घरेलु उद्योग प्रदर्शनी

कृष्ण

घरेलु तथा साना उद्योग विकास समितिया ग्वसालय् म्हिगःनिसें न्यान्हु यंकं न्ह्याइगु नीनिक्वःगु राष्ट्रिय औद्योगिक प्रदर्शनी शुरु जुल। येँया भृकुटीमण्डपय् न्हिंन्हिं सुथय् १०:३० बजेनिसें ६ बजे तक थ्व प्रदर्शनी खुल्ला जुइ ।

२०४२ सालंनिसें घरेलु तथा साना उद्योग विकास समितिं दँय्दसं थज्याःगु प्रदर्शनी न्ह्याका वयाच्वंगु दु। थीथी संघ संस्थातय्त थःपिनि उत्पादन प्रदर्शनी यायेगु चलन नं घरेलुं हे याकूगु खः ।

थौं स्वयां नीन्यादँ न्ह्यवंनिसें प्रदर्शनी यानाः थुगुसी भृकुटी मण्डपया तःधंगु हलय् तक थ्यंकेगु ज्याय् तःधंगु योगदान दुम्ह थुगुसीया प्रदर्शनीया संयोजक मय्जु निलम ताम्राकारया कथं न्हापा संस्था डिल्लीबजारय् दुगु इलय् अन छगः टेबुलय् जक प्रदर्शनी जुइगु खः। आः निसः व चाःचू स्टलं प्रदर्शनी जायाच्वंगु दु। थुकी स्वनिगःया १३० व पिने जिल्लाया ११० गू संस्थाया स्टल दु। 'लघु तथा साना घरेलु उद्योग प्रदर्शनी' नामं शुरु जूगु उगु प्रदर्शनी नेपाःया हे दकलय् तःधंगु प्रदर्शनी जुयाच्वंगु दु ।

भृकुटीमण्डपय् प्रदर्शनी यायेबलय् न्हापा न्हिं ख्वीद्वः दां पूसा गाःथाय् थुगुसीनिसें न्हिं छगू लाख नीन्याद्वः तका काःगु दु। उकिं थन प्रदर्शनी यायेगु आः थाकुगु ज्या जुइ धुंकूगु खँ मय्जु ताम्राकारं कनादी ।

थ्व प्रदर्शनीइ विशेष रुपं सिँ, ल्वहं, धातु, सेरामिक्सया थल छथाय् तयातःगु दुसा गलैंचा, राडी थेंज्याःगु उनी सुती ज्वलं मेगु थासय् दु। लोक्ता, जूट व परम्परागत रुपं प्रशोधन यानातःगु रेशाया ज्वलंया मेगु हे स्टल दु। अथे हे छ्यंगूया ज्वलं, बस्तु व सेवाया ज्वलं अलग अलग यानाः तयातःगु दु। अथें हे रोल्पाया रेशाया कापः, दोलखाया न्हाय्कंया पाउडर, जुम्लाया स्याउया चाना, जिरीया चीज, दैलेखया लाकां अले डोल्पाया यार्सागुम्बा नं थन ब्वयातःगु दु ।

प्यंगू सहआयोजक, खुगू प्रायोजक व प्यंगू प्रवर्द्धक नापं झिंप्यंगू संस्थाया संलग्नताय् न्ह्यानाच्वंगु थुगु प्रदर्शनीइ स्वंगू सरकारीस्तरया संस्था दु। टोखाया चाकुंनिसें कयाः व्यक्ति, संस्था व पुचःया थीथी प्रस्तुति नापं मिस्तय्त अप्वः थाय् बियातःगु थुगु प्रदर्शनी छगू ल्याखं छेँय् हे च्वनाः उद्योग चले यानाच्वंगुयात प्रवर्द्धनया कुतः थें खनेदु ।

थुगु प्रदर्शनीइ सिरपाः लाःम्ह प्रदर्शकयात विदेश भ्रमण याकेगु व्यवस्था यानातःगु उगु प्रदर्शनीइ मेमेगु नं सिरपाःत तयातःगु दु। क्रेता व बिक्रेता नाप लाकेगु हे जक थःपिनि ग्वसाः खःसां आपालं सामान बिक्री जुइगु व गुगुं इलय् ला स्टल हे उठे याना यंकीपिं तकं दुगु खँ संयोजक ताम्राकारं कनादिल। नेपालय् ततःधंगु उद्योग सिबें नं चिचीधंगु व घरेलु उद्योग हे विकास याःसा गांगामय् च्वंपिं व यक्व लगानी याये मफुपिंसं नं व्यवसाय याये फइगु खँ धायेगु याः। थज्याःगु ज्यायात प्रवर्द्धन यायेत नं थुकथंया ब्वज्यां यक्व तिबः बीगु दावी मय्जु ताम्राकारं यानादी ।

More Stories Like this