सम्पदा ल्यंका तयेगु दीर्घकालीन पलाः बारे

म्हिगः चान्हय् वःगु चलखं कयाः विश्वसम्पदाया धलखय् लाःगु ऐतिहासिक स्वयम्भु महाचैत्यया लिक्कसं च्वंगु प्रतापपुर क्षतिग्रस्त जूगु घटनां सम्बद्ध धर्मावलम्बी व सम्पदाप्रेमितय्त अवश्य नं दुःखित याना बिउगु दयेमाः। थनिं न्हय्दँ न्ह्यः तिनि आकाझाकां मिं नयाः ध्वस्त जूगु प्रतापपुर देगः आः हानं मलखं कयाः क्षतिग्रस्त जूगु अवश्य नं दुःखया खँ खः। तर दैवी प्रकोपया कारणं थ्व क्षति जूगु जुयाः उकी सुनां नं जिम्मेवारी कायेमाःगु जरुरी खने मतं ।

स्वयम्भु महाचैत्य विश्व सम्पदाया धलखय् दुथ्यानाच्वंगु नेपाःया छगू अमूल्य सम्पदा खः। म्हिगः चान्हय् प्रतापपुरया देगलय् गुगु मलः जूगु खः, व तप्यंक महाचैत्यय् नं जूवनेफु। भाग्यवश व अथे मजुल। यदि स्वयम्भु महाचैत्यय् हे अज्याःगु क्षति जूगु जूसा उकिं नेपाःया सम्पदायात अवश्य नं तःधंगु नोक्सानी याइगु खइ। थ्व मलः, वयां न्हयदँ न्ह्यः तिनि मि च्याःगु आदि थीथी घटनां छु क्यं ले धायेबलय् स्वयम्भु महाचैत्य विश्वया हे अपाय्जिगु सम्पदा खःसां उकियात संरक्षण यायेगु ज्याय् धाःसा अन्तर्राष्ट्रियस्तरया छुं नं कथंया ज्या यानातःगु मदु जुयाच्वन। अन सुसाःकुसाः यायेगु, लुँ हयाः पायेगु आदि आस्थाया ज्या ला यक्व हे जुल। तर सम्पदायात परन्तु तक ल्यंका तयेगु वा छुं नं कथंया प्रकोपपाखें बचे याना तयेगु ज्या धाःसा छुं हे मजूगु जुयाच्वन। येँय् तःधंगु भुखाय् ब्वइगु चर्चा नं जुयाच्वंगु दु। थज्याःगु इलय् नं नेपाःया म्हसीका जुयाच्वंगु थज्याःगु सम्पदायात गय् यानाः बचे याना तये फइगु खः उकिया बारे वृहत रुपं चिन्तन यायेमाःगु अतिकं आवश्यक दु। सखे आः पलाः न्ह्याकेगु ई नं त्यःगु दु ।

More Stories Like this