संविधान मवःतले दइगु संविधानसभा

संविधान च्वये सिमधःतले संविधानसभाया आयु क्वचाइ मखु धकाः सर्वोच्च अदालतं याःगु फैसलां देशय् मेगु कथंया राजनीतिक तरंग पिकया बिउगु दु। सर्वोच्चपाखें थ्व फैसला वंगु कार्तिक महिनाय् हे याःगु खःसां उकिया पूर्ण पाठ धाःसा नकतिनि सार्वजनिक जूगु खः। संविधान दयेकेगु जिम्मा कयाः संविधानसभाय् थ्यंगु राजनीतिक पार्टीतय्सं संविधान तयार यायेगु ज्या यायां हे ई मगानाच्वंगु खःसा सर्वोच्चपाखें वःगु थज्याःगु फैसलायात जनतां पाय्छि खः धकाः स्वीकार नं याइगु खइ। तर थौं राजनीतिक पार्टी व उकिया नेतातय्सं संविधान च्वयेगु ज्याय् पटक्क हे ध्यान बियाच्वंगु मदु। उमिगु ध्यान संविधान सिबें नं सरकार गठनय् तक्यनाच्वंगु दु ।

नेतातय्गु नालायकीं यानाः मजुयाच्वंगु संविधान च्वज्या सिमधःतले हे संविधानसभा कायम जुयाच्वनी धकाः सर्वोच्चं याःगु फैसलां जनताया नुगः पाउँका बिउगु दु।
तर संविधानसभाया म्याद क्वचायाः नं संविधान च्वये सिमधल धाःसा वयां लिपा छु यायेगु? थ्व नं मेगु तःधंगु समस्या दु। संविधान च्वये सिमधयेकं हे संविधानसभा भंग जुल धाःसा संविधान ला अलपत्र जुइ। राजराजनीतिक पार्टीत थःथः जक च्वनाः दयेकूगु संविधानयात गय् यानाः वैधानिक धाये फइ? हानं मेगु चुनाव याये धाःसा संविधानसभाया चुनाव तःक्वःमछि यायेगु पाय्छि खः लाकि मखु, थ्व नं न्ह्यसः जुइ। थ्व अन्यौलं देशय् अराजकता सिर्जना याना बीफु। उकिं सर्वोच्चपाखें थ्व इलय् विरोध नं याये मछिंगु व समर्थन नं याये मछिंगु फैसला वःगु दु। उकिं थुकियात कयाः छुं टिप्पणी नं मजूगु जुइमाः ।

More Stories Like this