एमाले ताः ई छगू जुइ मजुइ धाये मफु : राजेन्द्र श्रेष्ठ

राजेन्द्र श्रेष्ठ नेकपा (एमाले)या केन्द्रीय दुजः नापं पुलांम्ह आवास तथा भौतिक योजना मन्त्री नं जुइधुंकूम्ह व्यक्तित्व खः । पार्टी नायः नापं वर्तमान प्रधानमन्त्री झलनाथ खनालया लाइनलिसें सतीम्ह वय्कःनाप पार्टी दुनेया विवाद बारे नेपालमण्डल डटकमपाखें यानागु खँल्हाबल्हाया छुं अंश थन न्ह्यब्वये -

० न्हूगु सरकार गठन प्रक्रियाय् पार्टी दुने छु कारणं विवाद ब्वलनाच्वंगु खः?
- झलनाथ खनालया नेतृत्वय् सरकार गठन जुइगु खने दुसांनिसें हे पार्टी दुने विवाद सिर्जना जूगु खः । मदन भण्डारीं प्रतिपादन याःगु बहुदलीय जनवादयात समय सापेक्ष मजुल धाईपं पार्टी दुनेया छुं नेतातय्सं हे आः पार्टीयात प्रजातान्त्रिक समाजवादपाखें यंकेमाः धइगु संकेत क्यनेकथं थज्याःगु विवादय् सालाहःगु खः । थुकिया नेतृत्व के.पी. ओली, विष्णु पौडेलपिंसं याना वयाच्वंगु खः ।

० पार्टी महाधिवेशनय् हे अज्याःगु लाइन खने दुगु खः लाकि गथे खः?
- लुम्विनीइ जूगु एमालेया च्याक्वःगु राष्ट्रिय महाधिवेशनया इलय् हे माचय् लेनिनया तस्वीर तयेगु वा मतयेगु धइगु बारे घण्टौं बहस जूगु खः । अब्लेया संयोजक कमल श्रेष्ठं लेनिनया फोटो मब्वसें माक्स्रया जक फोटो ब्वःगु खँय् घौत्या तक बहस जुल । लिपा स्वघौ अधिवेशन लिछ्यानाः सहलह यानालिं अमृत बोहरापिसं प्राविधिक कारणं जक थथे फोटो ब्वये लुमंगु धायेधुंकाः तिनि अधिवेशन न्ह्यात ।

० एमाले संशोधनवादी पार्टी जूवन व थ्वं झण्डा व नां नं हिलीगु खँ पित हल धाल नि?
-अब्ले पार्टी दुनेया छगू पक्षं अधिवेशनय् प्रस्ताव कथं प्रस्तुत यायेत धकाः केन्द्रीय समितिइ पार्टीया नां व झण्डा परिवर्तन यायेगु खँ हःगु खः । तर उकियात केन्द्रीय समितिं छलफलया विषय तकं मदयेकुसें अस्वीकार याःगु खः । बहुदलीय जनवाद तत्कालीन ज्याझ्वः खःसां अधिकतम ज्याझ्वः साम्यवाद जूगु ल्याखं अज्याःगु संशोधनवादी नीतिया खँय् लगे जुयाच्वनेगु पाय्छि मखु धकाः हे अब्लें उगु प्रस्ताव अस्वीकार याःगु खः । के।पी। शर्मापिसं ला मदन भण्डारी आः तक म्वानाच्वंगु जूसा कांग्रेस थें जुइधुंकीगु खँ तकं पित हये धुंकूगु खः ।

० अधिवेशनया इलय् निसें आः तकं एमाले दुने अल्पमत पक्षया धारणा छु खः?
- उमिसं तप्यंक हे लेनिनवादयात त्वतेमाः धयाच्वंगु दु । वर्ग संघर्ष व क्रान्ति मखुसें बहुदलीय प्रतिश्पर्धाय् जक वनेमाः धयाच्वंगु दु । लेनिनवाद तानाशाही धाईपं खः उिपं । अथे जुया उिपं राप्रपा कांग्रेस व मेमेगु दक्षिणपन्थी शक्ति नापं नं छप्पँ जुया वनेगु पक्षय् दु । झी अथे चाहे जुयाच्वनागु मदु । बरु थौं मजूसां कन्हे वामपन्थी ध्रुवीकरण जुइफइगुयात ध्यान तयाः ज्या यायेत स्वयाच्वनागु खः । आःया सरकारं याःगु ७ बुंदे सहमती नं थुकिया हे संकेत खः । थुकियात सफल यायेत जिपिं लगे जुयाच्वनागु दु ।

० वर्तमान विवाद गथे ज्यंके फइथें च्वं अले थुकिया मूल समाधानया उपाय गथे खने दयेफु?
- ७ बुंदे सहमति हे पार्टी दुने खनेदुगु असन्तोषया मू कारण खः । तर थ्व अपरिहार्य खः । यदि कन्हय् तक नं पार्टीयात बचे याना वनेगु खःसा वामपन्थी धुर्वीकरण अत्यावश्यक खः । राष्ट्रिय सहमतियात कायम यानाः लेनिनया धारणा कथं विचार हे सार खः संगठन रुप जक खः धइगु सिद्धान्तयात परिपालन याना वनेगु खःत धाःसा नं थौं जुयाच्वंगु गतिविधि अत्यावश्यक खः । बेलायत व जर्मन थेंज्याःगु पूँजीवादी देशय् खने दुगु यूरोपीयन पार्लियामेन्टय् नं थज्याःगु हे कन्जर्भेटिभ फोस्र लिबरल फोस्र व सोसियल डेमोक्राट्सतय्गु फोर्स छथाय् च्वना हे चुनाव ल्वनाः, छथाय् च्वना हे सत्ता पक्ष व प्रतिपक्ष निर्धारण जुइगु खः । आः झीथाय् नं थुकथंया हे सोच विकास जुजुं वयाच्वंगु दु । थुकथं पार्टी दुने हे वामपन्थी व दक्षिणपन्थी धु्रवीकरण खने दये धुंकूगुिलं यानाः एमाले पार्टी ताः ई छप्पँ हे जुयाच्वनी वा मजुइ धाये फइगु स्थिति मदु ।

More Stories Like this