अनावश्यक विदेशी दवाव अन्त्य यायेमाः

डी. आर. खड्गी

यदि नेतात स्वार्थी, लोभी व असक्षम जुयाः नं विदेशी भक्त जुयाच्वन धाःसा देशया राजनीतिइ न्ह्याबलें भुखाय् ब्वयाच्वनी। देय्या राजनीतिइ भुखाय् ब्वयाच्वन धाःसा समाजय् अशान्ति, अराजकता व अव्यवस्था चरम अवस्थाय् थ्यनीगु स्वाभाविक हे खः। थथे जुल कि जनता भय, त्रास व अभावया जीवनय् म्वायेत बाध्य जुइ। झीगु देशया राजनैतिक खेलाडीत लोभी, स्वार्थी व विदेशीभक्त जुयाच्वंगुलिं देय्या समस्या झनझन जटिल जुजुं वनाच्वंगु दु। चिचीधंगु खँय् तक नं निर्णय याये मफयाः विदेशीत तं चाइ ला धकाः ग्यानाच्वनीपिं नेतातय्सं देश व जनताया कल्याण याइ धकाः आशा यायेगु ला बेकार खः। झीसं खनाच्वना, ग्रेट ब्रिटेन प्रजातन्त्रया जननी देशय् मिलिजुली सरकार संचालन प्रकृया सफलतापूर्वक न्ह्यानाच्वंगु दु। सरकार सफलतापूर्वक न्ह्याके फुगुया कारण अनया नेतात पार्टीया स्वार्थ त्वःताः देशया स्वार्थय् लगे जूगुलिं खः। झीगु देशय् निक्वःगु सफल जनआन्दोलन लिपा जूगु संविधानसभाया चुनावया परिणाम छगू पार्टीयात जनतां बहुमत मबिउगु कारणं मिलिजुली सरकार संचालन यायेत बाध्य जुयाच्वंगु खः। थनया नेतात स्वार्थी, लोभी व विदेशीभक्तया मानसिकतां ग्रस्त जुयाच्वंगुलिं व्यक्तिवादी व पार्टीवादी जक लगे जुयाः मिलिजुली सरकार संचालन याये मफयाच्वंगु खः ।

माधव नेपालयात अविश्वासया प्रस्ताव पास यानाः राजीनामा बीत बाध्य याकल तर लां लां तक न्हूम्ह प्रधानमन्त्री चयन याये मफयाच्वंगु नं विदेशी राष्ट्रया स्वार्थया कारणं खः। भारतया स्वार्थ पूरा याइम्ह नेता जुल धाःसा भारतं जिउ धकाः ईशारा यानाच्वनी। भारतया राष्ट्रिय स्वार्थ पूरा मयाइम्ह नेता जुइगु जुल धाःसा भारतं मजिउ धकाः ईशारा यानाच्वनीगु कारणं प्रधानमन्त्री चयन याये मफयाच्वंगु खः धकाः जनतां मसिउगु मखु। माघ २० गते प्रधानमन्त्रीया दावेदार जुयाच्वंम्ह प्रचण्डं एमाले अध्यक्ष झलनाथ खनालयात समर्थन यानाः प्रधानमन्त्री जुइत सफल ला जुल तर झलनाथयात सरकार संचालन याये थाकुयाच्वंगु खनेदु। खनालयात थःगु पार्टीया नेतातय्सं हे अप्वः पेले यानाच्वंगुलिं सरकारयात पूर्णता बी फयाच्वंगु मदु। आःया ई झलनाथया लागि परीक्षाया घडी नं खः। पार्टीया अध्यक्ष जुयाः नं अल्पमत व बहुमतया नामं रबर स्टाम्प जुयाच्वनेगु वा थःगु विवेक व शक्ति प्रयोग यानाः देश व जनताया हितया ज्याय् लगे जुइगु। झलनाथं थःगु पार्टीया विरोधीतय्सं पेले यात धकाः देश व जनताया हित जुइगु ज्याय् आँट याये मफुत धाःसा प्रधानमन्त्रीया पदं जक मखु पार्टी हे त्याग यायेगु बेस जुइ। एमाले व माओवादी पार्टीया टीम मिले जुयाः न्हय्गू बुँदाया आधारय् देशया समस्या समाधान याना वनेगु धकाः प्रतिवद्धता याःगु खः। निगू पार्टीया अध्यक्षपाखें नेतात माधव नेपाल व खड्ग ओलीं न्हय्गू बुँदाया विरोध न्ह्याकल। माधव नेपाल व खड्ग ओलीं न्हय्गू बुँदे सम्झौतायात विरोध यानाच्वंगु कारणं आन्तरिक स्वयाः नं बाह्य (भारत) कारणया खँ न्यनाः खः धकाः जनतां अनुमान यानाच्वंगु दु ।

