सम्झौताय् संशोधन मजुइगु दावी
संशोधन जुल धाःसा सरकार भंग: माओवादी
येँ (सन्ध्या टाइम्स)/एमाले अध्यक्ष व माओवादी अध्यक्षं सही यानाः सम्पन्न यानातःगु ७ बुँदे सम्झौतायात संशोधन यायेमाःगु खः लाकि मखु धइगु विषयय् थौं च्वनीगु एमाले केन्द्रीय कमिटीया बैठकं निर्णय याइगु खँ धाःगु दु ।
उगु सम्झौतायात संशोधन यायेमाः लाकि म्वाः धइगु बारे सहलह यायेत म्हिगः च्वंगु पोलिटब्युरो बैठकं संशोधन प्रस्ताव तयार यात धकाः ओली पक्षं पिने धायेगु याःसां उखे झलनाथ पक्षं धाःसा बैठकय् संशोधनया प्रस्ताव हे वःगु मदु, सम्झौता गथे खः अथे पारित जुइ धकाः दावी याना हःगु दु। छगू हे बैठकयात कयाः निगू पक्षं निता अलग अलग हे खँ पित हयाच्वंगु खनाः धाःसा सर्वसाधारण मनूत अजू चायाच्वंगु दु ।
खनाल पक्षया नेतातय्सं संशोधन प्रस्ताव तयार हे याःगु मदु अथे जूगुलिं थौं च्वनीगु केन्द्रीय बैठकं उकियात याउँक हे अनुमोदन याइ धकाः दावी यानाच्वंगु दु। खनाल पक्षया केन्द्रीय दुजः राजेन्द्र श्रेष्ठं 'सन्ध्या टाइम्स' यात कनादी कथं यदि संशोधन वा स्पष्ट यायेमाःगु आवश्यक जुल धाःसा सरकारं पेश याइगु नीति तथा कार्यक्रमय् स्पष्ट यायेगु सहमति जूगु दु, आःयात छुं हे मयायेगु निर्णय म्हिगःया बैठकं याःगु खः ।
म्हिगःया बैठकय् संशोधन यायेगु खँ हे मजूगु कारणं बैठक याकनं सिधःगु व सम्भवतः थौं च्वनीगु केन्द्रीय बैठक नं याकनं हे क्वचाइगु दावी नं वय्कलं यानादिल ।
ओली पुचःया नेतातय्सं धाःसा सम्झौताय् उल्लेख जुयाच्वंगु माओवादी लडाकुतय् बिस्कं युनिट तयेगु खँ, निगू पार्टीया दथुइ पालंपाः सत्ताया नेतृत्व यायेगु खँ, जनताया समावेशी गणतन्त्र धकाः च्वयातःगु शव्दया खँ संशोधन यायेमाः धकाः थःपिंसं तयागु प्रस्तावयात केन्द्रीय कमिटीया बैठकय् यंकेगु धकाः पोलिटब्युरों पारित याःगु दु। लिसें आःयात गृह मन्त्रालय प्रधानमन्त्रीं हे कयाः मन्त्रिमण्डल विस्तार यायेगु धकाः नं बैठकं निर्णय याःगु दु ।
उखे माओवादीं धाःसा ७ बुँदे सम्झौताय् संशोधन यायेगु धकाः पिहां वयाच्वंगु खँयात थःपिंसं स्वीकार मयायेगु खँ धाःगु दु। एमाले नेतातय्सं धयाच्वं कथं सम्झौताय् संशोधन यायेत थःपिं पटक्क हे तयार मदु धकाः माओवादी नेतातय्सं म्हिगः हे प्रतिक्रिया बीधुंकूगु दु ।
