झलनाथं कांग्रेसयात झंगः लात

येँ (सन्ध्या टाइम्स)/नेपाली कांग्रेसया नेतृ सुजाता कोइरालां ७ बुँदाया सहमति यानाः एमालेया अध्यक्ष झलनाथ खनालं नेपाली कांग्रेसयात झंगः लाःगु द्वपं बियादीगु दु। प्रधानमन्त्री जुइगु नितिं एकीकृत माओवादीलिसे साँठगाँठ यानाः प्रम खनालं कांग्रेसया विश्वास गुमे याःगु खँ नं कनादिल ।

विराटनगरय् थौं सुथय् संचारकर्मीलिसे खँल्हायेगु झ्वलय् नेतृ कोइरालां धयादिल, 'झलनाथजुं तःधंगु झंगः लात, कांग्रेसया विश्वास गुमे यानाः झलनाथजु तसकं हे ज्या मछिंगु अवस्थाय् लाःगु दु। वय्कःयात सरकार चले यायेत अःपुइ मखु ।'

सरकारय् कांग्रेसया सहभागिता बिना शान्ति प्रक्रिया व संविधान निर्माणया ज्या पूवनीगु अवस्था मदु धासें वय्कलं धयादिल, 'कांग्रेसयात पिने तयाः शान्ति व संविधान निर्माणया प्रक्रिया पूवनी मखु, शान्ति प्रकृया व संविधान निमार्णया निंतिं कांग्रेसया तःधंगु भुमिका दु ।'

नेतृ कोइरालां कांग्रेसनाप सहलह हे मयासे न्हय्गू बुँदाया सहमति याःगु खँ न्ह्यथँसें उकियात खारेज यात धाःसा जक नेपाली कांग्रेसं खनालया सरकारय् वनेगु सवालय् बिचाः याइ, थ्व सम्झौता दतले कांग्रेस सरकारय् वनी मखु धयादिल ।

माओवादी व एमाले ल्वानाः सरकार क्वःदलीगु संभावना
मधेसी जनअधिकार फोरमया अध्यक्ष उपेन्द्र यादवं गृह मन्त्रालयया निंतिं एकीकृत माओवादी व एमालेया दथुइ ल्वापु जुयाः झलनाथ खनालया नेतृत्वय् दयेकूगु सरकार क्वःदलीगु सम्भावना अप्वया वल धयादीगु दु। लुम्बिनीइ थौं सुथय् साक्षात्कार ज्याझ्वलय् न्ववायेगु झ्वलय् नेता यादवं अथे धयादीगु खः ।

गृह मन्त्रालयया सवालय् निगू दल ल्वापु जुयाः मुलुक हे धरापय् लाइगु सम्भावना अप्वया वल धकाः नं धयादिल। अथे हे वय्कलं संविधान निर्माण मजूतले संविधानसभा ल्यनाच्वनी धकाः सर्वोच्च अदालतं बिउगु आदेशयात कयाः नं आलोचना यानादिल। वय्कलं संविधान दयेकेगु ज्या राजनीतिक जूगुलिं राजनीतिया मामिलाय् सर्वोच्चं म्वाःमदुगु कथं हस्तक्षेप याये मजिउ धकाः नं धयादिल ।

जनतां बिउगु म्याण्डेटयात तःक्वःमछि उल्लंघन यायेधुंकूगु जुयाः आः क्वःछिनातःगु इलय् हे संविधान दयेकी धकाः धायेमाःगु थासय् सर्वोच्चं जीवनभर संविधानसभा ल्यनाच्वनीगु आदेश बियाः गल्ती यात धकाः नं धयादिल ।

नेता यादवं सर्वोच्चं मखु राजनीतिक दल दुथ्याःगु विधायिकां मिले यायेमाः धकाः नं धयादिल ।