सुगतरत्नया समर्थनय् जुलुस
अख्तियार दुरुपयोग अनुसन्धान आयोगं एयर बस प्रकरणय् बैना बियाः भ्रष्टाचार याःगु द्वपं बियाः विशेष अदालतं जेल चलान याःम्ह नेपाल वायु सेवा निगमया निलम्बित कार्यकारी अध्यक्ष सुगतरत्न कंसकारया समर्थनय् थौं येँय् जुलुस पिहांवःगु दु ।
नेवाः जागरण मञ्च, नेपाल वायु सेवा निगमया कर्मचारी संगठन नापं इन्जिनियर एसोसिएसनं सुगतरत्नयात त्वःतेत माग यासें जुलुस पिथंगु खः । मञ्चं क्षेत्रपाटीं, कर्मचारीतय्सं वायुसेवा निगमया ज्याकू न्हू सतक व इन्जिनियरतय्सं थापाथलिं जुलुस पिथंगु खः ।
मञ्चं पिथंगु जुलुस क्षेत्रपाटी, थँहिति, थाय्मदु, असं, भोटाहिति, बागबजार जुयाः डिलिबजारय् च्वंगु कारागारय् थ्यंगु खः । अथेहे न्हू सतक व थापाथलीं पिहांवःगु जुलुस नं थीथी लागा चाहिला जेलय् थ्यंकूगु खः ।
सुगतरत्नयात त्वःतेत माग यासें डिलिबजार जेलय् थ्यंकूगु जुलुसय् ब्वति काःपिंसं अन कंसाकारयात छुं ई नापालाःगु खः । अन हे जूगु कोणसभाय् व्यापारी, इन्जिनियर, कर्मचारी नापं नेवाः नेतातय्सं कंसकारयात षड्यन्त्रपूर्वक फसे याःगु धासें तत्काल त्वःतेत माग याःगु खः ।
जुलुस पिथने न्ह्यः जागरण मञ्चया ग्वसालय् क्षेत्रपाटी पार्टी प्यालेसय् थौं सुथय् सहलह मुँज्या जुल । मुँज्याय् 'सुगतरत्न बचाउ समिति' निस्वनाः न्यायीक लडाँइ नापं सतक संघर्ष व आर्थिक ग्वहालि संकलन यायेगु निर्णय याःगु खः । उगु समिति छुं ई दुने हे निस्वनाः तत्काल यायेमाःगु संघर्षया ज्याझ्वः व थीथी ज्याखँ क्वःछीगु जूगु दु ।
नापं मुँज्यां कंसकारया पक्षय् मुद्दा ल्वायेत नेवाः सभासद्त बुद्ध सायमि, तिर्थराम डंगोल, हिसिला यमि, मंगलसिद्धि मानन्धरं रिट दर्ता यायेगु प्रस्ताव नं या:गु खः । मुँज्याय् नेवाः सभासद्त, नेवाः आन्दोलनया न्ह्यलुवाःत, वायु सेवा निगमया कर्मचारीत नापं थीथी पेशाय् संलग्न मनूतय् उपस्थिति दुगु खः ।
Related Stories
कंसाकार विरुद्धया मुद्दा षड्यन्त्रमूलक : जागरण मञ्च कंसाकार जेल चलान कंसाकारयात कारवाही विरुद्ध नेवाःत सतकय् कंसाकार विरुद्धया कारवाही खारेज यायेत नेवाःतय् माग कंसाकारया पक्षय् संघर्ष यायेत समिति गठन 'कंसाकार प्रकरण इमान्दार नागरिकत प्रति जूगु षड्यन्त्र' फ्रान्सया एयरवस कम्पनीं बैना लितबिलMore Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
