सिक्किमय् नेवाः बाजं व हुलाप्याखं प्रशिक्षण
येँ (सन्ध्या टाइम्स)/सिक्किम नेवाः गुथिपाखें मध्यपुर कला परिषद थिमिया सल्लाहकार व नेपालमण्डल सांस्कृतिक सम्पदाया अध्यक्ष गणेशराम लाछियात तःजिक लसकुस यात। सिक्किमय् वंगु स्वला न्ह्यवंनिसें नेवाः बाजं व प्याखं स्यनेगु कक्षा न्ह्यानाच्वंगु खः। उगु कक्षा समापनया लसताय् अन हे जूगु छगू ज्याझ्वलय् भाजु लाछियात हनेगु ज्या जूगु खः ।
ज्याझ्वलय् न्ववासें भाजु लाछिं मध्यपुर कला परिषदया माध्यमं सिक्किमय् थःगु हे जीवनकालय् छगू तःजिगु सांस्कृतिक भवन निर्माण यायेया लागिं हथाय् चायाच्वनागु खँ कनादिल ।
उगु ज्याझ्वलय् वय्कः नापं बाजं स्यनादीपिं गुरुपिं कुलरत्न मानन्धर व बालमुकुन्द प्रजापतिपिंत नं सम्मान याःगु खः। मध्यपुर कला परिषदपाखें वंपिं वय्कः बाजं गुरुपिंसं अन बाजं व थीथी हुलाप्याखं नं स्यनादीगु खः। उगु ज्याझ्वलय् वय्कःपिंपाखें प्रशिक्षण कयादीपिं प्रशिक्षार्थीतय्सं नेवाः बाजं नापं थीथी हुलाप्याखं न्ह्यब्वःगु खः ।
ज्याझ्वलय् सिक्किम राज्य सभाया विधायक तुल्सीदेवी राईनं वैज्ञानिक युगय् जाति भाषाया खँ ल्हाइपिंत संकीर्ण तायेकेगु वास्तवय् थःहे संकुचित जुइगु खः धयादिल।
ज्याझ्वलय् सिक्किम सरकारया मन्त्री एन. के. प्रधान, सिक्किम नेवाः गुथिया केन्द्रीय अध्यक्ष रोहित कुमार प्रधान, ग्वसाः खलः नेवाः गुथि मेल्चीधारा दक्षिण सिक्किमया अध्यक्ष एन.बी. प्रधानपिंसं नं न्ववानादीगु खः । वय्कःपिंसं सिक्किम राज्य सरकारया मुख्यमन्त्री पवन चाम्लिङ, मध्यपुर कला परिषद्या गणेशराम लाछि व थीथी व्यक्तित्वपिनि कुतलं सिक्किमय् नेवाः सांस्कृतिक बाजंत पुनःस्थापनाया लागिं यानादीगु ज्वः मदुगु कुतःयात च्वछायादीगु खः ।
