फेसबुकं हःगु हिउपाः

न्हूसाय्मि

फेसबुक। थौंकन्हय् मचांनिसें ल्याय्म्ह ल्यासेत जक मखु बुरा-बुरीतय्गु म्हुतुइ तकं घानाच्वंगु खँग्वः खः। उलि जक मखु आपालं इन्टरनेट सामाजिक संजालया न्ह्यःने थुकिया प्रयोगकर्ता नं गाक्कं हे दु। नेपाःया सन्दर्भय् जक मखु विश्वन्यंकंया थीथी पेशा नालाच्वंपिं जक मखसें व्यापारिक कम्पनीत तकं थःगु उत्पादनया अभिबृद्धि यायेगु व प्रचार प्रसार यायेत फेसबुकयात हे छगू माध्यम दयेका वयाच्वंगु दु ।

थुकथं थुकिया प्रयोग सीमित जुयाच्वंगु मदु। सुचं, भिंतुना, ज्याझ्वःया कालबिल यायेगु व छुं जानकारी वा ज्याझ्वःया किपा सार्वजनिक रुपं बीगु बाहेकं आः वयाः थुकिया प्रयोग धयागु आन्दोलन न्ह्याकेगु वा आन्दोलनप्रति समर्थन चूलाकेगु निंतिं जुया वःगु दु ।

खँ मध्यपूर्वया इजिप्टया खः। स्वीदँ न्ह्यवंनिसें इजिप्टय् एकछत्र सत्ताय् च्वंच्वंम्ह राष्ट्रपति होस्नी मुबारकयात अन्ततः पद त्याग यायेत बाध्य याःगु खः थ्व हे इन्टरनेटया सामाजिक संजाल फेसबुकं ।

राष्ट्रपति होस्नी मुबारकया राजीनामा माग यासें आन्दोलनय् कुहां वःपिं प्रदर्शनकारीत मध्ये छम्ह मिसाम्हेसियां इन्टरनेटया सामाजिक संजाल फेसबुकय् छगू अभियान न्ह्याकूगु खः। फेसबुकया वेब सन्देशय् उम्ह प्रयोगकर्तां 'विद्रोहया दिं' धासें आन्दोलनया आव्हान याःगु खः। थ्व छगू सन्देश बियाः आन्दोलनया निंतिं याःगु आव्हानया लिधंसाय् राजधानी कायरोया द्वलंद्वः मनूतय्सं 'क्लिक' यानाः आन्दोलनयात समर्थन जक याःगु मखु उकियात कार्यान्वयन याये कथं सकलें सतकय् कुहां वयाः विरोध प्रदर्शन नं याःगु खः ।

फेसबुकया संजालय् आन्दोलनया समर्थन यायेत व ब्वति कायेत आव्हान याःगु खःसा थ्व बाहेकं इन्टरनेटया मेगु सामाजिक संजाल 'ट्वीटर' य् राजधानी कायरोय् जुयाच्वंगु विरोध प्रदर्शनया किपा लिसें जानकारी नं प्रदर्शनकारीतय्सं प्रशारण याना बिल। लिच्वः कथं न्हापां विरोध प्रदर्शनय् कुहां वःपिनिगु ल्याः झन्झन् अप्वया वन। प्रदर्शनकारीतय् ल्याः मचायेक हे अप्वया वनेवं सरकारं 'ट्वीटर'यात इजिप्ट न्यंकं प्रतिबन्ध तया बिल। वयां लिपा आन्दोनलयात तिबः बीकथं स्वीडेनं हाकनं मेगु वेबसाइट 'ब्यामबुसेर मोबाइल फोनं' प्रदर्शनया भिडियो फुटेजत प्रशारण यानाबिल। वयां लिपा सरकारं ग्यानाः इजिप्टय् गुकियात नं 'ब्लक' यानाबिल ।

इन्टरनेटया सामाजिक संजाल बन्द जूसां मेमेगु माध्यम व मोबाइल एसएमएसया नं गाक्कं प्रयोग जुल। थुकिया हे कारणं मोबाइल सेवाय् तकं समस्या जुया बिल।
आकाझाकां ब्वलंगु सरकार विरोधी प्रदर्शनयात क्वत्यलेत न्हापां ला सरकारया नं चःति पिहां वल। इजिप्ट सरकारं प्रदर्शन शुरु जुइवं हे दंगा विरोधी प्रहरीयात सतकय् क्वकाःगु खःसा सुरक्षाकर्मीतय्सं नं टियर ग्याँस कयेकेगु नापनापं लःया फोहोरां नं छ्वाकेगु यात ।

