आः मन्त्रीया ल्याः बारे विवाद

गृह माओवादीयात हे बीगु निश्चित

येँ (सन्ध्या टाइम्स)/प्रधानमन्त्री झलनाथ खनालं गृहमन्त्री माओवादीयात बियाः जूसां थौं वा कन्हय् तकया दुने मन्त्रिमण्डल विस्तार याइगु जूगु दु। उकिया लागिं वय्कलं गृहकार्य शुरु यानादीगु खँ धाःगु दु ।

सूत्रया कथं प्रम खनालं गृह माओवादीयात हे बीगु जुल धकाः म्हिगः निर्णय धइथें यानादीधुंकूगु कारणं आः उकी विवाद मदयेधुंकूगु दु। आः जुयाच्वंगु मू विवाद धइगु सुयात ग्वःगू मन्त्रालय बीगु धइगु खँय् खः ।

विज्ञ सूत्रं बिउगु जानकारी कथं माओवादीं थःपिंत ११ गू मन्त्रालय कयाः एमालेयात न्हय्गू व मेमेगु पार्टीयात च्यागू मन्त्रालय बीगु सूत्र न्ह्यःने हःगु दु। एमालें धाःसा माओवादीयात १० गू मन्त्रालय बियाः थःत च्यागू व मेमेगु दलयात च्यागू मन्त्रालय बीगु मेगु सूत्र न्ह्यःने हःगु दु। थ्व सूत्रया खँ मिले मजूगुलिं मन्त्रालय इना कायेगु निर्णय जुइ मफयाच्वंगु खः धाःगु दु ।

आः सरकारय् माओवादी बाहेक उपेन्द्र यादवया मधेसी जनअधिकार फोरम, नेकपा (माले) व माले समाजवादी व तमलोपा नेपाल दुहां वनीगु जुयाच्वंगु दु। उकी उपेन्द्र यादवयात संचार मन्त्रालय बियाः तमलोपा नेपालयात उर्जा मन्त्रालय बीगु खँ जूगु दु ।

मन्त्रालय बाँडफाँडया सूत्र कथं स्वास्थ्य काइम्हेस्यां शिक्षा काये मदइगु, भौतिक योजना काइम्हेस्यां स्थानीय विकास काये मदइगु प्रावधान दयेकूगु दु। उकिं आः थुकी मध्ये छु मन्त्रालय सुनां कायेगु धकाः निर्णय याये फयाच्वंगु मदुनि। सूत्रं धाः कथं एमालें थुगुसी स्वनिगःपाखें सुयातं मन्त्री मदयेकेगु धकाः नं बिचाः यानाच्वंगु दु ।

मन्त्रालय बाँडफाँडया खँय् यदि माधव नेपाल व खड्ग ओली पुचः माने मजुल धाःसा उमित पेले यानाः जूसां वनेगु धकाः नं प्रम खनालं बिचाः यानादीगु दुसा अज्याःगु ज्या धाःसा वय्कलं यानादीगु मदुनि। वय्कलं म्हिगः हे स्थायी समितिया बैठक सःताः अन थःगु प्रस्ताव प्रस्तुत जक यायेगु व निर्णय यायेगु ज्या चाहिं केन्द्रीय कमिटीयात त्वःतेगु धकाः जानकारी बीगु खँ धयादीगु खः। तर व ज्या धाःसा थौं तकं यानादीगु मदुनि ।