मध्यपूर्वय् वयाच्वंगु प्रजातन्त्रया लहर

ट्यूनिशियां शुरु जूगु आन्दोलनया मिं आः मध्यपूर्वयात पूर्ण रुपं हे प्रभावित याइगु सम्भावना ब्वलंगु दु। सन् १९९० य् वामपन्थी सत्ता विरुद्ध विश्वन्यंकं ब्वलना वःगु आन्दोलनया लहरं संसारया आपालं देशय् प्रजातन्त्र पलिस्था याना बिउ थें आः इस्लाम धर्मया नामं शासन यानाच्वंगु अरब विश्वय् नं आन्दोलनया अज्याःगु हे ज्वार दनाः प्रजातन्त्रया लहर हया बीगु खः लाकि धइगु अनुमान विश्लेषकतय्सं याना हःगु दु। खास यानाः इजिप्टया राष्ट्रपति होस्नी मुबारक सत्ता त्वःताः बिसिउँ वंगु घटनां आः मध्यपूर्वय् प्रजातन्त्रया लहरयात पने फइ मखुत लाकि धइगु अनुमान जुया वःगु खः। इजिप्ट लिपा आः मध्यपूर्वया मेगु महत्वपूर्ण देय् इरान व बहराइनय् नं आन्दोलनया मि च्याःगु दु। अन ततःधंक हे आन्दोलन शुरु जुइधुंकूगु दुसा मेखे कर्णेल कद्दाफीं तःदँ न्ह्यवंनिसें शासन याना वयाच्वंगु देय् लिबियाय् नं प्रदर्शन शुरु जूगु समाचार वःगु दु। मध्यपूर्वय् थुकथं हे आन्दोलन न्ह्याना वन धाःसा उगु लागाया दकलय् महत्वपूर्ण मुलुक साउदी अरब, जोर्डन थेंज्याःगु देशय् नं मि मच्याइ धाये फइ मखु। यदि साउदी अरब आन्दोलनया ग्वःफसय् लात धाःसा उकिया लिच्वः कतार, कुवेत, लेवनान, सिरिया आदि थेंज्याःगु देशय् तप्यंक हे लाः वनी। थ्व देशय् जुइगु आन्दोलन यदि अनियन्त्रित जुल धाःसा उकिं विश्वया चिकं बजाः उथलपुथल यानाः विश्व अर्थतन्त्रयात हे प्रभावित याना बीगु निश्चित दु। लिसें अमेरिका व युरोपया नं आपालं महत्वपूर्ण देशतय् तःधंगु पुँजी थ्वहे लागाय् लगानी जुयाच्वंगु कारणं उकिं अमेरिकायात नं तःधंगु धक्का लाका बीगु खनेदु। उकिं थ्व अमेरिकाया लागिं नं चिन्ताया ई जुयाच्वंगु दु ।

More Stories Like this