धकाः न्यंपिं नं यक्व हे दु । थुगु पवित्र अस्थिधातु यात्रां यानाः उगु ईया जनमानसय् बैसाख पुन्हि (बुद्ध जयन्ती) या प्रभाव गाक्कं लात । थुगु पवित्र दिन कुन्हु मनूतय्सं थःपिनि छेँय् छेँय् दीपावली याःगु खः । कन्हय्कुन्हु अनं हानं आनन्दकुटी विहार स्वयम्भूइ च्वंगु श्रीलंका चैत्यया गर्भ दुने हे उगु अस्थिधातु निधान याःगु खः ।

More Stories Like this