मांभाय् दिवस हनाया सार्थकता

संयुक्त राष्ट्र संघं हे विश्वया दक्वं मांभाय्या रक्षा जुइमा धइगु ताः तयाः घोषणा यानातःगु अन्तर्राष्ट्रिय मांभाय् दिवस म्हिगः नेपालय् नं न्यायेकल। नेपाः छगू आपालं मांभाय् दुगु देय् जूगु कारणं फुक्कं भाय्या रक्षा जुइमा धइगु ताः तयाः न्यायेका वयाच्वंगु मांभाय् दिवसया थन थःगु हे महत्व दु। उकिसनं थौं नेपाः राज्य पुनर्संरचना यानाः न्हूगु मुलुक जुइगु लँपुइ न्ह्यानाच्वंगु इलय् थज्याःगु दिवस हनाया बिस्कं महत्व दइगु स्वाभाविक खः ।

मांभाय् दिवसयात मात्र छगू लसताया न्हि कथं जक हनेगु धकाः राष्ट्र संघं थ्व दिवस घोषणा यानातःगु मखु। उकिया उद्देश्य विश्वया गुगुं नं मांभाय् लोप मजुइमा, बरु संरक्षण जुइमा व विश्वन्यंकं बहुभाषी संस्कार विकास जुइमा धइगु खः। संसार हे विविध संस्कृतिं जायाच्वंगु दु। नेपाः थेंज्याःगु देश ला झन् विविध संस्कृतिया धनी हे जुल। संस्कृतिया विविधतां यानाः थवंथवय् संवादया कमी जुयाच्वनी। संवादया कमीं थवंथवय् द्वन्द्व सिर्जना जू वनीगु सम्भावना नं उतिकं दया बी। विविधतापूर्व समाजय् द्वन्द्व सिर्जना मजुइमा बरु थवंथवय् सहमति व सद्भावया वातावरण सिर्जना जुइमा धकाः राष्ट्र संघं बहुभाषी संस्कारया विकास यायेमाः धइगु खँय् बः बिउगु खः। थौं नेपाः अज्याःगु हे बहुभाषी संस्कार विकास यानाः समानतापूर्ण समाज निर्माण यायेगु लँपुइ न्ह्याः वनाच्वंगु दु। यदि नेपाःयात अज्याःगु समाज दयेकेगुपाखे कुतः मजुल धाःसा थन हानं हानं नं थीथी कथंया द्वन्द्वं थाय् कयाच्वनीगु निश्चित दु। थौं मांभाय् दिवस हनेगु ज्यां देय्या सकलें नीति निर्मातातय्त थुलि खँ थुइके फत धाःसा उकिया सार्थकता नं दइगु खइ ।

More Stories Like this