ओलीयात पेले यानाः हे वनीगु
माओवादीयात गृह नापं ११ मन्त्रालय बीगु
येँ (सन्ध्या टाइम्स)/चांन्हि थःगु विरोध यानाः सरकार गठनय् पंगः थनाच्वंम्ह शक्तिशाली नेता खड्ग ओलीयात वालुवाटारय् दु हे मकासे लित छ्वयेगु घटनाया नापनापं प्रधानमन्त्री झलनाथ खनालं अन्ततः ओली-नेपाल गुटयात पेले यानाः हे न्ह्याः वनेगु निर्णय याःगु दु। ओली-नेपाल गुटं विरोध यानाच्वंसां नं प्रम खनालं विवादास्पद गृह मन्त्रालय समेत माओवादीयात बियाः सम्भवतः थौं मन्त्रिपरिषद् विस्तार यानादीगु खँ धाःगु दु ।
म्हिगः माओवादी अध्यक्ष प्रचण्डलिसे वय्कलं यानादीगु वार्ता लिपा माओवादीयात गृह सहित ११ गू मन्त्रालय बीत प्रम खनाल सहमत जुयादीगु खः। माओवादीं नं थःत ११ मन्त्रालय हे माग यानाच्वंगु खः। आः न्हूगु समीकरण कथं माओवादीयात गृह सहित ११, एमालेयात प्रम सहित ८ व मेगु पार्टीतय्त ७ मन्त्रालय बीगु जूगु दु ।
माओवादीपाखें कृष्णबहादुर महराया नेतृत्वय् सरकारय् वनीसा उकी वर्षमान पुन (अनन्त), टोपबहादुर रायमाझी, दीनानाथ शर्मा, देव गुरुङ, अग्नि सापकोटा, शक्ति बस्नेत, जयपुरी घर्तीया नां नं दुथ्याना च्वंगु दु। सुयात छु मन्त्रालय बीगु धइगु खँ धाःसा थौ च्वनीगु माओवादी बैठकं जक निर्णय याइ धाःगु दु ।
प्रधानमन्त्री झलनाथ खनालं थम्हं हे थ्वहे सूत्र कथं मन्त्रिमण्डल विस्तार यायेत्यनागु जानकारी जक स्थायी समितियात बीगु मनःस्थिति दयेकादीगु दु। स्थायी समितिइ थःगु बहुमत मदुगु कारणं वय्कलं माःगु निर्णय केन्द्रीय कमिटीया बैठकं यायेगु धकाः नं जानकारी बियादीगु खँ सूत्रं धाःगु दु। तर केन्द्रीय कमिटीया बैठक धाःसा गबलय् सःतीगु खः उकिया छुं निश्चित मदुनिगु खँ नं सूत्रं धाःगु दु ।
उखे पार्टी दुने वय्कःया विरोध यानाच्वंम्ह नेता केपी ओलीं यदि पार्टीं यानातःगु निर्णयया अःखः प्रधानमन्त्री वन धाःसा वय्कःयात कारवाही यायेगु कथंया प्रक्रिया पार्टीं शुरु यायेफु धकाः ख्याच्वः बियादीगु दु। म्हिगः बीबीसी नेपाली सेवालिसे खँ ल्हासें वय्कलं पार्टीया निर्णय अःखः प्रधानमन्त्री वने दइ मखु व गृहय् नं बिष्णु पौडेल बाहेक मेपिं सुं नं छ्वयेगु जुइ मखु धकाः स्पष्ट रुपं धयादीगु दु ।
