थौं फेब्रुवरी २१ तारिक अथेधयागु अन्तराष्ट्रिय मातृभाषा दिवस

थौं फेब्रुवरी २१ तारिक अथेधयागु अन्तराष्ट्रिय मातृभाषा दिवस । नेपालय् नं थीथी ज्याभुवः याना हनाच्वंगु दु ।

नेपाल प्रज्ञाप्रतिष्ठान व आदिवासी जनजाति उत्थान राष्ट्रिय प्रतिष्ठानं अन्तराष्ट्रिय मातृभाषा दिवसया लसताय् येँ याःगु ज्याझ्वलय् जनकवि दुर्गालाल श्रेष्ठं कवितात्मक अभिव्यक्ति न्यंकादिल मातृभाषायात कया ।

छुं नं जातिया म्हसिका जुयाब्यूगु मातृभाषायात संरक्षण सम्बद्धन यायेगु राज्यया दायित्व खः । नेपालय् गुइनिगू भाषा दुगु तथ्यकं दु । उिकं नेपाः छगू बहुभाषिक देय् खःसां राज्यया एकल नीतिया हुनिं यक्वः हे मातृभाषा लोप जुइधुंकूगु दुसा गुलिखे लोपोन्मुख अवस्थाय् थ्यंगु दु । थनया भाषायात सम्पदाया दृष्टीकोणं जक स्वयेगु याः । तर थुकियात बृहत आयामं थुइकेगु कोसिस मयागु धापू अधिकारकर्मीतय् खः । अथेजूगुलिं इमिसं फुक्क भाषायात समान अधिकार बिया छ्यलेगु क्षेत्र क्वःछिइमाःगु माग याना वयाच्वंगु दु ।

आः हलिमय् खुद्वः गुसः व झिंनिगू भाय् दुगु अध्ययन क्यं । गुकिमध्ये न्याद्वः भाषाया वक्तात छगू लखया हाराहारी दु । उकि मध्ये चय्गु निसें चय्प्यंगू प्रतिशत भाषाया वक्तात लोपोन्मुख अवस्थाय् दु । प्रत्येक निवाः दुने छगू भाषाया लिपांम्ह वक्ता सीगु यानाच्वंगु अनुसन्धानं क्यंगु दु । थुकथं लोप जुइगु भाषात आदिवासी जनजाति दुनेया हे जूगु अधिकारकर्मीतय् धापू दु । अथेजूगुलिं नं नेपालय् आदिवासी जनजाति व मधेशी समुदाय भाषिक अधिकारया निंतिं आन्दोलनरत जुयाच्वंगु दु । इमिसं न्हूगु संविधानय् भाषा आयोग दयेका निर्णय यायेगु धासें मातृभाषाया अधिकारयात पन्छेयायेगु कुतः याःगु द्वपं तकं बियाच्वंगु दु । अथेला नेपाल राष्ट्रिय प्रज्ञाप्रतिष्ठानं ब्यागलं मातृभाषाया विभाग खडा याना मातृभाषाया साहित्ययात संरक्षण यायेगु कुतः ला यानाच्वंगु दु ।

अथेहे आदिवासी जनजाति उत्थान राष्ट्रिय प्रतिष्ठानं लोपोन्मुख भाषाया मालेज्या याना अभिलेखिकरण यानाः वयाच्वंगु दु । सन् १९९९ स संयुक्त राष्ट्रसंघं घोषणा यायेवं फेब्रुवरी २१ तारिख हिलंन्यंकं थुगु दिवस हनेगु याःगु दु । नेपालय् धाःसा दिवसया भुवलय् प्रज्ञाप्रतिष्ठानं हंगु थ्व निक्वःगु ज्याभुवलय् वाम्बुले राई किसान मुगाली उराउ ल्होमी केवरत थामी सन्थाल नापंया नीखुगू भाषाय् कविता वाचन याःगु दु ।

Related Stories

मांभाय्‌या लागि ज्यान पाःगु व दिं
मातृभाषा दिवसया लसताय् गोष्ठी

More Stories Like this

काेरियाय् नेवाः भ्वय्, नम्रता श्रेष्ठयात हन
न्यूयाेर्कय् इहि
राजनीतिक दलतय् घोषणापत्र व नेवाः दृष्टिकोण
किपुली मंकाः बाखं गोष्ठि
"वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी