'गृहमन्त्री बी मफइगु जुल'
सरकारया फुक्कं विकल्प खुल्ला: प्रचण्ड
येँ (सन्ध्या टाइम्स)/प्रधानमन्त्री एवं एमालेया अध्यक्ष झलनाथ खनालं थौं सुथय् माओवादी अध्यक्ष प्रचण्डलिसे जूगु खँल्हाबल्हाय् माओवादीयात गृह मन्त्रालय बी हे मफइगु जुल धकाः थःगु 'बाध्यता' प्वंकादीगु दु ।
प्रधानमन्त्री निवास वालुवाटारय् जूगु भेटवार्ताय् वय्कलं आःया निंतिं गृह मन्त्रालय प्रधानमन्त्रीया हे मातहतय् तयाः मन्त्रिपरिषद् विस्तार यायेगु प्रस्ताव नं तयादीगु दु।
प्रम नापलानाः पिहां वःम्ह प्रचण्ड अन वयाच्वंपिं सचारकर्मीतय्त नं छुं हे प्रतिक्रिया मबिसे वनाछ्वःगु खः।
अथे हे ४५ मिनेट तक जूगु उगु भेटवार्ताय् निम्ह नेतातय् दथुइ सहमति कथं हे सरकारयात गुलि फु उलि याकनं पूर्णता बीगु बारे सहलह जूगु खँ प्रधानमन्त्रीया प्रेस सहयोगी सूर्य थापां कनादीगु दु ।
एमाले स्थायी समिति व माओवादी स्थायी समितिया म्हिगः अलग अलग बैठक धुंकाः थौं सुथ न्हापां हे निम्ह नेतातय् दथुइ भेटवार्ता जूगु खः ।
म्हिगः जक एमाले स्थायी समितिया बैठकय् माओवादीयात गुगुं हालतय् नं गृह मन्त्रालय बी मजिउ धकाः वरिष्ठ नेता केपी ओली व माधव नेपाल पक्षधर दुजःतय्सं दबाब बीगु ज्या याःगु खः ।
थ्वहे दथुइ मेखे कार्यकर्तातय्त प्रशिक्षण बीगु नितिं थौं हे बाराया सिमराय् थ्यंकः वंम्ह एकीकृत माओवादीया अध्यक्ष प्रचण्डं सरकार दयेकेगु सवालय् फुक्क हे विकल्प खुल्ला यायेगु जुइ धयादीगु दु ।
सिमराय् संचारकर्मीलिसे खँल्हासें अध्यक्ष प्रचण्डं गृह मन्त्रालयया निंतिं प्रधानमन्त्री पद त्वःतागु मखु धासें देशय् राजनीतिक गतिरोध अन्त्य यायेत थःपिंसं झलनाथ खनालयात समर्थन यानागु खः धयादिल ।
थौं सुथय् प्रधानमन्त्री खनाललिसे जूगु भेटवार्ताया जानकारी बिसें वय्कलं वार्ताय् विचार काल बिल यायेगु ज्या जूगु व थःपिंसं सरकारयात निरन्तर रुपं समर्थन यानाच्वनागु दु धयादिसें अध्यक्ष प्रचण्डं एमाले पार्टी दुनेया समस्या याकनं हे समाधान यात धाःसा थःपिं नं सरकारय् वनेगु जुइ धयादिल ।
