प्रम खनालं देशयात संकटं मुक्त याइ ला?

विवादय् लानाच्वंगु गृह मन्त्रालय माओवादीयात बीगु लाकि मबीगु धकाः पिहां वःगु विवाद व उकी प्रधानमन्त्री झलनाथ खनालं म्हितादीगु भूमिकायात स्वयेबलय् प्रम खनालया नेतृत्व क्षमताय् आपालं न्ह्यसः पिहां वःगु दु। व प्रकरणं वय्कः वास्तवय् नेतृत्व क्षमता मदुम्ह व निर्णय बीगु दक्षता मदुम्ह नेता धइगु क्यना बिउ। थथे माःगु इलय् माःगु निर्णय बी मफुम्ह मनुखं देय्या प्रधानमन्त्री थेंज्याःगु प्रमुख कार्यकारी पदय् च्वनाः गय् ज्या याइ, व नं थौं प्रमुख न्ह्यसः जुयाः पिहां वयाच्वंगु दु ।

प्रधानमन्त्री खनालपाखें आः जक मखु थ्व स्वयां न्ह्यः नं थःपिंसं हे याना थकागु निर्णययात लिपा थःपिंसं हे उल्टे याना थकूगु दसुत दु। प्रधानसेनापति रुक्मांगत कटवाल प्रकरण वय्कःया थज्याःगु हे प्रवृत्तिया उपज खः। आः नं सरकारं गृहमन्त्री माओवादीयात बी मजिउ धकाः एमाले दुनेया निम्ह प्यम्ह अज्याःपिं नेतातय् बथानं दवाव बियाच्वंगु दु गुमित वंगु चुनावय् जनतां बांमलाक पराजित याना बिउगु खः। माधव नेपाल, खड्ग ओली, विद्या भण्डारी, ईश्वर पोखरेल थेंज्याःपिं जनतापाखें तिरष्कृत नेतातय्सं थौं जनतां अत्यधिक मत बियाः त्याका हःगु पार्टीयात फलाना मन्त्रालय बी जिउ, फलाना बी मजिउ धकाः निर्देशन बिउ वयाच्वंगु दु। देशय् वःगु लोकतन्त्रया थ्व ति तःधंगु बिजोग मेगु छु दइ? अले थःगु पार्टी दुने थुकथंया अनुचित दवाव वयाच्वनं नं उकियात लिसः बियाछ्वये मफुम्ह मनू देशया प्रधानमन्त्री जुयाच्वंगु दु, थ्व ति तःधंगु विडम्बना नं मेगु छु दइ? थौं थ्व समस्या समाधान जुया हे वंसां नं यदि प्रम खनालया पह थथे हे जुयाच्वन धाःसा देश संकटं मुक्त जुइ धाये फइ मखु ।

More Stories Like this