थौंया राजनीतिक घटनाक्रमयात विश्लेषण याना स्वत धाःसा याउँक अनुमान यायेफु कि देशय् दुने छगू पुचःया चाहना खः। देशय् न्ह्याबलें अस्थिर, अशान्ति हयाः स्वार्थ पूरा यानाच्वनेगु मनसाय दु धयागु प्रस्ट जुया वनाच्वंगु दु। न्हय्गू बुँदा मध्ये छगू बुँदाया गृहमन्त्री सहयोगी दलयात बीमाः धयातःगु दु। सहयोगी दलं माओवादीयात गृह मन्त्रालय बी मजिउ धकाः तच्वकं विरोध एमालेया छगू पक्षं यानाच्वंगुलिं सरकारं पूर्णता बी मफयाच्वंगु खः। एमालेया छगू पुचःया धापू गृहमन्त्री माओवादीयत बिल धाःसा माओवादीं विद्रोह यानाः सम्पूर्ण शक्ति ल्हातय् कायेफु धाःगु खः। एमालेया छगू पुचःया नेतृत्व यानाच्वंपिं माधव नेपाल व खड्ग ओलीया थ्व तर्क मनोगत भावना ग्रष्ट जुयाच्वंगु दु धकाः अनुमान यायेफु। छाय्धाःसा सम्पूर्ण राज्य शक्ति कब्जा याइपिं खःसा न्हापा प्रधानमन्त्री प्रचण्ड जुयाच्वंगु इलय् कुतः यायेमाःगु खः।
झीगु देशया जनताया राजीतिक स्तर ला अप्वयाच्वंगु खनेदु। छाय्धाःसा गांगामय् तकं राजनीतिक छलफल व बहस जुयाच्वनी। तर उक थःथःगु स्वार्थ व पार्टीया वकालत जक यानाच्वनीगुलिं देशया समस्या झनझन स्यना वनाच्वंगु खः। युरोपया जनता राजनीतिं छलफल व बहस यायेगुली कम व कर्मय् अप्वः ध्यान बियाच्वनी। यदि राजनीति छलफल यायेमाल धाःसा खालि राष्ट्रिय हित बारे जक जुयाच्वनी। यूरोपया जनतायाके पार्टीया चेतना स्वयाः राष्ट्रिय चेतना यक्व दुगुलिं नेतातय्सं देश घातक ज्या यायेगु आँट याइ मखु ।

वंगु माघ २० गते संविधानसभा सदस्यपाखें एमाले अध्यक्ष झलनाथ खनालयात प्रधानमन्त्री चयन यायेत सफल जुल। झलनाथ प्रधानमन्त्री जुइत सफल जूसां नं सरकार संचालन यायेत थाकुयाच्वंगु खनेदु। सरकार संचालन यायेगुली बाधा अड्चन बियाच्वंपिं एमालेया हे छगू पुचः खः। उगु पुचःया विश्लेषण थथे यानाच्वंगु दु। माओवादीया ल्हातय् गृह मन्त्रालय बी मजिउ धकाः प्रचार-प्रसार यानाच्वंगु खः। वास्तवय माओवादीया ल्हातय् गृह मन्त्रालय लात कि सत्ता कब्जा यायेफु धयाच्वंगु छगू बखेडा जक खः। वास्तविक खँ भारतं दबाव बियाच्वंगुलिं जक माधव नेपाल व खड्ग ओली गृह मन्त्रालय माओवादीयात बी मजिउ धकाः हालाच्वंगु खः। भारतया धापू नं माओवादी चीनया पक्षय् वनाच्वंगुलिं गृह मन्त्रालय बीगु पाय्छि मखु धकाः तच्वयेक दबाव बियाच्वंगु खः। भारतया उद्देश्य चीनया नागरिकतय्त फ्रि भिसा बीगु बन्द यायेमाः धकाः दबाव बीगु खः। छुं महिना न्ह्यः हे पर्यटन मन्त्रालयपाखें २०११ सालया पर्यटन वर्ष सफल यायेगु निंतिं प्याकेज प्रोग्राम धकाः चिनियाँतय्त नं फ्री भिसाया प्रस्ताव तःगु खः। फ्री भिसा लागूया निंतिं गृह मन्त्रालययात सहयोगया निंति इनाप नं यायेधुंकूगु जुयाच्वन। गृह मन्त्रालयपाखें फ्री भिसायात कयाः आलटाल याना वयाच्वंगु दु। भारतया रणनीति खः। यदि चीनया नागरिकयात नं फ्री भिसा लागू यात धाःसा भारतं नेपाःयात दादागिरी याना वयाच्वंगुयात चीनपाखें विरोध याइ ला धकाः ग्यानाच्वंगु खः। भारतया स्वार्थय् धक्का लायेफु धकाः फ्री भिसायात फासांफुसुं याना छ्वयेगु लागिं जक माओवादीयात गृह मन्त्रालय बी मजिउ धयाच्वंगु खः ।

drkhadgi@gmail.com

More Stories Like this