तःजिक क्वचाल नेपालभाषा नाइट
नेपालमण्डल फाउण्डेशनया न्ह्यब्वयाः सचंवाः सनिलय् नेपालभाषा नाइट ज्याझ्वः तःजिक क्वचाल । नेपालमण्डल डटकम निदँ फुनां स्वदँ क्यंगु लसताय् विशेष यानाः ल्याम्हतय्त लक्षित यानाः नेपालभाषा नाइट सांगीतिक ज्याझ्वः ग्वसाःग्वःगु खः ।
ज्याझ्वलय् मू पाहाँ थुगुसीया मिस नेपाल २०१० सदिक्षा श्रेष्ठं थःगु मांभाय् प्रति थःगु लगाभ दुगु खःसां थःम्हं बांलाक खँल्हाय् मसःगु धासें दुःख प्वंकादिल । 'जिं थःगु मांभासं धाःगु दक्वं थूसां खँल्हाय्त भचा समस्या दु ।' सदिक्षां धयादिल, 'तर जिं थःगु भासं खँल्हाय्गु सयेकाच्वनागु दु, थौं थें छन्हु जि छिकपिनिगु न्ह्यःने दनाः नेपालभासं हे न्ववायेगु बचं बियाच्वना ।'
वय्कलं झीगु भाय् व संस्कृति हे झीगु म्हसिका जूगुलिं थुकीयात ल्यायम्ह पुस्तां म्वाकातयेगु निंतिं कुतः यायेमाःगु बिचाः प्वंकादिल ।
अथेहे ज्याझ्वलय् मेपिं मू पाहाँपिं प्राइम बैंकया डेपुटि मेनेजर भाइराजा तुलाधर, ग्लायमर फोटोग्राफर राजभाइ सुवाल, नांजाम्ह कार्टुनिस्ट रबिन सायमी व व्यापारी नापं समाजसेवी सरजुबाबा श्रेष्ठजुपिं थःथःगु ख्यलय् नांजा:पिं जूसां नेपालभाषाया ख्यलय् नं यानाच्वंगु ज्याखँया बारे जानकारी ब्यूगु खः ।
ज्याझ्वलय् सांगीतिक पुचः कुटुम्बं नेवाः धुन नापं थीथी सांगीतक प्रस्तुति न्ह्यब्वःगु खःसा जापानिज म्येँ हालामि सुन्दरी मिकां नेवाः भासं म्येँ हालादीगु खः । मिकां ल्वकंह्वाःगु नेवाः म्येँ 'राजामति कुमति' नापं 'सिरसांया ह्येकू', 'सिरिसिरि फसं' व 'जिगु थ्व मन' बोलया म्येँ हालादीगु खः ।
ज्याझ्वःयात मिस नेवाः २०१० सुजिना शाक्य, मिस नेवाः २००८ आकाशा बज्राचार्य, मिस नेवाः २०१०या ल्यू व लियां ल्यू ला:पिं लसता श्रेष्ठ व निशा शाक्यं न्ह्याकादीगु खः ।
News Location:
More Stories Like this
बाघ भैरवया भजन म्येँया म्यूजिक भिडियो सार्वजनिक दाफा भजन म्येँ नं आः म्यूजिक भिडियोय् श्रीच्छा प्रधानं त्याकल 'मिस नेपाल वर्ल्ड २०२३' या उपाधि नेपालभाषाया न्हूगु म्युूजिक भिडियो “याकः मिसाया छेँ खः झीगु किपू देयया प्यंगः थां” सार्वजनिक मिस नेवाः जिगु लुमन्ति व अनुभव
