लिबियाय् संकटय् लानाच्वंपिं नेपाःमि

लिबियाय् न्ह्यानाच्वंगु प्रजातान्त्रिक आन्दोलन हिंसात्मक जुया वयेवं अन रोजगारीया लागिं वनाच्वंपिं नेपाःमित संकटय् लाःगु समाचार पिहां वःगु दु। आन्दोलनं यानाः मुक्कं देय् प्रभावित जुइवं रोजगारीया लागिं वनाच्वपिं नेपाःमित बेरोजगार जूवंगु दु। थ्व अवस्थाय् उमित अन नये त्वने थेंज्याःगु आधारभूत समस्या तकं जुइगु खतरा दु। उकिं उमित अनं गय् यानाः जिउ लित हयेगु हे कुतः जुइमाः। विश्वया मेमेगु देय्तय्सं नं लिबियाय् फँसे जुयाच्वंपिं थः नागरिकत लित हयेत विशेष विमान समेत छ्वयेगु तयारी यानाच्वंगु दु। नेपालं धाःसा बल्लबल्ल उमित लिबियां लित हयाः इजिप्टय् तयेगु ग्वसाः दयेकूगु दु ।

संकटय् लानाच्वंपिं नेपाःमितय्त इजिप्टय् लित हयेगु कुतः सकारात्मक ला जू तर थुकिं जक समस्या धाःसा ज्यनीगु खने मदु। इजिप्टय् नं उमित छुं ज्या दइगु ला मखु। उखे लिबियाया आन्दोलनं गज्याःगु मोड काइगु खः व नं छुं ठेगान दुगु मखु। रोजगारीया लागिं उखे वंपिं नेपाःमित थीथी कथंया त्यासा कयाः वा छेँबुँ हे बरः तयाः उखे वंगु जुइफु। नेपाः सरकारं उमित थ्व समस्यापाखें नं मुक्त जुइकथं राहतया ज्याझ्वः हये मालेफु। थ्व स्वयां न्ह्याः इराकय् च्वंपिं नेपाःमितय्त खतराया कारणं नेपाः लित छ्वयेगु धकाः अमेरिकां कुतः याःबलय् अन च्वंपिं नेपाःमितय्सं हे थःपिंत लित मछ्वयेगु व्यवस्था याना बी माली धकाः नेपाः सरकारयात इनाप याना हःगु खँ ल्वःमंके मजिउ। लिबियाय् संकट जुल धकाः लिहां वःपिं नेपाःमित नेपालय् थ्यंकाः झन् तःधंगु संकटय् मलायेमा, अज्याःगु वातावरण दयेके बीगु पहल सरकारं याना बीमाः ।

More Stories Like this