गुथिया जग्गा व्यक्तियात बीगु सुझाव

नेवाःतय् नखःचखः जक मखु समाजया संचालनय् हे गुथिया तःधंगु महत्व दु। गुथि प्रथा नेपालय् नेवाः बाहेक मेगु छुं हे जाति वा समुदायय् मदु। थ्व नेवाःतय् मौलिक संस्कार जक मखु नेवाः समाजयात छधी जुइक धस्वाके तइगु छगू बल्लाःगु शक्ति नं खः। यदि गुथि मंत धाःसा नेवाःत कमजोर जुया वनी धइगु तायेकाः हे पंचायती व्यवस्थां नेवाःतय् गुथिया सम्पत्ति फुक्क कब्जा यानाः गुठी संस्थान खडा याःगु खः। तर गुठी संस्थानं नेवाःतय् गुथि व जग्गा जक कब्जाय् काल, नेवाःतय् संस्कृति धाःसा म्वाके मफु धइगु खँयात वाःचायेकाः नेवाः समाजं गुठी संस्थान खारेजीया माग याना हयाच्वंगु खः। थ्वहे झ्वलय् आः नकतिनि सरकारं हे गठन याःगु भूमिसुधार सम्बन्धी छगू आयोगं गुठी संस्थान खारेज ला यायेगु तर वं न्हापा कब्जा यानातःगु जग्गा धाःसा सम्बन्धित गुथियात मबिसे उगु जग्गाय् ज्या यानाच्वंपिं मोहीयात बीगु धकाः सिफारिस याःगु कारणं आयोगया सिफारिस नापं गुठीया कर्मचारी व भूमाफियापाखें प्रभावित जूगु खः लाकि धइगु आशंका ब्वलंगु दु। नेवाःतय्सं थःपिनि गुथिगाना चले यायेत तयातःगु जग्गा सुयाकें हड्पे यानाः कयातःगु मखु। थ्व ला झी पुर्खां थःथःपिं हे जानाः समाज संचालन यायेत तयातःगु जग्गा खः। नेवाःतय्सं गुठी संस्थानं कयातःगु जग्गा व्यक्तियात हजि धकाः माग याःगु मदु। बरु गुठीया कर्मचारीतय्सं नेवाःतय् गुथिया जग्गा हिनामिना व्यक्तियात बियातयेधुंकूगु दु। उकियात हे वैधता बीत थुगु सिफारिस वःगु खनेदु। उकिं नेवाःतय्सं भूमिया महत्वयात थुइकाः थज्याःगु सिफारिसयात विरोध यायेमाःगु खनेदु ।

More Stories Like this