कन्हय् झलनाथया परीक्षा
येँ (सन्ध्या टाइम्स)/एमालेया वरिष्ठ नेता माधवकुमार नेपाल व केपी शर्मा ओलीं केन्द्रीय कमिटीया बैठकपाखें माओवादीलिसे जूगु न्हय्गू बुँदाया सहमतियात विफल यानाः वर्तमान सरकारयात क्वःथलेगु दाउ म्हिताच्वंगु खँ सूत्रं धाःगु दु ।
गथे यानाः जिउ अथे यानाः पार्टीया अध्यक्ष खनाल विरुद्ध बहुमत खाकेगु नितिं कुतः यायेगु झ्वलय् वय्कःपिंसं केन्द्रीय दुजःत नापलायेगु नापं सहलह ब्याकेगु यानाच्वंगु दु। माओवादी अध्यक्ष प्रचण्डलिसे एमालेया अध्यक्ष झलनाथ खनालं यानादीगु सहमतियात अनुमोदन मयायेवं नैतिकताया आधारय् खनालं प्रधानमन्त्री पदं राजीनामा बीमालीगु अवस्था वइगु अले न्हापा थें हे नेपाली कांग्रेस नापं मधेसवादी दलत जानाः सरकार दयेकेगु निंतिं माधव-ओली पक्षं कुतः यानाच्वंगु दु। उकिया निंतिं माघव ओली नापनापं विद्या भण्डारी, ईश्वर पोखरेल, विष्णु पौडेल व शंकर पोखरेल क्रियाशील जुयाच्वंगु दु। अथे हे संस्थापन पक्षं नं गुगुं हालतय् केन्द्रीय कमिटीइ बहुमत हयेगु नितिं तयारी यानाच्वंगु दु। माओवादीलिसे जूगु सहमतियात अनुमोदन यायेगु नितिं केन्द्रीय कमिटीइ बहुमत खाकेत कुतः यानाच्वंगु दु। संस्थापन पक्षया नितिं प्रधानमन्त्री खनाल नापं बामदेव गौतम, भरतमोहन अधिकारी, युवराज ज्ञवाली, अशोक राई, राजेन्द्र श्रेष्ठपिं क्रियाशील जुयाच्वंगु दु ।
एमालेया थौं सुथंनिसें पोलिटब्यूरोया बैठक जुयाच्वंगु दु। बल्खुइ जुयाच्वंगु उगु बैठकय् पार्टी अध्यक्ष नापं प्रधानमन्त्री झलनाथ खनालं एकीकृत माओवादीलिसे जूगु न्हय्गू बुँदाया सहमति नापं वर्तमान सरकारया विषययात कयाः ब्रिफिङ यानादीगु ज्याझ्वः दु। बैठकय् लिपांगु विकसित राजनीतिक घटनाक्रम बारे नं सहलह जुइगु नापं कन्हय् च्वनीगु केन्द्रीय कमिटीया बैठकया एजेण्डा तयार याइ धाःगु दु। नेतातय्सं पोलिटब्यूरो बैठकय् थःथःपिनिगु धारणा तयेगु ज्या धाःसा जुइ मखु धाःगु दु। कन्हय्या केन्द्रीय कमिटीया बैठकय् जक नेतातय्सं थःथःपिनि धारणा तयेगु याइ ।
प्रधानमन्त्री नापं एमाले अध्यक्ष खनाल पोलिटब्यूरोय् अल्पमतय् दु। माधव नेपाल व केपी शर्मा ओली थौंकन्हय् छथाय् हे च्वनाच्वंगुलिं वय्कःपिनि पक्षय् बहुमत दु। केन्द्रीय कमिटीइ धाःसा झलनाथ पक्ष व माधव-ओली पक्ष बराबरी धइथें लानाच्वंगु अवस्था दु। थुगुसीया केन्द्रीय कमिटीं माओवादीलिसे जूगु न्हय्गू बुँदाया सहमतियात अनुमोदन यायेगु लाकि मयायेगु धकाः निर्णय याइ ।
एमालेया छम्ह नेतां बियादीगु जानकारी कथं केन्द्रीय कमिटीइ मुक्कं ८५ म्ह दुजः दुगुली थुगुसी झलनाथ खनाल पक्षय् थ्यंमथ्यं ४५ म्ह दइगु अवस्था दु। बैठकय् संस्थापन पक्षया बहुमत दइगु व माओवादीलिसे जूगु सहमतियात अनुमोदन याइ धाःगु दु। कन्हय् ११ बजेनिसें न्ह्याइगु बैठकय् यक्व हे नेतातय्सं थःथःपिनिगु धापू तयेत स्वल धाःसा बैठक निन्हु स्वन्हु तक नं जुइफु धाःगु दु ।
