हानं न्हूगु समीकरणया प्रस्ताव
खनालयात रबर स्टाय्म्प जक दयेकेगु डिजायन
येँ (सन्ध्या टाइम्स)/प्रम झलनाथ खनाल व माओवादी अध्यक्ष प्रचण्ड दथुइ जूगु ७ बुँदे सहमतियात कयाः एमालें याःगु निर्णय बारे सहलह यायेत वःपिं माओवादी नेतातय्त एमालेया वार्ताकारतय्सं हानं न्हूगु हे प्रस्ताव तःगु खँ सीदुगु दु ।
सूत्रं बिउगु जानकारी कथं म्हिगः माओवादी नेतातलिसे खँ ल्हासें एमालेया महासचिव ईश्वर पोखरेलं सरकारय् कांग्रेसयात नं हयेगु व मन्त्रालय बाँडफाँड नं उकथं हे यायेगु धकाः न्हूगु प्रस्ताव न्ह्यःने तयादीगु खः। वय्कःया प्रस्ताव कथं प्रधानमन्त्री एमालेया झलनाथ खनाल जुइधुंकाः न्हापांम्ह उपप्रधानमन्त्री लिसें अर्थमन्त्रीया भाला माओवादीयात व निम्हम्ह उपप्रधानमन्त्री लिसें रक्षामन्त्रीया भाला कांग्रेसयात बियाः एमालें गृह कायेगु खँ दु। प्रधानमन्त्री थःपिं हे जुइधुंकूगुलिं उपप्रधानमन्त्री एमालेयात म्वाः धकाः नं वय्कलं धयादीगु खः ।
उकी अर्थमन्त्री डा. बाबुराम भट्टराई, रक्षामन्त्री (यदि वल धाःसा) कांग्रेसया सुजाता कोइरालायात बीगु खँ नं दुथ्याः। ईश्वर पोखरेलं एमालें गृह काल धाःसा उकी मन्त्री सु जुइ धइगु खँ ला कनामदी तर वय्कःया संकेत धाःसा स्वय्म थःपाखे हे दुगु खँ सूत्रं धाःगु दु। छुं जुयाः एमालें उपप्रधान व अर्थ मन्त्रालय मकाल धाःसा आः उपप्रधान एवं अर्थमन्त्री जुयाच्वंम्ह भरतमोहन अधिकारी लिहां वये माली ।
भरतमोहन लिहां वल धाःसा सरकारय् एमालेपाखें वनीम्ह मेम्ह वरिष्ठ नेता धइम्ह पोखरेल थः हे जुइ। उगु इलय् गृह थःगु ल्हातय् लाकेगु वय्कःया समीकरण खनेदुगु खँ सूत्रं धाःगु दु ।
कांग्रेसं आः तक सरकारय् वयेगु धकाः धाःगु मदुनिसां सुजाता कोइरालां सरकारय् समावेश जुइगु लागिं पार्टी दुने लबिङ्ग यानाच्वंगु दु ।
तर म्हिगः ईश्वर पोखरेलं तःगु थ्व प्रस्ताव कथं सरकार गठन जुल धाःसा प्रधानमन्त्री झलनाथ खनाल रबर स्टाय्म्प जक जुइगु दावी नं सूत्रं याःगु दु। थ्व सरकार खनाल व प्रचण्डया सहमति कथं गठन जूगु खःसां उकी हाली-मुहाली याइपिं धाःसा खनाल व प्रचण्डया विरोधीत जू वनी ।
पोखरेलं थ्व प्रस्ताव म्हिगः माओवादी नेतात प्रचण्ड, डा. बाबुराम भट्टराई, मोहन वैद्य व नारायणकाजी श्रेष्ठ समक्ष तयादीगु खः। उगु इलय् एमालेया माधव नेपाल व खड्ग ओली नं दुगु खः ।
