व हे ला धइगु नि ...

नर्मदेश्वर प्रधान

खँयाखँय्
इपिं मृत्युया म्हुतुइ थ्यनी। इमित। मृत्युं न्ह्येत स्वइ। पलख न्ह्यइ। घुर्के फइ मखु। ल्ह्वइ।
थुकथं वय्कःपिं मृत्यु यात्रां लिहां वइ। थौंकन्हय् वय्कःपिं सकुशल। सामान्य। मृत्युलोकया अनूभुति छु? गय्? वय्कःपिंसं अन्तर्वार्ता बी। पत्रिकाय् ब्वने।
मय्जु अंगुरबाबा जोशी। डा. कुमार बहादुर जोशी। भाजु जगदिश घिमिरे। वय्कःपिं तःल्वचं पीडित जुइ। छुं ईया जक आयु दनि। डाक्टरतसें घोषणा याइ। मृत्यु इमि लुखाय् थ्यनी। जीवनया अन्तिम घडी इमि न्ह्यःने दं वइ। अय्नं हरेस नइ मखु। वासः याकी। मृत्युलिसे ल्वाइ। संघर्ष याइ। शरीर क्षिण जुइ तर मनोबलया लिधंसा काइ। आशा त्वःती मखु। मनय् ऊर्जा थनी। मृत्युयात च्वतुक्क घ्वाइ। इमि जीवन यात्रा न्ह्याइ। न्ह्यानां तुं च्वनी। मृत्युलिसे अथक संघर्ष याइ। इमिसं मृत्युयात छले याइ। थ्वहे संघर्षया विषयय् इमिसं थःगु अनूभुति प्वंकी। रोचक
जुइ ।

थन जिं छम्ह मेम्ह पात्र नं लुमंके। मदनमोहन मिश्रजु। नेपालभाषाया च्वमि। छकः वय्कः तच्वः जुइ। घाटय् यंकी। प्यन्हु तक घाटय् लाइ। स्वास्थ सुधार जुइ। छेँय् लित हइ। इलय्ब्यलय् नाप लाइ। वय्कःयात धाये, "घाटय् छि होस दु ला?" "एकदम दु।" वय्कलं लिसः बी। नुगलय् उबलय् छु छु खँ लू च्वयेमाल। इनाप याये। तर छुं पिहां मवःनि। आर्यघाटया वय्कःया अनुभव ब्वने दःसा जिउ।
जगदिश घिमिरे खस नेपाली भाषाया च्वमि। छम्ह सामाजसेवाया कार्यकर्ता। "अन्तर्मनको यात्रा" वय्कःया सफू पिहां वइ। वय्कः अर्बुद ल्वचं कइ। ल्वय् तच्वः जुयावनी। जीवनया अन्तिम घडीइ थ्यनी। विदेशय् वनी। वासः याकी। करोडौं फुकी। विदेशी संस्थाय् ज्या यानाच्वम्ह जुयाः ध्यबा चूलाइ। मृत्युबोध गय् जुइ। "अन्तर्मनया यात्रा" य् वय्कलं व्याख्या याइ। वासःया बलं मृत्यु चिली। थौंकन्हय् वय्कः लेखनकार्यया सक्रिय। अर्बुद थ्वय्या छु ठेगान? तर मृत्युभय चिन्ता वय्कलं पचे याइ। इमित सृजनात्मक निकास बी। छन्हु। नेपाल बैंकया पिने लँय् सफूत ब्वया तइ। मीत। मीम्हं "अन्तर्मनको यात्रा" सफू क्यनाः धाइ- थ्व सफू न्यानादिसँ। थ्व लेखकया आयु लछि जक दनि। खँ न्यने। वा ! गजब व्यापार। मृत्युया विज्ञापनं ज्या काइ। जगदिश घिमिरे इलय्बलय् खं। ठिक हे खने दइ। सिनाः म्वानावःम्ह थें ताइ ।

