देय् दबू येँ जिल्ला समितिया दँ मुँज्या क्वचाल

नेवाः देय् दबू येँ जिल्ला समितिया न्याक्वःगु दँ मुँज्याः क्वचाःगु दु । येँय् जिल्ला समितिया नायः न्हुछेकाजि महर्जनया नायःसुइ मुँज्या सम्पन्न जूगु खः ।

मुँज्याय् मूपाहाँ नेवाः देय् दबूया संरक्षक लक्ष्मण राजवंशीं नेपालभाषां न्हापांगु खुसी पठनपाठन शुरु यानाः मां भाय्या विकासय् योगदान ब्यूगु जगत सुन्दर ब्वनेकुथीयात हनादीगु खः ।

ज्याझ्वलय् न्ववानादिसें मूपाहाँ राजवंशीं भाषाया निंतिं जक नेवाःतय्सं यानावयाच्वंगु आन्दोलन आः वयाः समग्र नेवाः जातिया निंतिं नेवाः आन्दोलन कथं विकास जूगु धयादिसें थुगु आन्दोलनया नेतृत्व यायेगु जिम्मा नेवाः देय् दबूलिं कायेमाःगु खँय् बः बियादिल ।

देय् दबुया नायः नरेश ताम्राकारं नेवाः समुदाय दुने विभेद मदयेधुंकूसां सरकारं निगू नेवाः जातियात दलित धकाः सुचिकृत यानाः नेवाःत दथुइ फुट हयेत स्वःगु धासें कुंखिनादिल । वय्कलं इलय् हे नेवाः राज्य सहितया संविधान निर्माणया निंतिं दवाब बीत फुक्कं नेवाःत हानं छक्वः छप्पँ जुइमाःगु ई वःगुलिं सकल नेवाःत जानाः दबाव बीत इनाप यानादिल ।

मुँज्याय् येँय् जिल्ला समितिया छ्याञ्जे मचाराजा महर्जनं दच्छियंक जूगु ज्याझ्वः व आगामी ज्याझ्वःया बारे कनादीगु खःसा दांभरि अञ्जला ताम्राकारं दच्छिया आर्थिक विवरण पेश यानादीगु खः ।

More Stories Like this