नेवानिया कर्मचारी आन्दोलित

कंसाकारया धरौटी पुलेत कर्मचारीं चन्दा फ्वनीगु

येँ (सन्ध्या टाइम्स)/नेपाल वायुसेवा निगमया निलम्बित कार्यकारी अध्यक्ष सुगतरत्न कंसाकारयात जेल चलान याःगुया विरोधय् थौं निगमया सकलें कर्मचारीत पिहां वयाः निगमया ज्या ठप्प यात। निगमपाखें न्हूगु जहाज न्यायेत गुगु एअरबस कम्पनीयात ५ करोड चाःचू दां धरौटी छ्वःगु खः, व दां लित बीगु धकाः धायेधुंकाः नं वर्तमान निगम व्यवस्थापनं लित मकाःगु कारणं उगु दां याकनं लित का धकाः दवाव बीत कर्मचारीत कुहां वःगु खः। उगु दां लित का धकाः पर्यटन मन्त्रालयं नं निगमयात पौ च्वयाः छ्वया हयेधुंकूगु दु। छुं जुयाः वर्तमान अध्यक्ष केबी लिम्बुं ध्यबा लित कायेगु पहल मयात धाःसा कर्मचारीपाखें हे हस्ताक्षर संकलन यानाः दां लित कायेगु प्रक्रिया न्ह्याकेफु धाःगु दु। लिसें माल धाःसा धरौटी दां मुंकेगु लागिं कर्मचारीतय्सं हे छगू खाता चायेकाः दां मुंकेगु अभियान समेत शुरु यायेत्यंगु खँ नं सीदुगु दु। यदि धरौटी दां मुंकेगु लागिं अज्याःगु अभियान न्ह्याकल धाःसा कंसाकार न्हापा प्रमुख जुया वःगु नेपाल टेलिकमया कर्मचारीतय्सं नं ग्वाहालि यायेगु धकाः बचं वःगु खँ सूत्रं धाःगु दु ।

थ्वहे झ्वलय् स्वनिगःया नेवाःतय्सं कंसाकार छम्ह नेवाः जूगुलिं हे वय्कःयात फँसे याःगु महसुस थन याना हःगु दु। थ्व झ्वलय् नेवाः जागरण मञ्चपाखें छगू वक्तव्य पिकासें कंसाकारयात याःगु थ्व कारवाही धइगु देशय् संस्थागत भ्रष्टचार यायेत्यंगु खः धाःगु दु ।