छखे थःपिंसं बिचाः हे मयाःकथं प्रदर्शनयात समर्थन वयेवं इपिं छतिं विचलित मजुसे आन्दोलनयात निरन्तरता बिया हे च्वनसा मेखे सरकारं आन्दोनलयात प्रभावित यायेगु ल्याखं व्यापक रुपं प्रदर्शनकारीतय्त ज्वनेगु नं शुरु जुल। लिच्वः कथं आन्दोलन न्ह्याःगु निन्हुया दुने हे झण्डै द्वःछिं मल्याक प्रदर्शनकारीतय्त प्रहरीं थःगु नियन्त्रणय् काल ।

विरोध प्रदर्शन प्रभावित यायेत सरकारं कानुनी रुपं हे प्रदर्शन याये मदइगु कथं प्रतिबन्ध तल। अय्नं प्रदर्शनकारीत विचलित मजू। प्रदर्शन मदिकल धाःसा इमिगु विरुद्ध सरकारं पलाः न्ह्याकेत बाध्य जुइगु ख्याच्वः लिपा नं प्रदर्शन न्ह्याना हे च्वन।प्रदर्शन झन्झन् तच्वया वनेवं छगू तःधंगु हे प्रदर्शन नं यात। उगु प्रदर्शनय् विपक्षी दलया नेता लिसें नोबेल पुरस्कार विजेता मोहम्मद अल-बारादोई नं ब्वति कायेत इजिप्ट लिहां वल। आन्दोलन दीगु नां मकायेवं थःगु कार्यकाल पुरा यायेगु, आः जुइगु चुनावय् ब्वति मकायेगु, सत्ता काययात लःल्हायेगु, उपराष्ट्रपतियात कार्यकारी अधिकार लःल्हायेगु, धाँधली जूगु धाःगु थासय् हाकनं चुनाव यायेगु, गृहमन्त्रीयात बर्खास्त यायेगु अनेक उपाय मुबारकं छ्यःसां व दक्वं निरर्थक जुल। राष्ट्रपति मुबारकं अनेक उपाय छ्यलेगु झ्वलय् अन्ततः सेनायात सतकय् क्वकाल, व नं ध्याकुनय् लाः वन। इजिप्टया प्रहरीं मुबारकया सत्ता ल्यंकेत गुलि कुतः याःगु खः उकिया पाय्छि अःखः सेनां प्रदर्शनकारीतय् माग सही खः धासें इमिगु विरुद्ध बल प्रयोग यायेत अस्वीकार याःगु जक मखु छगू बयान हे जारी यानाः आन्दोलनयात नैतिक समर्थन याना बिल। थुकिया हे लिच्वः कथं प्रदर्शनकारीतय्त थप उर्जा प्राप्त जुल।
मुबारकया सत्ता ल्यंकेत समर्थकया रुपय् सतकय् कुहां वःपिं प्रहरीं प्रदर्शनकारीतय्त अप्पां कयेकेगु, ख्यायेगु जक याःगु मखुसें समाचार संकलनया निंतिं वयाच्वंपिं विदेशी पत्रकार व संचारकर्मित तकं इमिगु निशानाय् लाः वन। तर सेनां आन्दोलनयात नैतिक समर्थन याःगु जक मखु छक्वः हे गुगुं कथंया बल प्रयोग मयासें थःगु संयम नं प्रदर्शन याःगु खः। थपाय्मछिधंगु प्रदर्शनय् सेना सतकय् कुहां वलं नं बल प्रयोग मयाःगु खँय् इजिप्टया सेना वास्तवय् हे सुभाय्या पात्र खः ।

विरोध प्रदर्शन शुरु जूगु इलं निसें गुगुं हालतय् सत्ता त्वःतेत तयार मजूम्ह राष्ट्रपति होस्नी मुबारकं अन्ततः थःगु स्वीदँ ताःहाकःगु सत्तामोह झिंच्यान्हुया आन्दोलनया कारणं त्वःतेत बाध्य जुल। व नं गुगुं राजीनितक दल वा विपक्षी संगठनं याःगु आव्हानया कारणं मखसें लोकंह्वाःगु सामाजिक संजाल फेसबुकय् याःगु आब्हान हे प्रमुख कारण जूगु दु ।

More Stories Like this