लोडशेडिंग विरुद्ध दनावःपिं नेवाःत

अनेक त्वहचिनाः दँय्दसं अप्वयेका हयाच्वंगु बिजुलीया लोडशेडिंगयात नं आः नेपाली जनतां सामान्य थें तायेकेगु शुरु याना हःगु दु। थ्व नेपाली जनताया दिनचर्या थें हे जुइधुंकूगु दु। नकतिनि पिहां वःगु छगू प्रतिवेदनय् देशय् विकास यायेत थाकुयाच्वंगुया दकलय् प्रमुख पंगः हे लोडशेडिंग खः धयातःगु दु। लोडशेडिंगं यानाः देश हे असफल जुइगुपाखे वनाच्वनं नं राज्यं पटक्क हे ध्यान मतःगु तसकं दुःखया खँ खः। उकिं थुखेपाखे नं राज्यया ध्यान सालाः दवाव बीत स्वनिगःया नेवाःत बुलुहँ दना वःगु दु। स्वनिगः नेवाःतय् लागा जक मखु, नेपाःया राजधानी समेत जूगु कारणं लोडशेडिंगपाखें थ्व लागा दकलय् अप्वः प्रभावित व प्रताडित जुइगु खँय् शंका मदु। उकिं लोडशेडिंगया नामं राज्यं थःपिंत बियातःगु पीडापाखें मुक्त जुइत स्वनिगःवासी नेवाःतय्सं यानाहःगु थ्व प्रतिरोधया विशेष अर्थ दु। वंगु छुं न्हि न्ह्यः तिनि नेवाः मिसा पुचःपाखें लोडशेडिंग क्वपालेत विद्युत प्राधिकरणय् धर्ना बिउगु खःसा आः कंस आइतवाः नेवाः जागरण मञ्चपाखें नं धर्ना बीत्यंगु दु। राजधानी दकलय् अप्वः मनूतय् बसोवास दुगु थाय्, दकलय् अप्वः आर्थिक कारोवार जुइगु थाय्, थज्याःगु थासय् लोडशेडिंगं लाकीगु लिच्वः मेथाय् स्वयां बिस्कं जुइगु खँयात थनया आदिवासी नेवाःतय्सं वाःचायेका हःगु दु। थःगु भाषा, थःगु जाति जक मखु थःगु लागाया विकासय् समेत स्वनिगःवासी नेवाःतय्सं क्यनाहःगु थ्व जागरुकता निश्चय नं अर्थपूर्ण जू। थ्व खँयात राज्य व राज्यय् पकड दयेका तःपिं राजनीतिक पार्टीतय्सं थुइकेमाः। आशा याये, थ्व ज्याझ्वलं लोडशेडिंग म्हो यायेगुपाखे राज्ययात अवश्य नं दवाव लाः वनी ।

More Stories Like this