नेवाः व तामाङ दथुइ जूगु सहमति

नेवाः स्वायत्त राज्य मंकाः संघर्ष समिति व ताम्सालिङ संयुक्त संघर्ष समिति व उगु समुदायया नेता, सभासद, अभियानकर्तातय् दथुइ मिति २०६७, फागुन १३ व १४ गते गोकर्ण फोरेस्ट रिसोर्टय् जूगु सहलहय् क्वय् बियाकथंया मान्यतायात आधार माने यासें निगुलिं समुदायया प्रदेशतय् सम्बन्धय् थवंथवय् सहमतिया लिधंसाय् समस्या समाधानया लागिं मंकाः रुपं ज्या यायेत सहमत जुसें थुगु प्रेस विज्ञप्ति जारी यानागु दु।

सहमति:
१. आदिवासी जातियात आत्मनिर्णय, स्वशासन, स्वायत्तता व राजनीतिक अग्राधिकार प्राप्त यायेगु व उमित लिच्वः लाइगु कानून व नीति दयेकेबलय् उमिगु स्वतन्त्र पूर्व सुसूचित सहमति कायेमाः।
२. आदिवासी जातिया प्रथाजन्य कानून, न्यायिक प्रणाली संचालन याइगु संस्थायात पहिचान, संस्कृति, धर्म, सामाजिक व्यवस्था, प्राकृतिक स्रोत साधनलिसे स्वाःगु विषयय् स्थानीय अदालत सरहया मान्यता दयेमाः।
३. संघीय संरचना अन्तर्गतया गुगुं नं सरकारया क्षेत्राधिकार दुने मलाःगु अवशिष्ट तथा आर्थिक अधिकारत प्रादेशिक सरकारय् निहित जुइमाः व संघीय सरकारया स्वीकृति कयाः प्रादेशिक सरकारं वैदेशिक सहायता व त्यासा काये दयेमाः।
४. प्रादेशिक प्रमुख भाषायात केन्द्रीय सरकारया ज्याखँया भाषाया रुपय् मान्यता बीमाः।
५. न्युनतम छगू प्रतिशत स्वयां अप्वः जनसंख्या दुगु जातिया आधारय् स्वायत्त प्रदेश व व स्वयां म्हो जनसंख्या दुगु हकय् विशेष संरचना दयेकेमाः।
६. धर्मनिरपेक्षता, जातीय स्वायत्तता, संघीय लोकतान्त्रिक गणतन्त्र व राष्ट्रिय स्वाधिनता प्रति निगुलिं समुदाय प्रतिवद्ध जुयाः सो प्राप्तीया लागिं संघर्षरत जुइगु।

ताम्सालिङ प्रदेश व नेवाः प्रदेश निर्माण सम्बन्धय्:
क) पुर्ख्यौली भूमि (ऐतिहासिक भूगोल) यात हालया वसोबासया सघनता, विस्तार व बाहुल्यता वा ऐतिहासिक निरन्तरतापाखें प्रमाणित यायेगु व समर्थन यायेगु,
ख) प्रादेशिक भूमिया निर्धारणय् निगुलिं आदिवासी जातिया दथुइ गन गुकिया बाहुल्यता दु अन वहे जाति, समुदायया विशेष संरचना जुइगु आधार माने यायेगु,
ग) सीमांकन यायेबलय् वडास्तरयात नं आधार माने यायेगु,
घ) फयांफछि प्रदेशयात सांस्कृतिक रुपं एकरुपी वा समरुपी दयेकेगु,
ङ) निगू स्वायत्त प्रदेशया दथुइ लाःगु सीमा क्षेत्रया थासय् गुगु जातीय प्रदेशलिसे सुयागु भौगोलिक सामिप्यता व निरन्तरता जुइ उगु क्षेत्र वा स्थान वहे सम्बन्धित प्रदेशय् हे स्वायेगु जुइ।
च) तामाङ व नेवाः समुदायं छगुलिं मेगु समुदायया संस्कृति, इतिहास व परम्परायात सम्मान यायेगु व छगुलिं मेगुया भावनायात आघात लाइगु कथं छुं नं सार्वजनिक अभिव्यक्ति मबीत जिपिं प्रतिबद्ध जुयागु दु।
छ) नेवाः प्रदेश व ताम्सालिङ प्रदेशया निर्माण यायेबलय् सम्बन्धित समुदायया ऐतिहासिक आदिभूमिया भौगोलिक अखण्डतायात आधार माने यायेगु ।

कार्यदलया निर्माण:
१) निगुलिं संघर्ष समितिपाखें म्होतिं नं छम्ह मिसाम्ह दइ कथं प्यम्ह-प्यम्ह दुजः दइगु मंकाः कार्यदल गठन यायेगु।
२) ताम्सालिङ संयुक्त संघर्ष समिति व नेवाः स्वायत्त राज्य मंकाः संघर्ष समितिं थनिं छवाःया दुने थःथःपिनि संघर्ष समितिपाखें सदस्य तोके यानाः बैठक च्वनेगु।
३) सिमाना व मेमेगु सहमतिया मुद्दात मिले यायेगु थुगु कार्यदलया कार्यक्षेत्र जुइ ।

More Stories Like this