वेवारिस जुयाच्वन धः सफा याइगु पुखू

कृष्ण

खँ २०३२ सालपाखेया खः। अबलय् ख्वपय् भक्तपुर विकास परियोजना नांगु जर्मन प्रोजेक्ट सञ्चालन जुयाच्वंगु ई। ख्वपया ख्वाःपाः हे हिलेगु ताः तयाः ख्वप नगर पंचायतया स्वीकृति कयाः जर्मन विकास परियोजनां धमाधम ख्वपया थाय्थासय् लँ दयेकेगु, धः दयेकेगु व उगु थासय् च्वंगु देगः, मठ व सतः स्यंल्ह्वं यायेगु ज्या तीब्र ढंगं न्ह्याका यंकल। उगु इलय् ख्वप नगर दुने निकास वनीगु धः व्यवस्थित यायेगु झ्वलय् ६ वडा हनुमानघाट ख्वँह्रेय् व १७ वडाया सल्लाघारीइ निगू उपचार पुखू (टिरटमेन्ट प्लान्ट) नं दयेकाः व्यवस्था याना बिउगु खः। तर जर्मन प्रोजेक्ट लिहां वनेवं धाःसा उगु निगुलिं उपचार पुखू ज्या छ्यले मफयाः अथें बेवारिश अवस्थाय् लानाच्वंगु दु ।

काठमाडौं उपत्यका खानेपानी लिमिटेडपाखें प्रत्येक ग्राहकयाके खानेपानीया महसुल म्हइगु इलय् उकिया ५० प्रतिशत दां धः महसुस कथं कयातःगु दु। तर उमिसं हे तसकं बेवास्ता यानाच्वंगुलिं आः ख्वप नगरया फुक्कं खुसित तसकं हे प्रदुषित जुयाच्वंगु दु। खास यानाः छुं उपचार हे मयासे धलं वःगु फोहर लः तप्यंक खुसिइ यंकाः प्वंकेगु यानातःगुलिं खुसित धमाधम फोहर जुजुं वनाच्वंगु खः। छखे फोहर सफा यानाः जक लः त्वःतीगु पुखू अथें लानाच्वंगु दुसा मेखे फोहर लः ल्वाकज्यानाः खुसित प्रदुषित जुयाच्वंगु दु ।

स्थानीय मनूतय्सं थःपिंसं हे नं छुं उपचार मयासे अनियन्त्रित रुपं छेँ दनेगु व उकिया निकास तप्यंक हे खुसिइ जुका छ्वयेगु प्रबृत्तिं यानाः नं खुसि फोहर जुयाच्वंगु खः। आः ला अन दुगु करोडौं तका वंगु मेसीन नं अथें बेवारिस जुयाच्वंगु दुसा गुलिं सामान खुया नं यंके धुंकूगु अवस्था दु ।

आः तक हनुमानघाट ख्वँह्रे व सल्लाघारीइ च्वंगु उपचार पुखूया साइनबोर्ड धाःसा लिकाःगु मदुनि। अन छम्ह छम्ह पाले नं व्यवस्था यानातःगु दु। तर आः थ्व थाय् पुखू सिबें नं उखेंथुखें च्वंपिनि धू वायेगु व जुवाःद्यःतय् तास म्हितेगु खुल्ला थाय् कथं प्रयोग जुयाच्वंगु दु। अन ताः ई न्ह्यवंनिसें धलं वइगु फोहर लः सफा यायेगु ज्या मजूगुलिं यानाः अनया पुखू आः फोहर मुनाः मैदान हे जुल धाःसां जिउ। सल्लाघारीया उगु जग्गाय् ला ख्वप नगरपालिकां न्हियान्हिथं ख्वप नगर दुने मुनीगु धू यंकाः मुंकेगु व टिपरय् तयाः अनं सिपाडोल गामय् यंकेगु यानाच्वंगु दु। भविष्यय् उगु थाय्यात ख्वप नगरपालिकां फोहर प्रशोधन केन्द्र कथं हे विकास यायेत्यनागु खँ ख्वप नगरपालिका सरसफाई विभागया प्रमुख दिलीप सुवालं सन्ध्या टाइम्स यात कनादिल ।

संस्था थः हे घाटाय् चले जुयाच्वंगुलिं काठमाडौ उपत्यका खानेपानी लिमिटेडं आःयात धः सफा यानाः जक लः खुसिइ छ्वयेगु ज्या न्ह्याके मफयाच्वंगु जानकारी अनया प्रवक्ता सुरेश आचार्यं बियादिल। ख्वप नगरपालिकां धाःसा यदि धः व लःया जिम्मा नगरपालिकायात बिल धाःसा आः थें विदेशी वा सुं दातृ संस्था हे म्वायेक नं ख्वपया धः व लःया व्यवस्था बांलाक याना क्यनेगु दावी यानाच्वंगु दु। आः नं जाम जूगु धः चायेकेगु व न्हूगु धः दयेकेगु नापं स्यंल्ह्वं यायेगु ज्या गनं हे दां वइगु मदुसां बिना महसुलं यानाच्वनागु खँ ख्वप नगरपालिकां धाःगु दु। थुकिया लागिं झिदँ न्ह्यः हे तत्कालीन प्रधानमन्त्री गिरिजाप्रसाद कोइराला समक्ष मागपत्र नं न्ह्यब्वःगु खः।
डा.रोशनराज श्रेष्ठया कथं आः उगु उपचार पुखू हाकनं सञ्चालनय् हयेत नं तसकं हे थाकुइगु खनेदु। उकियात हे हानं चले यायेगु स्वयां ला बरु न्हूगु दयेकाः चले यायेगु हे अःपुइफु। पुलांगु हे संरचनायात हाकनं चले यायेत झन जक खर्च अप्वः जुइगु वय्कःया दावी दु ।

करोडौं दां फुकाः छेँ दने फुपिंसं तकं थःपिनि छेँनं वइगु धः सफा यायेगुपाखे दांछि लगे मयाःगुलिं थज्याःगु समस्या वःगु वय्कःया धापू दु। स्थानीय निकाय, स्थानीय जनता व काठमाडौं उपत्यका खानेपानी लिमिटेड स्वंगुलिं निकायया समन्वयया अभावं आः सल्लाघारीइ व ख्वँह्रे च्वंगु निगुलिं उपचार पुखू अथें सितिं वनाच्वंगु दु ।

More Stories Like this