नेवाः स्वायत्त राज्यय् अग्राधिकारया अभ्यास

नेवाः लागा दुने नेवाः शासनया अनुभूति यायेगु लागिं माआवादी समर्थित एकीकृत नेवाः राष्ट्रिय मुक्ति मोर्चापाखें आः नेवाः लागाया नुगःचु जुयाच्वंगु येँ जिल्लाया फुक्क हे ख्यलय् थनया आदिवासी नेवाः जनतायात अग्राधिकार बीमाःगु माग यासें पलाः न्ह्याकेत्यंगु समाचार वःगु दु। थ्व नेवाः जनता लगायत जातीय स्वशासनया पक्षधर सकलें जनताया लागिं लसताया खँ खः। नेवाः राष्ट्रिय मुक्ति मोर्चां नेवाःतय् लागिं यायेत्यंगु थ्व ज्यायात सकलें नेवाः लगायत जातीय स्वशासनया पक्षधरतय्सं छुं हे कथंया पूर्वाग्रह मसे सक्रिय यायेमाः ।

मुक्ति मोर्चापाखें यायेत्यंगु थ्व ज्याया खास यानाः निता अर्थ दयेफु। छगू ला नेवाः स्वायत्त राज्य घोषणा जुइबलय् उकियात संचालन यायेगु ज्याय् छुं नं कथंया अन्यौल मजुइमा धकाः पूर्व तयारी यायेगु। मेगु, जातीय स्वशासन सहितया संघीय व्यवस्था उल्लेख जुयाच्वंगु न्हूगु संविधान जारी यायेत राजनीतिक दलतय्त दवाव बीगु। थौं राजनीतिक पार्टीतय्सं फुसा संविधान हे मबीगु व मफुसा संघीय व्यवस्था मदुगु संविधान बीगु धकाः गुगु तयारी यानाच्वंगु खः उकियात हाथ्या बीगु लागिं नं जनस्तरपाखें थुकथंया गतिविधित न्ह्याकेमाःगु अतिकं हथाय् जुइधुंकूगु दु। नेवाः मुक्ति मोर्चा माओवादीया भातृ निकाय खःसां स्वयम् माओवादीयात हे दवाव बीगु लागिं नं मोर्चापाखें थज्याःगु ज्या यायेमाःगु आवश्यकता दु। मेमेगु पार्टीया नेवाः भातृ संगठनतय्सं नं थुकियात हे समर्थन यानाः वा थज्याःगु हे मेगु कथंया ज्याझ्वःत याना यंकल धाःसा उकिं अवश्य नं राजनीतिक पार्टीतय्त दवाव सिर्जना जू वनी ।

More Stories Like this