अन्ततः गृहय् हे विवाद थात
येँ (सन्ध्या टाइम्स)/झलनाथ खनालया सरकारय् वनेगु लाकि मवनेगु धकाः निर्णय यायेत थौं माओवादी स्थायी समितिया बैठक च्वनेत्यंगु दु ।
एमाले अध्यक्ष झलनाथ खनाल व माओवादी अध्यक्ष प्रचण्डया दथुइ जूगु न्हय्गू बुँदाया सहमतिया मू भावना धइगु हे सरकारय् समानुमापति प्रतिनिधित्व जूगुलिं प्रमुख मन्त्रालय मध्ये गृह तकं मबीगु जुल धाःसा सरकारय् वनेगुया अर्थ मदु धकाः माओवादीया ल्याय्म्ह नेतातय्सं दबाव बियाच्वंगु सीदुगु दु। उखे एमाले दुने नं गुगुं हालतय् हे माओवादीयात गृह बी मजिउ बरु प्रधानमन्त्रीयाके हे गृह मन्त्रालय तःसां जिउ धकाः माधव-ओली पुचलं प्रम खनालयात दबाव बियाच्वंगुलिं अन्ततः गृहया कारणं हे सरकारयात पूर्णता बी मफयाच्वंगु खँ पुष्टि जूगु दु ।
माओवादीं रक्षा, अर्थ व गृह मध्य छगू मन्त्रालयया माग याना वयाच्वंगु खः। अर्थमन्त्री एमालेया हे भरतमोहन अधिकारी जुइधुंकूगु दु। माओवादीयाके नं सेना दुगुलिं रक्षा मन्त्रालय बी मजिउ धकाः नेपाली कांग्रेसं धयाच्वंगु गृह मन्त्रालय बी मजिउ धकाः एमाले दुने दवाव जुयाच्वंगु दु।
उखे माओवादीं धाःसा थःपिंत गृह मबीगु खःसा सरकारय् वनेगुया अर्थ मदु बरु सरकारयात पिने हे च्वनाः समर्थन जक यानाच्वनेगु नापं न्हय्गू बुँदाया सहमतियात कार्यान्वयन याकेगुली बः बिया वनेगु रणनीति दयेकेमाः धकाः ल्याय्म्ह नेतातय्सं नेतृत्वयात दबाव बियाच्वंगु दु।
अथे हे एमाले व माओवादी निगुलिं हे दलय् यक्व हे नेतातय्सं थःपिं नं मन्त्री जुइ दयेमाः धकाः दबाव बियाच्वंगुलिं खँ क्वःछी मफयाः नं सरकारयात पूर्णता बी मफयाच्वंगु खँ सीदुगु दु। सीदु कथं एमाले दुने मन्त्री जुइमाःपिनिगु धलः ५० म्ह सिबें थ्यनेधुंकूगु दु ।
गृह व रक्षा मबीगु हे एमालेया बटमलाइन
एमाले नेता केपी ओलीं माओवादीयात गृह व रक्षा मन्त्रालय मबीगु पार्टीया बटमलाईन खः धयादीगु दु। माओवादी अध्यक्ष प्रचण्डं एमालेया अध्यक्ष झलनाथ खनालयात जाली तमसुक याके बिउगु द्वपं बिसें थ्व खँ धयादीगु खः। वय्कलं जनसेना व ल्वाभःया खँ क्वमचायेकं माओवादीयात गृह व रक्षा बी मफइगु खँ नं स्पष्ट यानादिल ।
वीरगन्जया नेशनल मेडिकल कलेजय् थौं सुथय् पत्रकार सम्मेलन यासें वय्कलं थ्व खँ धयादीगु खः। वय्कलं प्रधानमन्त्री निर्वाचनय् माओवादीं क्यंगु उदारता ग्यानापुसे च्वंगु व षडयन्त्रपूर्ण जूगु खँ नं कनादिल। ओलीं धयादिल, 'न्हय्गू बुँदाया नामय् माओवादीं झंगः लानाः सहमति याकाः लोकतन्त्रय् षडयन्त्र याःगु दु ।'
