मातृभाषा दिवसया लसताय् गोष्ठी
अन्तराष्ट्रिय मातृभाषा दिवसया लसताय् थौं नेपाल प्रज्ञा प्रतिष्ठान व आदिवास जनजाति उत्थान राष्ट्रिय प्रतिष्ठानया मंकाः ग्वसालय् नेपाःया मांभाय् विषयस छगू बिचाः गोष्ठी जुल ।
ज्याझ्वलय् मूपाहाँ प्राध्यापक मानिकलाल श्रेष्ठं देय्या फुक्कं भाय्यात सम्मान दृष्टिं स्वयेमाःगु धयादिल । वय्कलं भाय्या व्यवस्था राजनीतिक व्यवस्था अनुकुल जुइगुलिं फुक्कसिनं उखे पाखें ध्यान बीमाःगु खँय् बः बियादिल ।
अथेहे ज्याझ्वलय् नेवाः न्ह्यलुवाः मल्ल के. सुन्दरं 'भाषिक सवाल : मानवअधिकारया मिखां' विषयस कार्यपत्र पेश यानादीगु खः । कार्यपत्रय् भाषिक सवाल मनूतय् अभिव्यक्ति स्वतन्त्रता, सूचना व शिक्षाय् निर्वाध पहुँच व सांस्कृतिक पहिचानया हक नाप स्वापु दुगु खँ न्ह्यथनादीगु खः । कार्यपत्रयात कयाः अमरेशनारायण झां टिप्पणी यानादीगु खः ।
उगु बिचाः गोष्ठी स्वयां न्ह्यः प्रज्ञा प्रतिष्ठान व जनजाति उत्थान प्रतिष्ठानया हे मंकाः ग्वसलाय् बहुभाषिक किवता बाचन ज्याझ्वलय् जूगु खः । कविता गोष्ठीइ जनकवि दुर्गालाल श्रेष्ठ लगायत थीथी भाषाया कवितय्सं थःथःगु मांभासं कविता बाचन याःगु खः ।
ज्याझ्वलय् नेपाःया निंतिं बंगलादेशी राजदूत डा. निपचन्द्र भोउमिकं मांभाय् जातिय पहिचान व मानवअधिकार जूगुलिं मांभाय् संरक्षण व विकास निरन्तर रुपं जुइमाःगु धयादीगु खः ।
Related Stories
मांभाय्या लागि ज्यान पाःगु व दिं थौं फेब्रुवरी २१ तारिक अथेधयागु अन्तराष्ट्रिय मातृभाषा दिवस