डा. कुमार बहादुर जोशी। किड्नीया ल्वगि। तःदँ न्ह्यः किड्नी हिली। स्वस्थ जुइ। तर किड्नी हानं स्यनी। पुनः हिलेमाली। उपचारया �वलय् वय्कःया होश तनी। मृत्यु नापलाइ। मृत्युलोकय् थ्यनी। अन सु सु नापलाइ। थःगु अनुभव वय्कलं अन्तर्वार्ताय् कनी। ब्वने। थौंकन्हय् कुमार बहादुरजु ठीक हे दु।
अंगुरबाबा जोशी। पुलांम्ह मिसा शिक्षाया न्ह्यलुवा। छगू इलय् पद्मकन्या कलेजया प्रिन्सिपल। बेलायतं उच्च अध्ययन यानावःम्ह पद्म कन्या कलेज उबलय् बागबजारतुकुचा सिथय्। चिखागु छेँ। १८, १९ सालपाखे कलेजय् बीए ब्वनाच्वनागु। आइ.ए.सं मनोविज्ञान विषय ब्वने। बि.ए.लय् मनोविज्ञान विषय् मदु। तयेकेगु कुतः याये। पद्म कन्याय् मनोविज्ञान विषयया विद्यार्थीतय् ग्वाहालि काये। मनोविज्ञान स्नातक स्तरय् नं तयेकेत पद्म कन्याय् वने। प्रिन्सिपल अंगुरबाबा नापलाये। अंगुरबाबा उबलय् ल्यासे तिनि। बांलाः। फुर्ति दु। लुमं। तर। उकुन्ह टि.भी. इ खनी। वहे अंगुरबाबां अन्तर्वार्ता बियाच्वंगु। ख्वाः फस्वः। म्हुतु बेरुप। मखुगु ल्वय् जुइ। शल्यक्रिया याइ। ख्वाः काचाकुचुक्क जुइ। हानं कडागु ल्वचं थी। दुरु निपां ध्यनी। छन्हु डाक्टरलिसे याकःचा नापलाइ। अंगुरबाबां न्यनी, "डाक्टर ! खःगु खँ धयादिसँ, गुलि म्वाइ? खःगु धायेत संकोच तायेकादीम्वाः।" डाक्टरं लिसः बी। वं न्यनी। थुइकी। मृत्यु लुखाय् पियाच्वंगु दु। तर अंगुरबाबा निश्चिन्त जुइ। वया अन्तर्वार्ता न्यने। आश्चर्य ! व भयरहित। वयाके पीर खने मदु। वं धाइ, "स्वयादिसँ ! थौं जिगु ख्वाः बेरुप जुइ। तर लाहिया ख्वाःया सौन्दर्य क्षणभंगुर जुइ। यथार्थय् व सौन्दर्य हे मखु। मनूयाके आन्तरिक सौन्दर्य दयेमाः। दुने। व सौन्दर्य अक्षय जुइ। सदां ल्यनी। जीवन छु? बोध यायेमाः। मृत्युभयं मुक्त जुइ।" अंगुरबाबाया आत्मविश्वास। मनोबल। अन्तरशक्ति। प्रत्येक खँग्वलं पिज्वइ। वया प्रत्येक खँग्वः ऊर्जाशील जुइ। व भ्याः हे निराश खने मदु। छुं यानावने। वं तत्परता क्यनी। आध्यात्मिक चिन्तनय् दुनी। मृत्युलिसेया संर्घषय् थ्वहे चिन्तन वया ल्वाभः जुइ ।

मृत्युलोक शयर यानावःपिं भाजु मय्जुपिनि अन्तर्वार्ता स्वये। यात्रा वर्णन ब्वने। लौकिक यात्रा साहित्य ब्वने नं। तर मृत्युलोकया भ्रमण अलौकिक यात्रा साहित्य जुइ। व यात्रा लेखन। कथन। विस्मयकारी जुइ ।

अंगुरबाबाया अन्तर्वार्ता लुमनी। छता खँ नुगलय् तिक्क मिनी। वं धाइ। ८० प्रतिशत आध्यात्मिक चिन्तन माः। म्वायेत। तर २० प्रतिशत व्यावहारिक विषयलिसे नं जीवनया सरोकार दइ। २० प्रतिशत वय्कःया व्यावहारिक सुझाव। छाय् थें थुकें थी। लुमनाच्वनी। म्वायेत ल्हाती छुं भचा बैभव नं दयेमाः। बैभव शून्य जुयाः म्वाये कठीन जुइ। बुराबुरीतय्सं सम्पत्ति मचाखाचयात इनी। बैराग्यं त्यागी जुइ। धनबिहीन जुइ। तर मचाखाचां स्वइ मखु। दुःख सी। म्वायेत आध्यात्मिक चिन्तन जकं मगाः। आर्थिक लिधंसा नं दयेमाः। छुं भति अर्थस्रोत ल्यंकेमाः बुढेसकालयात। मय्जु अंगुरबाबां लौकिक सल्लाह बी ।

तिरियात सदां धाये। झीगु नामय् छुं सम्पत्ति तये मखु। सम्पत्ति इना छ्वये। झी सम्पत्ति बिहीन जुइ। फय् थें। सुपाँय् थें जुइ। हलुकां म्वाये। इच्छा कने।
बुराबुरी जुइ। २० प्रतिशत आर्थिक पक्षय् नं चिउताः तयेमाः। मखुसा जीवन ग्वःफसय् लाइ ।

अंगुरबाबाया खँ लुमनी। तिरियात सःते। न्ह्यःने फ्यतुके। अन्तर्वार्ताया व झ्वः क्यने। छकः स्व। धाये। वं स्वइ। ताःहाकः सासः ल्हाइ। अले धाइ, "व हे ला धइगु नि !"

More Stories Like this